ਆਕਸਫੋਰਡ ਦੇ ਵਿਗਿਆਨੀਆਂ ਵੱਲੋਂ ਵੱਡੀ ਕਾਮਯਾਬੀ, ਲੱਭਿਆ ਕੈਂਸਰ ਦਾ ਟੀਕਾ

ਹਰ ਸਾਲ ਲੱਖਾਂ ਲੋਕ Cancer ਦੀ ਬਿਮਾਰੀ ਕਾਰਨ ਮਰ ਰਹੇ ਹਨ। ਸਾਲ 2023 ਦੇ ਅੰਕੜਿਆਂ ਅਨੁਸਾਰ ਦੁਨੀਆ ਭਰ ਵਿੱਚ ਕੈਂਸਰ ਕਾਰਨ ਲਗਪਗ 96 ਲੱਖ ਤੋਂ ਇੱਕ ਕਰੋੜ ਤੱਕ ਲੋਕਾਂ ਦੀ ਮੌਤ ਹੋ ਗਈ।

( Image Source : Freepik )

ਡਾਕਟਰੀ ਖੇਤਰ ਵਿੱਚ ਨਵੀਆਂ ਖੋਜਾਂ ਤੇ ਲੋਕਾਂ ਵਿੱਚ ਜਾਗਰੂਕਤਾ ਵਧਣ ਕਾਰਨ ਕੈਂਸਰ ਦਾ ਸਮੇਂ ਸਿਰ ਨਿਦਾਨ ਤੇ ਇਲਾਜ ਪਹਿਲਾਂ ਨਾਲੋਂ ਸੌਖਾ ਹੋ ਗਿਆ ਹੈ। ਹਾਲਾਂਕਿ, ਜ਼ਿਆਦਾਤਰ ਲੋਕਾਂ ਲਈ ਕੈਂਸਰ ਅਜੇ ਵੀ ਡਰ ਦਾ ਦੂਜਾ ਨਾਮ ਹੈ। ਕੈਂਸਰ ਦੇ ਖ਼ਤਰਿਆਂ ਦੇ ਵਿਚਕਾਰ ਇੱਕ ਖ਼ਬਰ ਰਾਹਤ ਦੇਣ ਵਾਲੀ ਹੈ।

ਬ੍ਰਿਟਿਸ਼ ਵਿਗਿਆਨੀ ਇੱਕ ਅਜਿਹਾ ਟੀਕਾ ਬਣਾਉਣ ਲਈ ਕੰਮ ਕਰ ਰਹੇ ਹਨ ਜੋ ਇਸ ਘਾਤਕ ਬਿਮਾਰੀ ਨੂੰ ਇੱਕ ਜਾਂ ਦੋ ਨਹੀਂ ਸਗੋਂ 20 ਸਾਲ ਪਹਿਲਾਂ ਹੀ ਰੋਕ ਸਕਦਾ ਹੈ। ਹਾਲੀਆ ਰਿਪੋਰਟਾਂ ਤੋਂ ਪਤਾ ਚੱਲਦਾ ਹੈ ਕਿ ਵਿਗਿਆਨੀ ਇੱਕ ਨਵੇਂ 'ਕੈਂਸਰ ਟੀਕੇ' ਨਾਲ ਇੱਕ ਵੱਡੀ ਡਾਕਟਰੀ ਸਫਲਤਾ ਪ੍ਰਾਪਤ ਕਰਨ ਦੀ ਕਗਾਰ 'ਤੇ ਹਨ।

