Commonwealth Games 'ਚ ਲੁਧਿਆਣਾ ਦੇ Vikas Thakur ਨੇ ਜਿੱਤਿਆ ਚਾਂਦੀ ਦਾ ਤਗਮਾ, ਪਰਿਵਾਰ 'ਚ ਜਸ਼ਨ ਦਾ ਮਾਹੌਲ

ਲੁਧਿਆਣਾ: ਪੰਜਾਬ ਦੀ ਉਦਯੋਗਿਕ ਰਾਜਧਾਨੀ ਲੁਧਿਆਣਾ ਅਤੇ ਪੰਜਾਬ ਦਾ ਨਾਂ ਉਸ ਸਮੇਂ ਵਿਸ਼ਵ ਪੱਧਰ 'ਤੇ ਰੌਸ਼ਨ ਹੋਇਆ ਜਦੋਂ ਲੁਧਿਆਣਾ ਦੇ ਵੇਟ ਲਿਫਟਰ ਵਿਕਾਸ ਠਾਕੁਰ ਨੇ 96 ਕਿਲੋ ਵਰਗ ਦੇ ਵੇਟ ਲਿਫਟਿੰਗ ਮੁਕਾਬਲੇ 'ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਚਾਂਦੀ ਦਾ ਤਗਮਾ ਜਿੱਤਿਆ। ਜਦੋਂ ਵਿਕਾਸ ਠਾਕੁਰ ਦੇ ਮੈਡਲ ਜਿੱਤਣ ਦੀ ਖਬਰ ਉਨ੍ਹਾਂ ਦੇ ਘਰ ਲੁਧਿਆਣਾ ਪਹੁੰਚੀ ਤਾਂ ਘਰ 'ਚ ਵਿਆਹ ਦਾ ਮਾਹੌਲ ਬਣ ਗਿਆ। ਵਧਾਈਆਂ ਦੇਣ ਲਈ ਗੁਆਂਢੀਆਂ, ਦੋਸਤਾਂ ਅਤੇ ਰਿਸ਼ਤੇਦਾਰਾਂ ਦੀ ਭੀੜ ਸੀ। ਪਰਿਵਾਰ ਦੀ ਖੁਸ਼ੀ ਦੀ ਕੋਈ ਹੱਦ ਨਹੀਂ ਸੀ। ਪਿਤਾ ਨੇ ਭਾਵੁਕ ਹੁੰਦਿਆਂ ਦੱਸਿਆ ਕਿ ਵਿਕਾਸ ਨੇ ਉਸ ਨਾਲ ਵਾਅਦਾ ਕੀਤਾ ਸੀ ਕਿ ਇਸ ਵਾਰ ਮੈਡਲ ਜਿੱਤਣ ਤੋਂ ਬਾਅਦ ਉਹ ਵਿਆਹ ਕਰੇਗਾ। ਅੱਜ ਤਿਰੰਗਾ ਲਹਿਰਾਉਣ 'ਤੇ ਨਾ ਸਿਰਫ਼ ਉਨ੍ਹਾਂ ਨੂੰ ਮਾਣ ਸੀ, ਸਗੋਂ ਭਾਰਤ ਦੇ ਲੋਕਾਂ ਨੂੰ ਵੀ ਮਾਣ ਹੋ ਗਿਆ ਹੈ। ਦੱਸ ਦੇਈਏ ਕਿ ਅੱਜ ਵਿਕਾਸ ਠਾਕੁਰ ਦੀ ਮਾਂ ਆਸ਼ਾ ਠਾਕੁਰ ਦਾ ਜਨਮ ਦਿਨ ਸੀ। ਮਾਂ ਆਸ਼ਾ ਠਾਕੁਰ ਨੇ ਭਾਵੁਕ ਹੁੰਦੇ ਹੋਏ ਕਿਹਾ ਕਿ ਅੱਜ ਉਨ੍ਹਾਂ ਦੇ ਬੇਟੇ ਨੇ ਉਨ੍ਹਾਂ ਨੂੰ ਜਨਮਦਿਨ ਦਾ ਤੋਹਫਾ ਦਿੱਤਾ ਹੈ। ਵਿਕਾਸ ਜਦੋਂ ਖੇਡਾਂ 'ਚ ਭਾਰ ਚੁੱਕਦਾ ਹੈ ਤਾਂ ਉਸ ਸਮੇਂ ਉਹ ਇੱਥੇ ਰੱਬ ਅੱਗੇ ਅੱਖਾਂ ਬੰਦ ਕਰਕੇ ਪ੍ਰਾਰਥਨਾ ਕਰਦਾ ਰਹਿੰਦਾ ਹੈ ਕਿ ਉਹ ਜਿੱਤ ਦਰਜ ਕਰੇ।