Blinkit ਤੋਂ ਲੈ ਕੇ Zepto ਤੱਕ, 10 ਮਿੰਟ 'ਚ ਡਿਲਿਵਰੀ ਕਰਨ ਵਾਲਿਆਂ ਦੀ ਖੁੱਲ੍ਹ ਰਹੀ ਪੋਲ
Blinkit -Zepto News : ਸਵੇਰੇ ਦੁੱਧ ਚਾਹੀਦਾ ਹੋਵੇ, ਅਚਾਨਕ ਮਹਿਮਾਨ ਆ ਜਾਣ ਤਾਂ ਸਨੈਕਸ ਚਾਹੀਦੇ ਹੋਣ ਜਾਂ ਘਰ ਵਿੱਚ ਕੋਈ ਜ਼ਰੂਰੀ ਸਮਾਨ ਖ਼ਤਮ ਹੋ ਗਿਆ ਹੋਵੇ—ਅਜਿਹੇ ਸਮੇਂ ਵਿੱਚ ਬਲਿੰਕਿਟ, ਜ਼ੈਪਟੋ ਅਤੇ ਸਵਿਗੀ ਇੰਸਟਾਮਾਰਟ ਵਰਗੇ ਕਵਿਕ
Blinkit -Zepto News : ਸਵੇਰੇ ਦੁੱਧ ਚਾਹੀਦਾ ਹੋਵੇ, ਅਚਾਨਕ ਮਹਿਮਾਨ ਆ ਜਾਣ ਤਾਂ ਸਨੈਕਸ ਚਾਹੀਦੇ ਹੋਣ ਜਾਂ ਘਰ ਵਿੱਚ ਕੋਈ ਜ਼ਰੂਰੀ ਸਮਾਨ ਖ਼ਤਮ ਹੋ ਗਿਆ ਹੋਵੇ—ਅਜਿਹੇ ਸਮੇਂ ਵਿੱਚ ਬਲਿੰਕਿਟ, ਜ਼ੈਪਟੋ ਅਤੇ ਸਵਿਗੀ ਇੰਸਟਾਮਾਰਟ ਵਰਗੇ ਕਵਿਕ ਕਾਮਰਸ ਪਲੇਟਫਾਰਮ ਲੋਕਾਂ ਲਈ ਸੁਪਰਮੈਨ ਦਾ ਕੰਮ ਕਰਦੇ ਹਨ। ਕੁਝ ਸਾਲ ਪਹਿਲਾਂ ਜਿੱਥੇ ਸਮਾਨ ਪਹੁੰਚਣ ਵਿੱਚ ਘੰਟਿਆਂ ਜਾਂ ਅਗਲੇ ਦਿਨ ਤੱਕ ਇੰਤਜ਼ਾਰ ਕਰਨਾ ਪੈਂਦਾ ਸੀ, ਉੱਥੇ ਹੁਣ ਕੁਝ ਹੀ ਮਿੰਟਾਂ ਵਿੱਚ ਸਮਾਨ ਘਰ ਪਹੁੰਚ ਜਾਂਦਾ ਹੈ।
ਪਰ ਇਸ ਤੇਜ਼ੀ ਦੇ ਪਿੱਛੇ ਦੀ ਪੂਰੀ ਤਸਵੀਰ ਹੁਣ ਸਾਹਮਣੇ ਆਉਣ ਲੱਗੀ ਹੈ। ਡਿਲਿਵਰੀ ਪਾਰਟਨਰਾਂ ਦੀ ਸੁਰੱਖਿਆ ਤੋਂ ਲੈ ਕੇ ਡਾਰਕ ਸਟੋਰਾਂ ਵਿੱਚ ਰੱਖੇ ਸਮਾਨ ਦੀ ਸਫ਼ਾਈ ਅਤੇ ਹਾਈਜੀਨ ਤੱਕ, ਕਵਿਕ ਕਾਮਰਸ ਕੰਪਨੀਆਂ ’ਤੇ ਲਗਾਤਾਰ ਸਵਾਲ ਉੱਠ ਰਹੇ ਹਨ। ਖ਼ਾਸ ਕਰਕੇ ਹਾਲ ਹੀ ਦੇ ਦਿਨਾਂ ਵਿੱਚ ਬਲਿੰਕਿਟ ਅਤੇ ਜ਼ੈਪਟੋ ਦੇ ਵੇਅਰਹਾਊਸਾਂ ’ਤੇ ਹੋਈ ਕਾਰਵਾਈ ਨੇ ਇੱਕ ਵਾਰ ਫਿਰ ਇਸ ਬਿਜ਼ਨਸ ਮਾਡਲ ’ਤੇ ਚਰਚਾ ਤੇਜ਼ ਕਰ ਦਿੱਤੀ ਹੈ।
ਸਰਕਾਰ ਨੇ ਕਿਉਂ ਲਗਾਈ ਰੋਕ?
