ਕੋਡਨੇਮ CC1... ਰਾਅ ਅਫਸਰ ਵਿਕਾਸ ਯਾਦਵ 'ਤੇ FBI ਨੇ ਲਾਇਆ ਗੁਰਪਤਵੰਤ ਪੰਨੂ ਦੇ ਕਤਲ ਦੀ ਸਾਜ਼ਿਸ਼ ਰਚਣ ਦਾ ਦੋਸ਼, ਜਾਣੋ ਪੂਰਾ ਮਾਮਲਾ

ਅਮਰੀਕੀ ਦੋਸ਼ਾਂ ਵਿੱਚ ਜਾਂਚਕਾਰਾਂ ਨੇ ਦਾਅਵਾ ਕੀਤਾ ਹੈ ਕਿ ਪੰਨੂ ਕੇਸ ਦੇ ਮੁਲਜ਼ਮਾਂ ਤੇ ਖਾਲਿਸਤਾਨੀ ਹਰਦੀਪ ਨਿੱਝਰ ਦੇ ਕਤਲ ਵਿੱਚ ਸਿੱਧੇ ਸਬੰਧ ਹਨ।  ਅਮਰੀਕੀ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਯਾਦਵ ਭਾਰਤੀ ਖੁਫੀਆ ਏਜੰਸੀ ਰਾਅ ਦਾ ਸਾਬਕਾ ਅਧਿਕਾਰੀ ਸੀ ਤੇ ਉਸ ਨੇ ਸਾਜ਼ਿਸ਼ ਦੌਰਾਨ "ਅਮਾਨਤ" ਉਪਨਾਮ ਦੀ ਵਰਤੋਂ ਕੀਤੀ ਸੀ

Vikas Yadav

Source : Abp Live

Codename CC1: ਖਾਲਿਸਤਾਨੀ ਗੁਰਪਤਵੰਤ ਸਿੰਘ ਪੰਨੂ ਦੇ ਕਤਲ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ 'ਚ ਅਮਰੀਕਾ 'ਚ ਭਾਰਤੀ ਨਾਗਰਿਕ 'ਤੇ ਦੋਸ਼ ਆਇਦ ਕੀਤੇ ਗਏ ਹਨ। ਇਸ ਭਾਰਤੀ ਨਾਗਰਿਕ ਦਾ ਨਾਂਅ ਵਿਕਾਸ ਯਾਦਵ ਹੈ। ਇਸ ਤੋਂ ਪਹਿਲਾਂ ਮੂਲ ਚਾਰਜਸ਼ੀਟ ਵਿੱਚ ਵਿਕਾਸ ਯਾਦਵ ਦਾ ਜ਼ਿਕਰ ਸੀਸੀ-1 ਵਜੋਂ ਕੀਤਾ ਗਿਆ ਸੀ। 

ਕੀ ਹੈ ਪੂਰਾ ਮਾਮਲਾ?

ਪਿਛਲੇ ਸਾਲ ਨਵੰਬਰ ਵਿੱਚ ਫਾਈਨੈਂਸ਼ੀਅਲ ਟਾਈਮਜ਼ ਨੇ ਆਪਣੀ ਰਿਪੋਰਟ ਵਿੱਚ ਦਾਅਵਾ ਕੀਤਾ ਸੀ ਕਿ ਪੰਨੂ ਦੀ ਹੱਤਿਆ ਦੀ ਸਾਜ਼ਿਸ਼ ਅਮਰੀਕੀ ਧਰਤੀ ’ਤੇ ਰਚੀ ਗਈ ਸੀ, ਜਿਸ ਨੂੰ ਨਾਕਾਮ ਕਰ ਦਿੱਤਾ ਗਿਆ ਸੀ। ਪੰਨੂ ਅਮਰੀਕੀ ਨਾਗਰਿਕ ਹੈ ਤੇ ਭਾਰਤ ਨੇ ਉਸ ਨੂੰ ਅੱਤਵਾਦੀ ਐਲਾਨਿਆ ਹੋਇਆ ਹੈ। 

