ਹੁਣ ਜਹਾਜ਼ ’ਚ ਨਹੀਂ ਮਿਲੇਗਾ ਮਾਸਾਹਾਰੀ ਖਾਣਾ

ਪ੍ਰਤੀਕਾਤਮਕ ਤਸਵੀਰ

ਚੰਡੀਗੜ੍ਹ: ਕੇਂਦਰੀ ਹਵਾਬਾਜ਼ੀ ਮੰਤਰੀ ਜਯੰਤ ਸਿਨ੍ਹਾ ਨੇ ਕਿਹਾ ਹੈ ਕਿ ਭੋਜਨ ਦਾ ਖ਼ਰਚ ਤੇ ਬਰਬਾਦੀ ਘੱਟ ਕਰਨ, ਸੇਵਾ ਵਿੱਚ ਸੁਧਾਰ ਲਿਆਉਣ ਤੇ ਭੋਜਨ ਪਛਾਣਨ ਵਿੱਚ ਗੜਬੜੀ ਹੋਣ ਦੀ ਕਿਸੇ ਵੀ ਸੰਭਾਵਨਾ ਤੋਂ ਬਚਣ ਲਈ ਏਅਰ ਇੰਡੀਆ ਦੀਆਂ ਘਰੇਲੂ ਉਡਾਣਾਂ ਵਿੱਚ ਮਾਸਾਹਾਰੀ ਖਾਣਾ ਬੰਦ ਕਰ ਦਿੱਤਾ ਗਿਆ ਹੈ। ਇਹ ਜਾਣਕਾਰੀ ਸਿਨ੍ਹਾ ਨੇ ਲੋਕ ਸਭਾ ਵਿੱਚ ਆਰ ਪਾਰਥਿਪਨ ਦੇ ਸਵਾਲ ਦੇ ਲਿਖਤੀ ਉੱਤਰ ਵਿੱਚ ਦਿੱਤੀ। ਹਾਲਾਂਕਿ ਉਨ੍ਹਾਂ ਇਹ ਵੀ ਲਿਖਿਆ ਕਿ ਏਅਰਲਾਈਨਜ਼ ਦੀਆਂ ਕੌਮਾਂਤਰੀ ਉਡਾਣਾਂ ਵਿੱਚ ਅਜਿਹਾ ਕਰਨ ਦਾ ਕੋਈ ਪ੍ਰਸਤਾਵ ਨਹੀਂ। ਜ਼ਿਕਰਯੋਗ ਹੈ ਕਿ ਜ਼ਿਆਦਾਤਰ ਏਅਰਲਾਈਨਜ਼ ਆਪਣੇ ਜਹਾਜ਼ਾਂ ਵਿੱਚ ਸ਼ਾਕਾਹਾਰੀ ਤੇ ਮਾਸਾਹਾਰੀ ਖਾਣੇ ਦਾ ਵਿਕਲਪ ਦਿੰਦੀਆਂ ਹਨ। ਖਾਸ ਕਰਕੇ ਉਨ੍ਹਾਂ ਲਈ ਯਾਤਰੀਆਂ ਲਈ ਜੋ ਬੀਫ ਜਾਂ ਪੋਰਕ ਨਹੀਂ ਖਾਂਦੇ। ਏਅਰ ਇੰਡੀਆ ਤੇ ਸਿੰਗਾਪੁਰ ਏਅਰਲਾਈਨਜ਼ ਦੇ ਮੈਨਿਊ ਵਿੱਚ ਵੀ ਧਾਰਮਿਕ ਭੋਜਨ ਦਾ ਵਿਕਲਪ ਹੁੰਦਾ ਹੈ। ਯਾਦ ਰਹੇ ਕਿ ਇਸ ਤੋਂ ਪਹਿਲਾਂ ਦੁਬਈ ਦੀ ਸਭ ਤੋਂ ਵੱਡੀ ਏਅਰਲਾਈਨ ਕੰਪਨੀ ਅਮੀਰੇਤਸ ਦੀਆਂ ਉਡਾਣਾਂ ਵਿੱਚ ਵੀ ‘ਹਿੰਦੂ ਮੀਲ’ ਨਾ ਦੇਣ ਦਾ ਐਲਾਨ ਕੀਤਾ ਗਿਆ ਸੀ। ਜਹਾਜ਼ ਵਿੱਚ ਸਫ਼ਰ ਕਰਨ ਤੋਂ ਪਹਿਲਾਂ ਯਾਤਰੀ ਖਾਣਾ ਬੁਕ ਕਰ ਸਕਦੇ ਹਨ ਪਰ ਅਮੀਰੇਤਸ ਦੀਆਂ ਉਡਾਣਾ ਵਿੱਚ ਹੁਣ ਅਜਿਹਾ ਨਹੀਂ ਹੋਏਗਾ।