Reciprocal Tariff: ਪੀਐਮ ਮੋਦੀ ਨੂੰ ਮਿਲਣ ਤੋਂ ਪਹਿਲਾਂ ਹੀ ਟਰੰਪ ਨੇ ਕਰ ਦਿੱਤਾ ਐਲਾਨ, ਭਾਰਤ ਨੂੰ ਹੋਏਗਾ ਵੱਡਾ ਨੁਕਸਾਨ?
ਧਾਨ ਮੰਤਰੀ ਨਰਿੰਦਰ ਮੋਦੀ ਅਮਰੀਕੀ ਦੌਰੇ ਤੋਂ ਵਾਪਸ ਆ ਗਏ ਹਨ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਪੀਐਮ ਮੋਦੀ ਨਾਲ ਮੁਲਾਕਾਤ ਮਗਰੋਂ ਦੋਵਾਂ ਮੁਲਕਾਂ ਵਿਚਾਲੇ ਚੰਗੇ ਸਬੰਧਾਂ ਦਾ ਭਰੋਸਾ ਦਿੱਤਾ ਪਰ ਭਾਰਤੀ ਸਾਮਾਨ ਉਪਰ ਟੈਰਿਫ ਲਾਉਣ...
Reciprocal Tariff: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਮਰੀਕੀ ਦੌਰੇ ਤੋਂ ਵਾਪਸ ਆ ਗਏ ਹਨ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਪੀਐਮ ਮੋਦੀ ਨਾਲ ਮੁਲਾਕਾਤ ਮਗਰੋਂ ਦੋਵਾਂ ਮੁਲਕਾਂ ਵਿਚਾਲੇ ਚੰਗੇ ਸਬੰਧਾਂ ਦਾ ਭਰੋਸਾ ਦਿੱਤਾ ਪਰ ਭਾਰਤੀ ਸਾਮਾਨ ਉਪਰ ਟੈਰਿਫ ਲਾਉਣ ਪਿੱਛੇ ਨਹੀਂ ਹਟੇ। ਟਰੰਪ ਨੇ ਪੀਐਮ ਮੋਦੀ ਨਾਲ ਮੁਲਾਕਾਤ ਤੋਂ ਦੋ ਘੰਟੇ ਪਹਿਲਾਂ ਹੀ ਭਾਰਤ ਸਮੇਤ ਸਾਰੇ ਦੇਸ਼ਾਂ 'ਤੇ ਰੈਸੀਪ੍ਰੋਕਲ ਟੈਰਿਫ ਲਾਉਣ ਦਾ ਐਲਾਨ ਕਰ ਦਿੱਤਾ। ਰੈਸੀਪ੍ਰੋਕਲ ਟੈਰਿਫ ਦਾ ਮਤਲਬ ਹੈ ਕਿ ਕੋਈ ਦੇਸ਼ ਅਮਰੀਕੀ ਸਾਮਾਨ 'ਤੇ ਜਿੰਨਾ ਵੀ ਟੈਰਿਫ ਲਗਾਉਂਦਾ ਹੈ, ਅਮਰੀਕਾ ਉਸ ਦੇਸ਼ ਦੇ ਸਾਮਾਨ 'ਤੇ ਵੀ ਓਨਾ ਹੀ ਟੈਰਿਫ ਲਾਵੇਗਾ।