ਇਸ ਤੋਂ ਬਾਅਦ ਅਮਰੀਕੀ ਨਿਆਂ ਵਿਭਾਗ ਨੇ ਵੀ ਇਸ ਮਾਮਲੇ ਨੂੰ ਲੈ ਕੇ ਨਿਊਯਾਰਕ ਜ਼ਿਲ੍ਹਾ ਅਦਾਲਤ ਵਿੱਚ ਕੇਸ ਦਾਇਰ ਕੀਤਾ ਸੀ। ਇਸ ਵਿੱਚ ਨਿਖਿਲ ਗੁਪਤਾ ਨਾਮ ਦੇ ਇੱਕ ਭਾਰਤੀ ਨਾਗਰਿਕ ਅਤੇ ਇੱਕ ਅਣਪਛਾਤੇ ਭਾਰਤੀ ਸਰਕਾਰੀ ਅਧਿਕਾਰੀ 'ਤੇ ਪੰਨੂ ਦੇ ਕਤਲ ਦੀ ਯੋਜਨਾ ਬਣਾਉਣ ਦਾ ਦੋਸ਼ ਲਗਾਇਆ ਗਿਆ ਸੀ। ਨਿਖਿਲ ਗੁਪਤਾ ਨੂੰ ਪਿਛਲੇ ਸਾਲ ਜੂਨ 'ਚ ਚੈੱਕ ਗਣਰਾਜ 'ਚ ਗ੍ਰਿਫਤਾਰ ਕੀਤਾ ਗਿਆ ਸੀ ਤੇ ਇਸ ਸਾਲ ਉਸ ਨੂੰ ਅਮਰੀਕਾ ਹਵਾਲੇ ਕੀਤਾ ਗਿਆ ਸੀ। ਨਿਖਿਲ ਗੁਪਤਾ ਇਸ ਸਮੇਂ ਅਮਰੀਕਾ ਦੀ ਜੇਲ੍ਹ ਵਿੱਚ ਬੰਦ ਹੈ।

ਦਾਇਰ ਦੋਸ਼ਾਂ ਅਨੁਸਾਰ, ਗੁਪਤਾ ਨੂੰ ਪੰਨੂ ਦੀ ਹੱਤਿਆ ਕਰਨ ਲਈ ਭਾਰਤ ਸਰਕਾਰ ਦੇ ਇੱਕ ਅਧਿਕਾਰੀ ਨੇ ਕਿਰਾਏ 'ਤੇ ਲਿਆ ਸੀ। ਗੁਪਤਾ ਨੇ ਇਸ ਕਤਲ ਲਈ ਇੱਕ ਹਿਟਮੈਨ (ਸੁਪਾਰੀ ਕਿਲਰ) ਨੂੰ ਨਿਯੁਕਤ ਕੀਤਾ ਸੀ, ਪਰ ਅਸਲ ਵਿੱਚ ਉਹ ਅਮਰੀਕੀ ਸਰਕਾਰ ਦਾ ਖੁਫੀਆ ਏਜੰਟ ਸੀ। ਖੁਫੀਆ ਏਜੰਟ ਨੂੰ ਹਿੱਟਮੈਨ ਮੰਨ ਕੇ 'ਟਾਰਗੇਟ' ਨੂੰ ਮਾਰਨ ਲਈ ਉਸ ਨੂੰ ਇਕ ਲੱਖ ਡਾਲਰ (83 ਲੱਖ ਰੁਪਏ) ਦਾ ਠੇਕਾ ਦਿੱਤਾ ਗਿਆ ਸੀ। ਉਸ ਨੂੰ ਮੈਨਹਟਨ ਵਿੱਚ 15 ਹਜ਼ਾਰ ਡਾਲਰ ਐਡਵਾਂਸ ਵੀ ਦਿੱਤੇ ਗਏ ਸਨ।