ਆਕਸਫੋਰਡ ਯੂਨੀਵਰਸਿਟੀ ਦੇ ਵਿਗਿਆਨੀ ਫਾਰਮਾਸਿਊਟੀਕਲ ਦਿੱਗਜ GSK ਦੇ ਸਹਿਯੋਗ ਨਾਲ ਇੱਕ ਅਜਿਹਾ ਟੀਕਾ ਵਿਕਸਤ ਕਰਨ ਲਈ ਕੰਮ ਕਰ ਰਹੇ ਹਨ ਜੋ ਸਰੀਰ ਵਿੱਚ 'ਅਣਜਾਣ ਕੈਂਸਰ' ਸੈੱਲਾਂ ਦਾ ਪਤਾ ਲਾ ਸਕਦਾ ਹੈ। ਇੰਨਾ ਹੀ ਨਹੀਂ, ਇਹ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਟੀਕਾ ਬਿਮਾਰੀ ਨੂੰ ਵਿਕਸਤ ਹੋਣ ਤੋਂ 20 ਸਾਲ ਪਹਿਲਾਂ ਹੀ ਰੋਕ ਸਕਦਾ ਹੈ।

ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਇਹ ਟੀਕਾ ਕੈਂਸਰ ਤੋਂ ਪਹਿਲਾਂ ਦੇ ਪੜਾਅ ਵਿੱਚ ਕੈਂਸਰ ਸੈੱਲਾਂ ਨੂੰ ਨਿਸ਼ਾਨਾ ਬਣਾ ਸਕਦਾ ਹੈ ਤੇ ਉਨ੍ਹਾਂ ਨੂੰ ਨਸ਼ਟ ਕਰ ਸਕਦਾ ਹੈ। ਆਕਸਫੋਰਡ ਯੂਨੀਵਰਸਿਟੀ ਵਿੱਚ ਓਨਕੋਲੋਜੀ ਦੀ ਪ੍ਰੋਫੈਸਰ ਸਾਰਾਹ ਬਲੈਗਡੇਨ ਨੇ ਇੱਕ ਸਥਾਨਕ ਰੇਡੀਓ ਨਾਲ ਗੱਲਬਾਤ ਵਿੱਚ ਇਸ ਟੀਕੇ ਬਾਰੇ ਜਾਣਕਾਰੀ ਸਾਂਝੀ ਕੀਤੀ।

ਪ੍ਰੋਫੈਸਰ ਸਾਰਾਹ ਦਾ ਕਹਿਣਾ ਹੈ ਕਿ ਅਸੀਂ ਸਾਰੇ ਹਮੇਸ਼ਾ ਸੋਚਦੇ ਹਾਂ ਕਿ ਸਰੀਰ ਵਿੱਚ ਕੈਂਸਰ ਦੇ ਵਿਕਾਸ ਲਈ ਲਗਪਗ ਇੱਕ ਜਾਂ ਦੋ ਸਾਲ ਲੱਗਦੇ ਹਨ, ਪਰ ਅਸਲ ਵਿੱਚ ਹੁਣ ਬਹੁਤ ਸਾਰੇ ਅਧਿਐਨ ਇਸ ਗੱਲ ਦੀ ਪੁਸ਼ਟੀ ਕਰਦੇ ਹਨ ਕਿ ਕੈਂਸਰ ਦੇ ਵਿਕਾਸ ਲਈ 20 ਸਾਲ ਲੱਗ ਸਕਦੇ ਹਨ ਤੇ ਕਈ ਵਾਰ ਇਸ ਤੋਂ ਵੀ ਵੱਧ।

