ਛੂਹਣ ਦੇ ਅਹਿਸਾਸ ਕਰਨ ਵਾਲਾ ਰੋਬੋਟਿਕ ਸਰਜਨ ਵੀ ਆ ਗਿਆ

ਮੈਲਬਰਨ:  ਖੋਜਕਾਰਾਂ ਨੇ ਦੁਨੀਆ ਦਾ ਪਹਿਲਾ ਉਹ ਰੋਬੋਟਿਕ ਸਰਜੀਕਲ ਸਿਸਟਮ ਤਿਆਰ ਕੀਤਾ ਹੈ, ਜੋ ਛੂਹਣ ਵਰਗਾ ਅਹਿਸਾਸ ਕਰਾਏਗਾ। ਕੰਪਿਊਟਰ ਰਾਹੀਂ ਕੀਹੋਲ ਸਰਜਰੀ ਕਰਨ ਵਾਲੇ ਸਰਜਨਾਂ ਨੂੰ ਇਸ ਤਰ੍ਹਾਂ ਦਾ ਅਹਿਸਾਸ ਹੋਵੇਗਾ। ਖੋਜਕਾਰਾਂ ਵਿੱਚ ਇੱਕ ਭਾਰਤ ਵੰਸ਼ੀ ਵੀ ਸ਼ਾਮਲ ਹੈ। ਸਰਜਰੀ ਦੀ ਮੌਜੂਦਾ ਤਕਨੀਕ ਲਈ ਹੀਰੋਸਰਗ ਰੋਬੋਟ ਇੱਕ ਵੱਡੀ ਪ੍ਰਾਪਤੀ ਹੈ। ਹੁਣ ਤੱਕ ਰੋਬੋਟਿਕ ਸਰਜਰੀ ਵਿੱਚ ਦੇਖਣ ਦਾ ਹੀ ਅਹਿਸਾਸ ਹੁੰਦਾ ਹੈ। ਨਵੀਂ ਤਕਨੀਕ ਨਾਲ ਲੈਪ੍ਰੋਸਕੋਪਿਕ ਜਾਂ ਕੀਹੋਲ ਮਾਈਕਰੋ ਸਰਜਰੀ ਪਹਿਲੇ ਦੇ ਮੁਕਾਬਲੇ ਵਿੱਚ ਸੁਰੱਖਿਅਤ ਅਤੇ ਜ਼ਿਆਦਾ ਸਹੀ ਹੋਵੇਗੀ। ਇਸ ਨਾਲ ਦਰਦ ਘੱਟ ਹੋਵੇਗਾ ਅਤੇ ਖੂਨ ਦੇ ਨੁਕਸਾਨ ਅਤੇ ਇਨਫੈਕਸ਼ਨ ਦਾ ਖਤਰਾ ਵੀ ਘੱਟ ਹੋਵੇਗਾ। ਹੀਰੋਸਰਗ ਦਾ ਵਿਕਾਸ ਆਸਟਰੇਲੀਆ ਦੇ ਡਿਕਿਨ ਯੂਨੀਵਰਸਿਟੀ ਤੇ ਅਮਰੀਕਾ ਦੇ ਹਾਵਰਡ ਯੂਨੀਵਰਸਿਟੀ ਦੇ ਇੰਜੀਨੀਅਰਾਂ ਨੇ ਰਾਇਲ ਐਡੀਲੇਡ ਹਸਪਤਾਲ ਦੇ ਸੁਰੇਨ ਕ੍ਰਿਸ਼ਨਨ ਦੇ ਨਾਲ ਮਿਲ ਕੇ ਕੀਤਾ ਹੈ। ਕ੍ਰਿਸ਼ਨਨ ਇਸ ਵੇਲੇ ਇੰਸਟੀਚਿਊਟ ਫਾਰ ਇੰਟੈਲੀਜੈਂਸ ਸਿਸਟਮਜ਼ ਰਿਸਰਚ ਐਂਡ ਇਨੋਵੇਸ਼ਨ (ਆਈ ਆਈ ਐੱਸ ਆਰ ਆਈ) ਵਿੱਚ ਪ੍ਰੋਫੈਸਰ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਹੀਰੋਸਰਗ ਵਿੱਚ ਛੂਹਣ ਦਾ ਅਹਿਸਾਸ ਕਰਾਉਣ ਦੀ ਖਾਸੀਅਤ ਹੈਂਪਟਿਕ ਫੀਡਬੈਕ ਤਕਨੀਕ ਦੇ ਜ਼ਰੀਏ ਹਾਸਲ ਕਰਵਾਈ ਗਈ। ਇਸ ਨਾਲ ਮਰੀਜ਼ ਦੇ ਲਈ ਬਿਹਤਰ ਨਤੀਜੇ ਨਿਕਲਣਗੇ। ਕ੍ਰਿਸ਼ਨਨ ਨੇ ਕਿਹਾ ਕਿ ਮੌਜੂਦਾ ਸਿਸਟਮ ਵਿੱਚ ਸਭ ਤੋਂ ਵੱਡੀ ਕਮੀ ਛੂਹਣ ਦੇ ਅਹਿਸਾਸ ਦੀ ਘਾਟ ਹੈ। ਛੂਹਣ ਵਰਗੇ ਅਹਿਸਾਸ ਨਾਲ ਸਰਜਨ ਨੂੰ ਟਿਸ਼ੂ (ਉਤਕਾਂ) ਵਿੱਚ ਭੇਦ ਕਰਨ ਤੇ ਇਨਫੈਕਸ਼ਨ ਨਾਲ ਕਮਜ਼ੋਰ ਹੋਏ ਟਿਸ਼ੂ ਦੀ ਪਛਾਣ ਵਿੱਚ ਮਦਦ ਮਿਲਦੀ ਹੈ। ਕੈਂਸਰ ਵਾਲੇ ਟਿਸ਼ੂ ਅਤੇ ਨਾਰਮਲ ਟਿਸ਼ੂ ਵਿੱਚ ਭੇਦ ਕਰਨਾ ਆਸਾਨ ਹੋਵੇਗਾ। ਉਨ੍ਹਾਂ ਨੇ ਕਿਹਾ ਕਿ ਛੂਹਣ ਵਰਗੇ ਅਹਿਸਾਸ ਵਾਲੀ ਤਕਨੀਕ ਨਾਲ ਅਸੀਂ ਮਾਈਕ੍ਰੋਸਰਜਰੀ ਵਿੱਚ ਬਿਹਤਰੀਨ ਟਾਂਕੇ ਦਾ ਇਸਤੇਮਾਲ ਕਰ ਸਕਾਂਗੇ। ਹੀਰੋਸਰਗ ਦੀ ਖਾਸੀਅਤ ਵਿੱਚ ਹਾਈ ਰਿਜਿਊਲੇਸ਼ਨ 3ਡੀ ਇਮੇਜ਼ ਵੀ ਸ਼ਾਮਲ ਹੈ। ਇਸ ਨੂੰ ਸਰਜਨ ਆਪਰੇਸ਼ਨ ਥੀਏਟਰ ਤੋਂ ਹਜ਼ਾਰਾਂ ਕਿਲੋਮੀਟਰ ਦੂਰ ਬੈਠ ਕੇ ਵੀ ਇਸਤੇਮਾਲ ਕਰ ਸਕਦੇ ਹਨ।