ਭਾਰਤੀ ਮੂਲ ਦੀ ਅਮਰੀਕਨ ਫ਼ੌਜਣ ਨੇ ਜਿੱਤਿਆ ਸੁੰਦਰੀ ਦਾ ਤਾਜ

ਅਨੰਨਿਆ ਦਾ ਸ਼ੌਕ ਨਾਸਾ ਵਿੱਚ ਜਾਣਾ ਤੇ ਪੁਲਾੜ ਨੂੰ ਜਾਣਨਾ ਹੈ। ਉਸ ਦੀਆਂ ਆਸਾਂ ਨੂੰ ਉਦੋਂ ਬੂਰ ਪਿਆ ਜਦੋਂ ਉਸ ਨੂੰ ਵਿਦੇਸ਼ੀ ਨਾਗਰਿਕਾਂ ਲਈ ਜਾਰੀ ਪ੍ਰੋਗਰਾਮ ਤਹਿਤ ਅਮਰੀਕੀ ਹਵਾਈ ਫ਼ੌਜ ਵਿੱਚ ਜਾਣ ਦਾ ਮੌਕਾ ਮਿਲਿਆ। ਇਸ ਸਮੇਂ ਅਨੰਨਿਆ ਅਮਰੀਕੀ ਫ਼ੌਜ ਦੇ ਅਪਾਚੇ ਹੈਲੀਕਾਪਟਰਾਂ ਦੀ ਦੇਖ-ਰੇਖ ਕਰਦੀ ਹੈ।

ਅਨੰਨਿਆ ਦਿੱਲੀ 'ਚ ਪਲੀ ਵੱਡੀ ਹੋਈ। ਉਸ ਨੂੰ ਸ਼ੁਰੂ ਤੋਂ ਹੀ ਪੁਲਾੜ ਵਿੱਚ ਜਾਣ ਦੀ ਚਾਹ ਸੀ। ਉਸ ਵਿੱਚ ਇਹ ਲਾਲਸਾ ਭਾਰਤ ਦੀ ਮਹਾਨ ਪੁਲਾੜ ਵਿਗਿਆਨੀ ਤੇ ਯਾਤਰੀ ਕਲਪਨਾ ਚਾਵਲਾ ਤੋਂ ਮਿਲੀ। ਜਦੋਂ 1 ਫਰਵਰੀ, 2003 ਨੂੰ ਕਲਪਨਾ ਚਾਵਲਾ ਤੇ ਹੋਰਨਾਂ ਪੁਲਾੜ ਯਾਤਰੀਆਂ ਦਾ ਪੁਲਾੜ ਵਾਹਨ (ਸਪੇਸ ਸ਼ੱਟਲ) ਹਾਦਸਾਗ੍ਰਸਤ ਹੋ ਗਿਆ। 12 ਸਾਲ ਦੀ ਅਨੰਨਿਆ ਆਪਣੇ ਦਾਦਾ ਨਾਲ ਇਹ ਸਭ ਦੇਖ ਰਹੀ ਸੀ। ਉਦੋਂ ਤੋਂ ਹੀ ਉਸ ਅੰਦਰ ਪੁਲਾੜ ਬਾਰੇ ਜਾਣਨ ਤੇ ਪੁਲਾੜ ਵਿਗਿਆਨੀ ਬਣਨ ਦੀ ਤਾਂਘ ਪੈਦਾ ਹੋ ਗਈ।