ਰਾਇਟਰਜ਼ ਦੀ ਰਿਪੋਰਟ ਦੇ ਅਨੁਸਾਰ, ਟਰੰਪ ਨੇ ਵੀਰਵਾਰ ਰਾਤ ਨੂੰ ਇਸ ਨਾਲ ਸਬੰਧਤ ਨਵੀਂ ਟੈਰਿਫ ਨੀਤੀ 'ਤੇ ਦਸਤਖਤ ਕੀਤੇ। ਟਰੰਪ ਨੇ ਪ੍ਰੈਸ ਬ੍ਰੀਫਿੰਗ ਵਿੱਚ ਭਾਰਤ 'ਤੇ ਬਹੁਤ ਜ਼ਿਆਦਾ ਟੈਰਿਫ ਲਾਉਣ ਦਾ ਦੋਸ਼ ਲਗਾਇਆ। ਉਨ੍ਹਾਂ ਨੇ ਕਿਹਾ, "ਮੈਨੂੰ ਯਾਦ ਹੈ ਜਦੋਂ ਹਾਰਲੇ ਡੇਵਿਡਸਨ ਭਾਰਤ ਵਿੱਚ ਆਪਣੇ ਮੋਟਰਸਾਈਕਲ ਨਹੀਂ ਸੀ ਵੇਚ ਸਕਿਆ ਕਿਉਂਕਿ ਭਾਰਤ ਵਿੱਚ ਟੈਕਸ ਬਹੁਤ ਜ਼ਿਆਦਾ ਸਨ। ਭਾਰਤ ਵਿੱਚ ਬਹੁਤ ਜ਼ਿਆਦਾ ਟੈਰਿਫ ਕਾਰਨ ਹਾਰਲੇ ਨੂੰ ਨਿਰਮਾਣ ਬੰਦ ਕਰਨ ਲਈ ਮਜਬੂਰ ਹੋਣਾ ਪਿਆ। ਟਰੰਪ ਨੇ ਕਿਹਾ ਕਿ ਮੈਨੂੰ ਲੱਗਦਾ ਹੈ ਕਿ ਟੈਰਿਫ ਤੋਂ ਬਚਣ ਲਈ ਉਨ੍ਹਾਂ ਨੂੰ ਭਾਰਤ ਵਿੱਚ ਇੱਕ ਫੈਕਟਰੀ ਲਾਉਣੀ ਪਈ। ਅਸੀਂ ਵੀ ਇਹੀ ਕਰ ਸਕਦੇ ਹਾਂ। ਉਹ ਟੈਰਿਫ ਤੋਂ ਬਚਣ ਲਈ ਇੱਥੇ ਫੈਕਟਰੀਆਂ ਜਾਂ ਪਲਾਂਟ ਲਗਾ ਸਕਦੇ ਹਨ।"
ਟਰੰਪ ਨੇ ਰੈਸੀਪ੍ਰੋਕਲ ਟੈਰਿਫ ਕਿਉਂ ਲਾਏ?
ਟਰੰਪ ਨੇ ਕੁਝ ਦਿਨ ਪਹਿਲਾਂ ਮੀਡੀਆ ਨੂੰ ਕਿਹਾ ਸੀ ਕਿ ਹੁਣ ਰੈਸੀਪ੍ਰੋਕਲ (ਜੈਸੇ ਕੋ ਤੈਸਾ) ਦਾ ਸਮਾਂ ਆ ਗਿਆ ਹੈ। ਹੁਣ ਤੁਸੀਂ "reciprocal" ਸ਼ਬਦ ਲਗਾਤਾਰ ਸੁਣੋਗੇ। ਜੇਕਰ ਦੂਜੇ ਦੇਸ਼ ਵਾਧੂ ਟੈਰਿਫ ਲਗਾਉਂਦੇ ਹਨ, ਤਾਂ ਅਸੀਂ ਵੀ ਉਨ੍ਹਾਂ 'ਤੇ ਵੀ ਵਾਧੂ ਟੈਰਿਫ ਲਗਾਵਾਂਗੇ। ਟਰੰਪ ਦਾ ਮੰਨਣਾ ਹੈ ਕਿ ਦੂਜੇ ਦੇਸ਼ ਅਮਰੀਕਾ ਨਾਲੋਂ ਕਿਤੇ ਜ਼ਿਆਦਾ ਟੈਰਿਫ ਲਗਾ ਕੇ ਅਮਰੀਕਾ ਨੂੰ ਧੋਖਾ ਦੇ ਰਹੇ ਹਨ। ਦੂਜੇ ਦੇਸ਼ਾਂ ਵਾਂਗ ਆਯਾਤ ਟੈਕਸ ਲਗਾਉਣ ਨਾਲ ਨਿਰਪੱਖ ਵਪਾਰ ਯਕੀਨੀ ਹੋਵੇਗਾ ਤੇ ਅਮਰੀਕੀ ਸਰਕਾਰ ਦਾ ਮਾਲੀਆ ਵਧੇਗਾ।
ਇਸ ਦਾ ਭਾਰਤ 'ਤੇ ਕੀ ਪ੍ਰਭਾਵ ਪਵੇਗਾ?
