ਫ੍ਰੀਸਟਾਈਲ ਕੁਸ਼ਤੀ 'ਚ ਪਹਿਲਵਾਨਾਂ ਨੇ ਸੋਨੇ ਸਮੇਤ ਜਿੱਤੇ ਚਾਰ ਤਗ਼ਮੇ

ਗੋਲਡ ਕੋਸਟ: ਭਾਰਤੀ ਪਹਿਲਵਾਨਾਂ ਨੇ ਮਹਿਲਾ ਤੇ ਪੁਰਸ਼ ਵਰਗ ਦੀ ਖੁੱਲ੍ਹੀ ਕੁਸ਼ਤੀ (ਫ੍ਰੀਸਟਾਈਲ) ਵਿੱਚ ਦੇਸ਼ ਦੀ ਚਾਂਦੀ ਕਰ ਦਿੱਤੀ ਹੈ। ਤਜ਼ਰਬੇਕਾਰ ਪਹਿਲਵਾਨ ਬਜਰੰਗ ਪੂਨੀਆ ਨੇ ਸੋਨ ਤੇ ਮੌਸਮ ਖੱਤਰੀ ਨੇ ਦੇਸ਼ ਦੀ ਝੋਲੀ ਦੋ ਚਾਂਦੀ ਦੇ ਤਗ਼ਮੇ ਪਾਏ। ਉੱਧਰ ਮਹਿਲਾ ਪਹਿਲਵਾਨਾਂ ਵਿੱਚ ਪੂਜਾ ਢੰਡਾ ਨੇ ਚਾਂਦੀ ਤੇ ਦਿਵਿਆ ਕਕਰਨ ਨੇ ਕਾਂਸੇ ਦਾ ਤਗ਼ਮਾ ਜਿੱਤਿਆ।   65 ਕਿੱਲੋਗ੍ਰਾਮ ਭਾਰ ਵਰਗ ਵਿੱਚ ਪੁਰਸ਼ ਫ੍ਰੀ ਸਟਾਈਲ ਕੁਸ਼ਤੀ ਲੜਦਿਆਂ ਪਹਿਲਵਾਨ ਬਜਰੰਗ ਪੂਨੀਆ ਨੇ ਸੋਨ ਤਗ਼ਮਾ ਜਿੱਤਿਆ ਹੈ। ਕਾਮਨਵੈਲਥ ਗੇਮਜ਼ ਦੇ ਨੌਵੇਂ ਦਿਨ ਪੂਨੀਆ ਨੇ ਭਾਰਤ ਦੀ ਝੋਲੀ 17ਵਾਂ ਸੋਨ ਤਗ਼ਮਾ ਪਾਇਆ। ਪੁਰਸ਼ਾਂ ਦੇ ਹੀ 97 ਕਿੱਲੋ ਭਾਰ ਵਰਗ ਦੇ ਫ੍ਰੀ ਸਟਾਈਲ ਕੁਸ਼ਤੀ ਮੁਕਾਬਲੇ ਵਿੱਚ ਮੌਸਮ ਖੱਤਰੀ ਨੂੰ ਵੀ ਚਾਂਦੀ ਦਾ ਤਗ਼ਮਾ ਮਿਲਿਆ। ਖੱਤਰੀ ਨੂੰ ਸਖ਼ਤ ਮੁਕਾਬਲੇ ਵਿੱਚ ਦੱਖਣੀ ਅਫ਼ਰੀਕਾ ਦੇ ਮਾਰਟਿਨ ਏਰਸਮੁਸ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਉੱਧਰ ਪੂਜਾ ਢੰਡਾ ਨੇ 57 ਕਿੱਲੋਗ੍ਰਾਮ ਫ੍ਰੀਸਟਾਈਲ ਕੁਸ਼ਤੀ ਵਿੱਚ ਚਾਂਦੀ ਦਾ ਤਗ਼ਮਾ ਆਪਣੇ ਨਾਂਅ ਕੀਤਾ। ਖੁੱਲ੍ਹੀ ਕੁਸ਼ਤੀ ਦੀ ਇੱਕ ਹੋਰ ਮੁਕਾਬਲੇਬਾਜ਼ ਦਿਵਿਆ ਕਕਰਨ ਨੇ ਵੀ ਕਾਂਸੇ ਦਾ ਤਗ਼ਮਾ ਜਿੱਤਿਆ। ਇਨ੍ਹਾਂ ਰਾਸ਼ਟਰਮੰਡਲ ਖੇਡਾਂ ਵਿੱਚ ਪਹਿਲੀ ਵਾਰ ਆਈ ਅੱਲ੍ਹੜ ਉਮਰ ਦੀ ਦਿਵਿਆ ਨੇ 68 ਕਿੱਲੋ ਭਾਰ ਵਰਗ ਵਿੱਚ ਫ੍ਰੀ ਸਟਾਈਲ ਕੁਸ਼ਤੀ ਲੜਦਿਆਂ ਇਹ ਕਾਰਨਾਮਾ ਕੀਤਾ।