Ludhiana News: ਸਾਵਧਾਨ! ਲੁਧਿਆਣਾ ਸ਼ਹਿਰ ਵਿੱਚ ਕਾਰ ਚੋਰ ਆਣ ਵੜੇ ਹਨ। ਚੋਰਾਂ ਨੇ ਇੱਕੋ ਰਾਤ ਸੱਤ ਕਾਰਾਂ ਚੋਰੀ ਕਰਕੇ ਦਹਿਸ਼ਤ ਮਚਾ ਦਿੱਤੀ ਹੈ। ਉਂਝ ਇਹ ਅਹਿਮ ਹੈ ਕਿ ਚੋਰਾਂ ਨੇ ਲਗਜ਼ਰੀ ਕਾਰਾਂ ਦੀ ਬਜਾਏ ਮਰੂਤੀ ਦੀਆਂ ਕਾਰਾਂ ਨੂੰ ਹੀ ਨਿਸ਼ਾਨਾ ਬਣਾਇਆ ਹੈ। ਇਹ ਖਬਰ ਸਾਹਮਣੇ ਆਉਣ ਮਗਰੋਂ ਲੋਕਾਂ ਵਿੱਚ ਦਹਿਸ਼ਤ ਹੈ।
ਸੂਤਰਾਂ ਮੁਤਾਬਕ ਕਾਰ ਚੋਰਾਂ ਦੀ ਦਹਿਸ਼ਤ ਕਾਰਨ ਲੋਕਾਂ ਵਿੱਚ ਭਾਰੀ ਡਰ ਤੇ ਸਹਿਮ ਪਾਇਆ ਜਾ ਰਿਹਾ ਹੈ। ਇੱਕ ਹੀ ਰਾਤ ਵਿੱਚ ਚੋਰ ਵੱਖ-ਵੱਖ ਇਲਾਕਿਆਂ ਵਿੱਚੋਂ ਸੱਤ ਮਾਰੂਤੀ ਕਾਰਾਂ ਚੋਰੀ ਕਰ ਕੇ ਲੈ ਗਏ। ਥਾਣਾ ਡਿਵੀਜ਼ਨ ਨੰਬਰ-5 ਦੇ ਇਲਾਕੇ ਮਾਡਲ ਗ੍ਰਾਮ ਵਾਸੀ ਬਰਿੰਦਰ ਸਿੰਘ ਸਿੱਧੂ ਪੁੱਤਰ ਹਰਬੰਸ ਸਿੰਘ ਸਿੱਧੂ ਦੀ ਮਾਰੂਤੀ ਕਾਰ 800 ਡੀਲਕਸ ਉਸ ਦੇ ਘਰ ਦੇ ਨੇੜੇ ਗਲੀ ਵਿੱਚੋਂ ਚੋਰੀ ਹੋ ਗਈ।
ਇਸੇ ਤਰ੍ਹਾਂ ਸਾਊਥ ਮਾਡਲ ਗ੍ਰਾਮ ਵਾਸੀ ਜਗਦੀਪ ਸਿੰਘ ਪੁੱਤਰ ਬਿਕਰਮ ਸਿੰਘ ਦੀ ਮਰੂਤੀ ਕਾਰ ਘਰ ਦੇ ਬਾਹਰੋਂ ਕੋਈ ਨਾਮਲੂਮ ਵਿਅਕਤੀ ਚੋਰੀ ਕਰ ਕੇ ਲੈ ਗਿਆ। ਥਾਣਾ ਡਿਵੀਜ਼ਨ ਨੰਬਰ-8 ਦੇ ਇਲਾਕੇ ਬ੍ਰਹਮ ਕੁਮਾਰੀ ਆਸ਼ਰਮ ਊਧਮ ਸਿੰਘ ਨਗਰ ਬਾਹਰੋਂ ਮਨਪ੍ਰੀਤ ਸਿੰਘ ਪੁੱਤਰ ਮਹਿੰਦਰ ਸਿੰਘ ਵਾਸੀ ਪਿੰਡ ਤਖਤੂਪੁਰਾ (ਮੋਗਾ) ਦੀ ਕਾਰ ਮਾਰੂਤੀ ਸਜੂਕੀ 800 ਨਾਮਲੂਮ ਵਿਅਕਤੀ ਚੋਰੀ ਕਰ ਕੇ ਲੈ ਗਿਆ ਹੈ। ਇਸੇ ਤਰ੍ਹਾਂ ਸ਼ੀਲਾ ਸਟੇਅਜ਼ ਨੇੜੇ ਡੀਐਮਸੀ ਹਸਪਤਾਲ ਦੇ ਬਾਹਰੋਂ ਸੁਖਵਿੰਦਰ ਸਿੰਘ ਪੁੱਤਰ ਅਮਰੀਕ ਸਿੰਘ ਵਾਸੀ ਪਿੰਡ ਪਥਰੀ (ਪਟਿਆਲਾ) ਦੀ ਕਾਰ ਮਾਰੂਤੀ ਸਜੂਕੀ ਜੈਨ ਚੋਰੀ ਹੋ ਗਈ ਹੈ।
ਥਾਣਾ ਮਾਡਲ ਟਾਊਨ ਦੇ ਇਲਾਕੇ ਵਿੱਚ ਇੱਕ ਕੋਠੀ ਬਾਹਰੋਂ ਪ੍ਰਵੀਨ ਕੁਮਾਰ ਚੌਧਰੀ ਪੁੱਤਰ ਗੁਰਬਚਨ ਸਿੰਘ ਵਾਸੀ ਗਲੀ ਨੰਬਰ 5 ਲਕਸ਼ਮੀ ਨਗਰ ਦੀ ਮਾਰੂਤੀ ਕਾਰ ਨੂੰ ਕੋਈ ਨਾਮਲੂਮ ਵਿਅਕਤੀ ਚੋਰੀ ਕਰਕੇ ਲੈ ਗਏ ਹਨ। ਇਸੇ ਤਰ੍ਹਾਂ ਗੁਰਦੁਆਰਾ ਸ਼ਹੀਦ ਬਾਬਾ ਦੀਪ ਸਿੰਘ ਜੀ ਮਾਡਲ ਟਾਊਨ ਬਾਹਰੋਂ ਕੁਲਬੀਰ ਕੁਮਾਰ ਪੁੱਤਰ ਨੋਹਰੀਆ ਰਾਮ ਵਾਸੀ ਵਿਕਾਸ ਨਗਰ ਦੀ ਕਾਰ ਮਾਰੂਤੀ 800 ਨਾਮਲੂਮ ਵਿਅਕਤੀ ਚੋਰੀ ਕਰਕੇ ਲੈ ਗਿਆ ਹੈ। ਇਸੇ ਤਰ੍ਹਾਂ ਤਿਕੋਨਾ ਪਾਰਕ ਮਾਡਲ ਟਾਊਨ ਤੋਂ ਰਾਹੁਲ ਕੁਮਾਰ ਪੁੱਤਰ ਸੀਤਾ ਸਰਨ ਵਾਸੀ ਪਿੰਡ ਫੁੱਲਾਂਵਾਲ ਪੱਖੋਵਾਲ ਰੋਡ ਦੀ ਕਾਰ ਮਾਰੂਤੀ ਨਾਮਲੂਮ ਵਿਅਕਤੀ ਚੋਰੀ ਕਰ ਕੇ ਲੈ ਗਿਆ ਹੈ।