ਨਵੀਂ ਖੋਜ: ਚਾਹ ਪੀਣ ਦੇ ਨਵੇਂ ਫਾਇਦਿਆਂ ਬਾਰੇ ਲੱਗਾ ਪਤਾ

ਲੰਡਨ- ਜੇ ਕਿਹਾ ਜਾਵੇ ਕਿ ਇੱਕ ਕੱਪ ਚਾਹ ਵਧਦੀ ਉਮਰ ਦੀਆਂ ਸਮੱਸਿਆਵਾਂ ਨੂੰ ਰੋਕ ਸਕਦੀ ਹੈ ਤੇ ਇਸ ਨਾਲ ਅੱਖਾਂ ਦੀ ਰੌਸ਼ਨੀ ਵਧਦੀ ਹੈ ਤਾਂ ਇਸ ਨੂੰ ਸੱਚ ਮੰਨਣਾ ਮੁਸ਼ਕਲ ਹੋਵੇਗਾ ਪਰ ਇੱਕ ਖੋਜ ਵਿੱਚ ਚਾਹ ਦੇ ਜੋ ਗੁਣ ਦੱਸੇ ਗਏ ਹਨ, ਉਹ ਬਹੁਤ ਫਾਇਦੇ ਪਹੁੰਚਾਉਣ ਵਾਲੇ ਹਨ। ਤਾਜ਼ਾ ਖੋਜ ਮੁਤਾਬਕ ਰੋਜ਼ ਇੱਕ ਕੱਪ ਚਾਹ ਪੀਣ ਨਾਲ ਅੱਖਾਂ ਦੀ ਰੋਸ਼ਨੀ ਨੂੰ ਕਮਜ਼ੋਰ ਹੋਣ ਤੋਂ ਰੋਕਿਆ ਜਾ ਸਕਦਾ ਹੈ। ਇੰਨਾ ਹੀ ਨਹੀਂ, ਇਸ ਨਾਲ ਅੱਖਾਂ ਦੀ ਸਮੱਸਿਆ ਗਲੂਕੋਮਾ ਦੇ ਖਤਰੇ ਨੂੰ ਦੂਰ ਕੀਤਾ ਜਾ ਸਕਦਾ ਹੈ। ਚਾਹ ਦੇ ਲਾਭ ਬਾਰੇ ਬ੍ਰਿਟੇਨ ਵਿੱਚ ਛਪੀ ਖੋਜ ਵਿੱਚ ਕਿਹਾ ਗਿਆ ਹੈ ਕਿ ਉਮਰ ਵਧਣ ਦੇ ਨਾਲ-ਨਾਲ ਇਨਸਾਨ ਦੀਆਂ ਅੱਖਾਂ ਦੀ ਰੋਸ਼ਨੀ ਵੀ ਘੱਟ ਹੁੰਦੀ ਹੈ, ਪਰ ਜੇ ਤੁਸੀਂ ਰੋਜ਼ ਚਾਹ ਪੀਂਦੇ ਹੋ ਤਾਂ ਇਸ ਮੁਸ਼ਕਲ ਨੂੰ ਕਾਫੀ ਘੱਟ ਕਰ ਸਕਦੇ ਹੋ। ਤਾਜ਼ਾ ਖੋਜ ਦੇ ਮੁਤਾਬਕ ਗਲੂਕੋਮਾ ਖਤਰਨਾਕ ਰੋਗ ਹੈ। ਇਸ ‘ਤੇ ਧਿਆਨ ਨਾ ਦਿੱਤਾ ਜਾਵੇ ਤਾਂ ਇਹ ਇਨਸਾਨ ਨੂੰ ਅੰਨ੍ਹਾ ਬਣਾ ਸਕਦਾ ਹੈ। ਬ੍ਰਿਟੇਨ ਵਿੱਚ ਚਾਲੀ ਸਾਲ ਦੀ ਉਮਰ ਤੋਂ ਉਪਰ ਦੇ ਲਗਭਗ ਦੋ ਫੀਸਦੀ ਲੋਕ ਇਸ ਤੋਂ ਪੀੜਤ ਹਨ। ਕੁਝ ਦੂਸਰੇ ਮਾਹਰਾਂ ਨੇ ਇਸ ਖੋਜ ਦੀ ਆਲੋਚਨਾ ਕੀਤੀ ਹੈ। ਯੂਨੀਵਰਸਿਟੀ ਕਾਲਜ ਲੰਡਨ ਦੇ ਡਾਕਟਰ ਗ੍ਰਾਹਮ ਵ੍ਹੀਲਰ ਨੇ ਕਿਹਾ ਕਿ ਚਾਹ ਦੇ ਫਾਇਦਿਆਂ ‘ਤੇ ਖੋਜ ਕਰਨ ਵਾਲਿਆਂ ਨੇ ਇਸ ‘ਤੇ ਡੂੰਘਾਈ ਨਾਲ ਅਧਿਐਨ ਨਹੀਂ ਕੀਤਾ ਅਤੇ ਉਨ੍ਹਾਂ ਨੇ ਇਹ ਵੀ ਨਹੀਂ ਦੱਸਿਆ ਕਿ ਕਿਸੇ ਵਿਅਕਤੀ ਦੇ ਸਰੀਰ ਨੂੰ ਚਾਹ ਕਿਸ ਤਰ੍ਹਾਂ ਪ੍ਰਭਾਵਤ ਕਰਦੀ ਹੈ।