ਇਹ ਇਸ ਲਈ ਹੈ ਕਿਉਂਕਿ ਇੱਕ ਆਮ ਸੈੱਲ ਨੂੰ ਕੈਂਸਰ ਸੈੱਲ ਬਣਨ ਵਿੱਚ ਬਹੁਤ ਸਮਾਂ ਲੱਗਦਾ ਹੈ। ਅਸੀਂ ਜਾਣਦੇ ਹਾਂ ਕਿ ਇਸ ਸਮੇਂ ਦੌਰਾਨ ਜ਼ਿਆਦਾਤਰ ਕੈਂਸਰ ਅਦਿੱਖ ਹੁੰਦੇ ਹਨ। ਜਿਸ ਪੜਾਅ ਵਿੱਚੋਂ ਕੈਂਸਰ ਸੈੱਲ ਲੰਘ ਰਹੇ ਹੁੰਦੇ ਹਨ, ਉਸ ਨੂੰ ਪ੍ਰੀ-ਕੈਂਸਰ ਪੜਾਅ ਕਿਹਾ ਜਾਂਦਾ ਹੈ। ਇਸ ਲਈ ਇਸ ਟੀਕੇ ਦਾ ਉਦੇਸ਼ ਕੈਂਸਰ ਦੇ ਵਿਰੁੱਧ ਟੀਕਾਕਰਨ ਕਰਨਾ ਨਹੀਂ, ਸਗੋਂ ਅਸਲ ਵਿੱਚ ਕੈਂਸਰ ਤੋਂ ਪਹਿਲਾਂ ਦੇ ਪੜਾਅ ਵਿੱਚ ਕੈਂਸਰ ਦਾ ਪਤਾ ਲਾਉਣਾ ਤੇ ਖਤਮ ਕਰਨਾ ਹੈ।

ਪ੍ਰੋਫੈਸਰ ਬਲੈਗਡੇਨ ਕਹਿੰਦੇ ਹਨ ਕਿ ਜੀਐਸਕੇ-ਆਕਸਫੋਰਡ ਕੈਂਸਰ ਇਮਯੂਨੋ-ਪ੍ਰੀਵੈਂਸ਼ਨ ਪ੍ਰੋਗਰਾਮ ਕਈ ਤਕਨੀਕੀ ਤੇ ਵਿਗਿਆਨਕ ਤਰੱਕੀਆਂ 'ਤੇ ਅਧਾਰਤ ਹੈ ਜਿਨ੍ਹਾਂ ਨੇ ਪ੍ਰੀ-ਕੈਂਸਰ ਦੇ ਵਿਰੁੱਧ ਟੀਕੇ ਦੀ ਸੰਭਾਵਨਾ ਨੂੰ ਉਮੀਦ ਦਿੱਤੀ ਹੈ। ਅਸੀਂ ਖੁਸ਼ਕਿਸਮਤ ਹਾਂ ਕਿਉਂਕਿ ਸਾਡੇ ਕੋਲ ਬਹੁਤ ਸਾਰੀਆਂ ਤਕਨੀਕੀ ਸਫਲਤਾਵਾਂ ਹਨ, ਜਿਸ ਦਾ ਮਤਲਬ ਹੈ ਕਿ ਅਸੀਂ ਹੁਣ ਉਨ੍ਹਾਂ ਚੀਜ਼ਾਂ ਦਾ ਪਤਾ ਲਗਾਉਣ ਦੇ ਯੋਗ ਹਾਂ ਜੋ ਆਮ ਤੌਰ 'ਤੇ ਅਣਪਛਾਤੀਆਂ ਰਹਿੰਦੀਆਂ ਸਨ। ਹੁਣ ਤੱਕ ਅਸੀਂ ਇਹ ਪਤਾ ਲਗਾਉਣ ਦੇ ਯੋਗ ਹੋਏ ਹਾਂ ਕਿ ਸੈੱਲਾਂ ਵਿੱਚ ਕਿਹੜੀਆਂ ਵਿਸ਼ੇਸ਼ਤਾਵਾਂ ਹਨ ਜੋ ਕੈਂਸਰ ਦਾ ਕਾਰਨ ਬਣਦੀਆਂ ਹਨ। ਇਸ ਲਈ ਅਸੀਂ ਉਸ ਦਿਸ਼ਾ ਵਿੱਚ ਵਿਸ਼ੇਸ਼ ਤੌਰ 'ਤੇ ਨਿਸ਼ਾਨਾ ਬਣਾਇਆ ਗਿਆ ਇੱਕ ਟੀਕਾ ਤਿਆਰ ਕਰਕੇ ਇਸ ਨੂੰ ਰੋਕ ਸਕਦੇ ਹਾਂ।