ਵੀਰਵਾਰ ਨੂੰ ਅਮਰੀਕੀ ਵਕੀਲਾਂ ਨੇ ਖਾਲਿਸਤਾਨੀ ਗੁਰਪਤਵੰਤ ਸਿੰਘ ਪੰਨੂ ਦੀ ਹੱਤਿਆ ਦੀ ਅਸਫਲ ਸਾਜ਼ਿਸ਼ ਦੇ ਮਾਮਲੇ 'ਚ ਅਹਿਮ ਖੁਲਾਸਾ ਕੀਤਾ ਤੇ ਵਿਕਾਸ ਯਾਦਵ ਦਾ ਨਾਂ ਅੱਗੇ ਰੱਖਿਆ। ਯਾਦਵ 'ਤੇ "ਭਾੜੇ ਲਈ ਕਤਲ" ਅਤੇ "ਮਨੀ ਲਾਂਡਰਿੰਗ" ਦੇ ਗੰਭੀਰ ਦੋਸ਼ ਲਗਾਏ ਗਏ ਹਨ। ਇਹ ਦੋਸ਼ ਨਿਊਯਾਰਕ ਦੀ ਅਦਾਲਤ ਵਿੱਚ ਦਾਇਰ ਕੀਤੇ ਗਏ ਦੂਜੇ ਦੋਸ਼ ਦਾ ਹਿੱਸਾ ਹਨ। ਯਾਦਵ ਦੇ ਕਥਿਤ ਸਹਿਯੋਗੀ ਨਿਖਿਲ ਗੁਪਤਾ 'ਤੇ ਪਹਿਲਾਂ ਹੀ ਦੋਸ਼ ਲਗਾਇਆ ਗਿਆ ਹੈ ਅਤੇ ਉਸ ਨੂੰ ਅਮਰੀਕਾ ਹਵਾਲੇ ਕਰ ਦਿੱਤਾ ਗਿਆ ਹੈ।

ਜਾਣੋ ਕੌਣ ਹੈ ਵਿਕਾਸ ਯਾਦਵ?

ਅਮਰੀਕੀ ਦੋਸ਼ਾਂ ਵਿੱਚ ਜਾਂਚਕਾਰਾਂ ਨੇ ਦਾਅਵਾ ਕੀਤਾ ਹੈ ਕਿ ਪੰਨੂ ਕੇਸ ਦੇ ਮੁਲਜ਼ਮਾਂ ਤੇ ਖਾਲਿਸਤਾਨੀ ਹਰਦੀਪ ਨਿੱਝਰ ਦੇ ਕਤਲ ਵਿੱਚ ਸਿੱਧੇ ਸਬੰਧ ਹਨ।  ਅਮਰੀਕੀ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਯਾਦਵ ਭਾਰਤੀ ਖੁਫੀਆ ਏਜੰਸੀ ਰਾਅ ਦਾ ਸਾਬਕਾ ਅਧਿਕਾਰੀ ਸੀ ਤੇ ਉਸ ਨੇ ਸਾਜ਼ਿਸ਼ ਦੌਰਾਨ "ਅਮਾਨਤ" ਉਪਨਾਮ ਦੀ ਵਰਤੋਂ ਕੀਤੀ ਸੀ। ਉਸ ਦੀਆਂ ਤਸਵੀਰਾਂ ਜਾਰੀ ਕਰਦਿਆਂ ਐਫਬੀਆਈ ਨੇ ਕਿਹਾ ਕਿ ਉਸ ਦਾ ਜਨਮ ਹਰਿਆਣਾ ਵਿੱਚ ਹੋਇਆ ਸੀ। ਇਸ ਮਾਮਲੇ 'ਤੇ ਪ੍ਰਤੀਕਿਰਿਆ ਦਿੰਦੇ ਹੋਏ, ਭਾਰਤ ਦੇ ਵਿਦੇਸ਼ ਮੰਤਰਾਲੇ ਨੇ ਸਪੱਸ਼ਟ ਕੀਤਾ ਕਿ ਦੋਸ਼ਾਂ ਵਿਚ ਜ਼ਿਕਰ ਕੀਤੇ ਗਏ ਵਿਅਕਤੀ ਹੁਣ ਭਾਰਤ ਸਰਕਾਰ ਲਈ ਕੰਮ ਨਹੀਂ ਕਰਦੇ ਹਨ।