ਜੇਕਰ ਅਮਰੀਕਾ ਭਾਰਤ 'ਤੇ ਟੈਰਿਫ ਵਧਾਉਂਦਾ ਹੈ, ਤਾਂ ਇਸ ਨਾਲ ਨੁਕਸਾਨ ਹੋਵੇਗਾ। ਭਾਰਤ ਆਪਣੇ ਵਿਦੇਸ਼ੀ ਵਪਾਰ ਦਾ 17% ਤੋਂ ਵੱਧ ਅਮਰੀਕਾ ਨਾਲ ਕਰਦਾ ਹੈ। ਅਮਰੀਕਾ ਭਾਰਤ ਦੇ ਖੇਤੀਬਾੜੀ ਉਤਪਾਦਾਂ ਜਿਵੇਂ ਫਲਾਂ ਤੇ ਸਬਜ਼ੀਆਂ ਦਾ ਸਭ ਤੋਂ ਵੱਡਾ ਖਰੀਦਦਾਰ ਹੈ। ਅਮਰੀਕਾ ਨੇ 2024 ਵਿੱਚ ਭਾਰਤ ਤੋਂ 18 ਮਿਲੀਅਨ ਟਨ ਚੌਲ ਵੀ ਦਰਾਮਦ ਕੀਤੇ ਹਨ। ਜੇਕਰ ਅਮਰੀਕਾ ਭਾਰਤ 'ਤੇ ਟੈਰਿਫ ਲਾਉਂਦਾ ਹੈ, ਤਾਂ ਭਾਰਤੀ ਉਤਪਾਦ ਅਮਰੀਕੀ ਬਾਜ਼ਾਰਾਂ ਵਿੱਚ ਉੱਚੀਆਂ ਕੀਮਤਾਂ 'ਤੇ ਵਿਕਣ ਲੱਗ ਪੈਣਗੇ। ਇਸ ਨਾਲ ਅਮਰੀਕੀ ਜਨਤਾ ਵਿੱਚ ਉਨ੍ਹਾਂ ਦੀ ਮੰਗ ਘੱਟ ਜਾਵੇਗੀ।
ਭਾਰਤ ਵੀ ਅਮਰੀਕੀ ਉਤਪਾਦਾਂ 'ਤੇ ਸਭ ਤੋਂ ਵੱਧ ਟੈਰਿਫ ਲਾਉਂਦਾ
ਭਾਰਤ ਸਭ ਤੋਂ ਵੱਧ ਟੈਰਿਫ ਲਗਾਉਣ ਵਾਲੇ ਦੇਸ਼ਾਂ ਵਿੱਚੋਂ ਇੱਕ ਰਿਹਾ ਹੈ। ਇੰਡੀਅਨ ਐਕਸਪ੍ਰੈਸ ਦੀ ਇੱਕ ਰਿਪੋਰਟ ਅਨੁਸਾਰ, 1990-91 ਤੱਕ ਭਾਰਤ ਵਿੱਚ ਔਸਤ ਟੈਰਿਫ 125% ਤੱਕ ਸੀ। ਉਦਾਰੀਕਰਨ ਤੋਂ ਬਾਅਦ ਇਹ ਘਟਣਾ ਸ਼ੁਰੂ ਹੋਇਆ। 2024 ਵਿੱਚ ਭਾਰਤ ਦੀ ਔਸਤ ਟੈਰਿਫ ਦਰ 11.66% ਸੀ। ਟਰੰਪ ਦੇ ਦੁਬਾਰਾ ਰਾਸ਼ਟਰਪਤੀ ਬਣਨ ਤੋਂ ਬਾਅਦ, ਭਾਰਤ ਸਰਕਾਰ ਨੇ ਟੈਰਿਫ ਦਰਾਂ ਵਿੱਚ ਬਦਲਾਅ ਕੀਤਾ ਹੈ।
ਦ ਹਿੰਦੂ ਦੀ ਰਿਪੋਰਟ ਅਨੁਸਾਰ, ਭਾਰਤ ਸਰਕਾਰ ਨੇ 150%, 125% ਤੇ 100% ਦੀਆਂ ਟੈਰਿਫ ਦਰਾਂ ਨੂੰ ਖਤਮ ਕਰ ਦਿੱਤਾ ਹੈ। ਹੁਣ ਭਾਰਤ ਵਿੱਚ ਸਭ ਤੋਂ ਵੱਧ ਟੈਰਿਫ ਦਰ 70% ਹੈ। ਭਾਰਤ ਵਿੱਚ ਲਗਜ਼ਰੀ ਕਾਰਾਂ 'ਤੇ 125% ਟੈਰਿਫ ਸੀ, ਹੁਣ ਇਸ ਨੂੰ ਘਟਾ ਕੇ 70% ਕਰ ਦਿੱਤਾ ਗਿਆ ਹੈ। ਅਜਿਹੀ ਸਥਿਤੀ ਵਿੱਚ ਭਾਰਤ ਦੀ ਔਸਤ ਟੈਰਿਫ ਦਰ ਸਾਲ 2025 ਵਿੱਚ ਘਟ ਕੇ 10.65% ਹੋ ਗਈ ਹੈ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
