ਦੁਨੀਆ ਦੇ ਸਭ ਤੋਂ 'ਹੈਵੀ' ਬੱਚੇ ਦੀ ਸਫ਼ਲ ਸਰਜਰੀ

  ਨਵੀਂ ਦਿੱਲੀ: ਪੱਛਮੀ ਦਿੱਲੀ ਦੇ ਉੱਤਮ ਨਗਰ ਵਿੱਚ ਰਹਿਣ ਵਾਲਾ ਮਿਹਿਰ ਜੈਨ ਦੁਨੀਆ ਦਾ ਸਭ ਤੋਂ ਭਾਰਾ ਬੱਚਾ ਸੀ। ਡਾਕਟਰਾਂ ਨੇ ਸਰਜਰੀ ਜ਼ਰੀਏ ਉਸ ਦਾ ਵਜ਼ਨ ਘੱਟ ਕਰਨ ਵਿੱਚ ਸਫ਼ਲਤਾ ਹਾਸਲ ਕੀਤੀ ਹੈ। ਪਿਛਲੇ ਕੁਝ ਸਮੇਂ ਤੋਂ ਮਿਹਿਰ ਦਾ ਸਾਕੇਤ ਦੇ ਮੈਕਸ ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਸੀ। ਹਸਪਤਾਲ ਦੇ ਸਰਜਨ ਪ੍ਰਦੀਪ ਚੌਬੇ ਨੇ ਦੱਸਿਆ ਕਿ ਜਦੋਂ ਉਸ ਨੂੰ ਹਸਪਤਾਲ ਵਿੱਚ ਲਿਆਂਦਾ ਗਿਆ ਤਾਂ ਉਸ ਦਾ ਵਜ਼ਨ 237 ਕਿੱਲੋ ਸੀ। ਗੈਸਟਰਿਕ ਬਾਈਪਾਸ ਸਰਜਰੀ ਕਰਾਉਣ ਵਾਲੇ ਮਿਹਿਰ ਦੀ ਉਮਰ 14 ਸਾਲ ਹੈ। ਮਿਹਿਰ ਦਾ ਜਨਮ 2003 ਵਿੱਚ ਹੋਇਆ ਸੀ ਤੇ ਉਸ ਸਮੇਂ ਉਸ ਦੀ ਵਜ਼ਨ ਆਮ ਬੱਚਿਆਂ ਵਾਂਗ 2.5 ਕਿੱਲੋ ਸੀ। ਪਰ ਜਿਵੇਂ-ਜਿਵੇਂ ਸਮਾਂ ਬੀਤਦਾ ਗਿਆ ਉਸ ਦਾ ਵਜ਼ਨ ਵਧਦਾ ਗਿਆ। ਪੰਜ ਸਾਲਾਂ  ਦੀ ਉਮਰ ਵਿਚ ਮਿਹਿਰ ਦਾ ਵਜ਼ਨ 60.70 ਕਿੱਲੋ ਹੋ ਗਿਆ ਸੀ। ਮਿਹਿਰ ਦੇ ਘਰ ਵਾਲਿਆਂ ਕਿਹਾ ਕਿ ਸ਼ੁਰੂ ਵਿੱਚ ਉਨ੍ਹਾਂ ਨੂੰ ਲੱਗਿਆ ਕਿ ਇਹ ਆਮ ਗੱਲ ਹੈ ਕਿਉਂਕਿ ਘਰ ਦੇ ਸਾਰੇ ਮੈਂਬਰਾਂ ਦਾ ਵਜ਼ਨ ਲਗਪਗ ਜ਼ਿਆਦਾ ਹੀ ਹੈ। ਪਰ ਹੌਲ਼ੀ-ਹੌਲ਼ੀ ਮੋਟਾਪੇ ਦੀ ਵਜ੍ਹਾ ਕਰਕੇ ਉਸ ਦੀ ਹਾਲਤ ਅਜਿਹੀ ਹੋ ਗਈ ਕਿ ਉਸ ਦਾ ਤੁਰਨਾ ਵੀ ਮੁਹਾਲ਼ ਹੋ ਗਿਆ। ਮਿਹਿਰ ਨੇ ਸਕੂਲ ਜਾਣਾ ਵੀ ਬੰਦ ਕਰ ਦਿੱਤਾ ਸੀ। ਇਸ ਤੋਂ ਬਾਅਦ ਘਰ ਵਾਲਿਆਂ 2010 ਵਿੱਚ ਬੱਚੇ ਦਾ ਇਲਾਜ ਕਰਾਉਣ ਦੀ ਕੋਸ਼ਿਸ਼ ਕੀਤੀ ਸੀ ਪਰ ਡਾਕਟਰਾਂ ਕਿਹਾ ਕਿ ਬੱਚਾ ਬਹੁਤ ਛੋਟਾ ਹੈ ਇਸ ਲਈ ਅਜੇ ਉਸ ਦਾ ਆਪਰੇਸ਼ਨ ਨਹੀਂ ਕੀਤਾ ਜਾ ਸਕਦਾ। ਡਾਕਟਰਾਂ ਨੇ ਮਿਹਿਰ ਨੂੰ ਘੱਟ ਕੈਲੋਰੀ ਵਾਲਾ ਭੋਜਨ ਖਾਣ ਦੀ ਸਲਾਹ ਦਿੱਤੀ ਸੀ ਜਿਸ ਦੇ ਬਾਅਦ ਉਸ ਦਾ ਵਜ਼ਨ 10 ਕਿੱਲੋ ਘਟ ਗਿਆ। ਇਸੇ ਤਰ੍ਹਾਂ ਦੋ ਮਹੀਨਿਆਂ ਵਿੱਚ ਉਸ ਦਾ ਵਜ਼ਨ 237 ਕਿੱਲੋ ਤੋਂ 196 ਕਿੱਲੋ ’ਤੇ ਆ ਗਿਆ ਸੀ। ਇਸ ਪਿੱਛੋਂ ਹੋਰ ਵਜ਼ਨ ਘੱਟ ਕਰਨ ਲਈ ਬੱਚੇ ਦਾ ਆਪਰੇਸ਼ਨ ਕੀਤਾ ਗਿਆ। ਡਾਕਟਰਾਂ ਕਿਹਾ ਕਿ ਇਹ ਉਨ੍ਹਾਂ ਲਈ ਸਭ ਤੋਂ ਵੱਡੀ ਚੁਣੌਤੀ ਸੀ ਕਿ ਇੰਨੇ ਜ਼ਿਆਦਾ ਵਜ਼ਨੀ ਬੱਚੇ ਨੂੰ ਬੇਹੋਸ਼ੀ ਦੀ ਦਵਾਈ ਕਿਵੇਂ ਦਿੱਤੀ ਜਾਏ। ਹਾਲਾਂਕਿ ਇਸ ਲਈ ਡਾਕਟਰਾਂ ਨੇ ਵਿਸ਼ੇਸ਼ ਤਰ੍ਹਾਂ ਦੇ ਯੰਤਰਾਂ ਦੀ ਵਰਤੋਂ ਕੀਤੀ। ਇਹ ਆਪਰੇਸ਼ਨ ਸਫਲ ਰਿਹਾ ਤੇ ਹੁਣ ਬੱਚੇ ਨੂੰ ਹਸਪਤਾਲ ਤੋਂ ਛੁੱਟੀ ਮਿਲ ਗਈ ਹੈ।