ਔਰਤ ਖਾ ਗਈ ਸੀ ਡੇਢ ਕਿੱਲੋ ਸੋਨੇ ਦੇ ਗਹਿਣੇ ਤੇ ਸਿੱਕੇ, ਡਾਕਟਰਾਂ ਨੇ ਇੰਝ ਕੀਤਾ ਹੱਲ

ਹਸਪਤਾਲ ਦੇ ਸਰਜਰੀ ਵਿਭਾਗ ਦੇ ਮੁਖੀ ਸਿਧਾਰਥ ਬਿਸਵਾਸ ਨੇ ਦੱਸਿਆ ਕਿ 26 ਸਾਲਾ ਮਹਿਲਾ ਦੇ ਢਿੱਡ ’ਚੋਂ ਪੰਜ ਰੁਪਏ ਤੇ ਦਸ ਰੁਪਏ ਦੇ 90 ਸਿੱਕੇ, ਕੋਕਾ, ਵਾਲੀਆਂ, ਚੂੜੀਆਂ, ਝਾਂਜਰ, ਕੜਾ ਤੇ ਘੜੀਆਂ ਕੱਢੀਆਂ ਗਈਆਂ।

ਕੋਲਕਾਤਾ: ਪੱਛਮੀ ਬੰਗਾਲ ਤੋਂ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਦਿਮਾਗੀ ਤੌਰ ਤੋਂ ਬਿਮਾਰ ਔਰਤ ਨੇ ਡੇਢ ਕਿੱਲੋ ਤੋਂ ਵੱਧ ਵਜ਼ਨ ਦੇ ਗਹਿਣੇ ਅਤੇ ਸਿੱਕੇ ਨਿਗਲੇ ਹੋਏ ਸਨ। ਇਹ ਸਮਾਨ ਉਸ ਦੇ ਪੇਟ ਵਿੱਚ ਸੀ, ਜਿਸ ਨੂੰ ਬੀਰਭੂਮ ਜ਼ਿਲ੍ਹੇ ਦੇ ਸਰਕਾਰੀ ਹਸਪਤਾਲ ਦੇ ਡਾਕਟਰਾਂ ਨੇ ਬਾਹਰ ਕੱਢ ਦਿੱਤਾ ਹੈ। ਰਾਮਪੁਰਹਾਟ ਦੇ ਸਰਕਾਰੀ ਮੈਡੀਕਲ ਕਾਲਜ ਅਤੇ ਹਸਪਤਾਲ ਦੇ ਸਰਜਰੀ ਵਿਭਾਗ ਦੇ ਮੁਖੀ ਸਿਧਾਰਥ ਬਿਸਵਾਸ ਨੇ ਦੱਸਿਆ ਕਿ 26 ਸਾਲਾ ਮਹਿਲਾ ਦੇ ਢਿੱਡ ’ਚੋਂ ਪੰਜ ਰੁਪਏ ਤੇ ਦਸ ਰੁਪਏ ਦੇ 90 ਸਿੱਕੇ, ਕੋਕਾ, ਵਾਲੀਆਂ, ਚੂੜੀਆਂ, ਝਾਂਜਰ, ਕੜਾ ਤੇ ਘੜੀਆਂ ਕੱਢੀਆਂ ਗਈਆਂ। ਬਿਸਵਾਸ ਨੇ ਸਰਜਰੀ ਤੋਂ ਬਾਅਦ ਕਿਹਾ ਕਿ ਗਹਿਣੇ ਜ਼ਿਆਦਾਤਰ ਪਿੱਤਲ ਤੇ ਤਾਂਬੇ ਦੇ ਸੀ ਪਰ ਇਨ੍ਹਾਂ ’ਚੋਂ ਕੁਝ ਕੁ ਗਹਿਣੇ ਸੋਨੇ ਦੇ ਵੀ ਸੀ। ਔਰਤ ਦੀ ਮਾਂ ਨੇ ਦੱਸਿਆ ਕਿ ਉਸ ਨੂੰ ਲੱਗ ਰਿਹਾ ਸੀ ਕਿ ਮਾਰਗ੍ਰਾਮ ਪਿੰਡ ’ਚ ਉਸ ਦੇ ਘਰੋਂ ਗਹਿਣੇ ਗਾਇਬ ਹੋ ਰਹੇ ਹਨ ਪਰ ਜਦੋਂ ਵੀ ਪਰਿਵਾਰਕ ਮੈਂਬਰ ਲੜਕੀ ਤੋਂ ਪੁੱਛਗਿੱਛ ਕਰਦੇ ਤਾਂ ਉਹ ਰੋਣ ਲੱਗ ਜਾਂਦੀ ਸੀ। ਉਸ ਦੀ ਮਾਂ ਨੇ ਕਿਹਾ ਕਿ ਉਸ ਦੀ ਲੜਕੀ ਦਿਮਾਗੀ ਰੂਪ ਤੋਂ ਬਿਮਾਰ ਹੈ ਤੇ ਉਹ ਹਰ ਵਾਰ ਰੋਟੀ ਖਾਣ ਤੋਂ ਬਾਅਦ ਉਲਟੀ ਕਰ ਰਹੀ ਸੀ। ਉਸ ਨੇ ਦੱਸਿਆ ਕਿ ਉਸ ਦੀ ਲੜਕੀ ਆਪਣੇ ਭਰਾ ਦੀ ਦੁਕਾਨ ਤੋਂ ਸਿੱਕੇ ਲੈ ਕੇ ਆਈ ਸੀ ਤੇ ਕਿਸੇ ਤਰ੍ਹਾਂ ਉਹ ਸਿੱਕਿਆ ਨੂੰ ਨਿਗਲ ਗਈ। ਉਸ ਨੇ ਦੱਸਿਆ ਕਿ ਉਹ ਦੋ ਮਹੀਨਿਆਂ ਤੋਂ ਬਿਮਾਰ ਸੀ, ਉਸ ਨੂੰ ਕਈ ਪ੍ਰਾਈਵੇਟ ਡਾਕਟਰਾਂ ਨੂੰ ਵੀ ਦਿਖਾਇਆ ਗਿਆ ਪਰ ਉਸ ਦੀ ਸਿਹਤ ’ਚ ਖਾਸ ਫਰਕ ਨਾ ਪਿਆ। ਬਾਅਦ ਵਿਚ ਹੁਣ ਉਸ ਨੂੰ ਸਰਕਾਰੀ ਹਸਪਤਾਲ ਵਿਚ ਲਿਆਂਦਾ ਗਿਆ, ਜਿਥੇ ਡਾਕਟਰਾਂ ਨੇ ਉਸ ਦੀ ਇਕ ਹਫ਼ਤੇ ਤੱਕ ਜਾਂਚ ਕਰਨ ਤੋਂ ਬਾਅਦ ਆਪ੍ਰੇਸ਼ਨ ਕੀਤਾ।