ਕਵਿਕ ਕਾਮਰਸ ਕੰਪਨੀਆਂ ਦਾ ਸਭ ਤੋਂ ਵੱਡਾ ਯੂਐਸਪੀ ਉਨ੍ਹਾਂ ਦੀ ਸਪੀਡ ਹੀ ਸੀ। ਬਲਿੰਕਿਟ, ਜ਼ੈਪਟੋ ਅਤੇ ਸਵਿਗੀ ਇੰਸਟਾਮਾਰਟ ਵਰਗੇ ਪਲੇਟਫਾਰਮ ਲੰਬੇ ਸਮੇਂ ਤੱਕ 10 ਮਿੰਟ ਵਿੱਚ ਸਮਾਨ ਪਹੁੰਚਾਉਣ ਨੂੰ ਆਪਣੇ ਬਿਜ਼ਨਸ ਅਤੇ ਮਾਰਕੀਟਿੰਗ ਦਾ ਹਿੱਸਾ ਬਣਾਉਂਦੇ ਰਹੇ ਪਰ ਜਨਵਰੀ 2026 ਵਿੱਚ ਕੇਂਦਰ ਸਰਕਾਰ ਨੇ ਕੰਪਨੀਆਂ ਨੂੰ 10 ਮਿੰਟ ਦੀ ਡਿਲਿਵਰੀ ਦੇ ਦਾਅਵੇ ਨੂੰ ਪ੍ਰਮੋਟ ਨਾ ਕਰਨ ਲਈ ਕਿਹਾ। ਇਸ ਦੇ ਪਿੱਛੇ ਸਭ ਤੋਂ ਵੱਡੀ ਚਿੰਤਾ ਡਿਲਿਵਰੀ ਰਾਈਡਰਾਂ ਦੀ ਸੁਰੱਖਿਆ ਨੂੰ ਲੈ ਕੇ ਸੀ। ਇੰਨੇ ਘੱਟ ਸਮੇਂ ਵਿੱਚ ਆਰਡਰ ਪਹੁੰਚਾਉਣ ਦੇ ਦਬਾਅ ਕਾਰਨ ਰਾਈਡਰ ਤੇਜ਼ ਰਫ਼ਤਾਰ ਨਾਲ ਗੱਡੀ ਚਲਾ ਸਕਦੇ ਹਨ। ਇਸ ਤੋਂ ਬਾਅਦ ਬਲਿੰਕਿਟ, ਜ਼ੈਪਟੋ ਅਤੇ ਹੋਰ ਪਲੇਟਫਾਰਮਾਂ ਨੇ ਆਪਣੀ ਬ੍ਰਾਂਡਿੰਗ ਤੋਂ 10 ਮਿੰਟ ਵਾਲੀ ਲਾਈਨ ਹਟਾਉਣੀ ਸ਼ੁਰੂ ਕਰ ਦਿੱਤੀ।
ਸਪੀਡ ਤੋਂ ਲੈ ਕੇ ਕਮਾਈ ਤੱਕ ਸਵਾਲ
10 ਮਿੰਟ ਦੀ ਡਿਲਿਵਰੀ ਦੇ ਮਾਡਲ ਵਿੱਚ ਸਾਨੂੰ ਸਿਰਫ਼ ਤੇਜ਼ੀ ਦਿਖਾਈ ਦਿੰਦੀ ਹੈ ਪਰ ਇਸ ਦੇ ਪਿੱਛੇ ਡਿਲਿਵਰੀ ਪਾਰਟਨਰ ’ਤੇ ਪੈਣ ਵਾਲਾ ਦਬਾਅ ਨਜ਼ਰ ਨਹੀਂ ਆਉਂਦਾ। ਜੇਕਰ ਕਿਸੇ ਰਾਈਡਰ ਨੂੰ ਆਰਡਰ ਲੈਣ, ਸਟੋਰ ਤੋਂ ਸਮਾਨ ਚੁੱਕਣ ਅਤੇ ਟ੍ਰੈਫਿਕ ਵਿਚਕਾਰ ਗਾਹਕ ਤੱਕ ਪਹੁੰਚਣ ਲਈ ਬਹੁਤ ਘੱਟ ਸਮਾਂ ਮਿਲੇ ਤਾਂ ਉਹ ਹਰ ਮਿੰਟ ਜਲਦਬਾਜ਼ੀ ਵਿੱਚ ਰਹਿੰਦਾ ਹੈ। ਇਸੇ ਕਾਰਨ ਕਵਿਕ ਕਾਮਰਸ ਸੈਕਟਰ ਵਿੱਚ ਰਾਈਡਰਾਂ ਦੀ ਸੁਰੱਖਿਆ ਨੂੰ ਲੈ ਕੇ ਸਵਾਲ ਉੱਠਦੇ ਰਹੇ ਹਨ। ਗਿਗ ਵਰਕਰਾਂ ਦੀਆਂ ਜਥੇਬੰਦੀਆਂ ਨੇ ਵੀ ਕਿਹਾ ਹੈ ਕਿ ਅਜਿਹੇ ਟਾਈਮ-ਬਾਊਂਡ ਡਿਲਿਵਰੀ ਮਾਡਲ ਨਾਲ ਸੜਕ ’ਤੇ ਜਲਦਬਾਜ਼ੀ ਅਤੇ ਕੰਮ ਦੇ ਦਬਾਅ ਦਾ ਖ਼ਤਰਾ ਵੱਧ ਜਾਂਦਾ ਹੈ।
ਹਾਈਜੀਨ ’ਤੇ ਵੀ ਸਵਾਲ
ਕਵਿਕ ਕਾਮਰਸ ਕੰਪਨੀਆਂ ਕੋਲ ਡਾਰਕ ਸਟੋਰ ਮਾਡਲ ਹੁੰਦਾ ਹੈ। ਇੱਥੇ ਆਨਲਾਈਨ ਆਰਡਰ ਲਈ ਸਮਾਨ ਸਟੋਰ ਅਤੇ ਪੈਕ ਕੀਤਾ ਜਾਂਦਾ ਹੈ। ਗਾਹਕ ਇੱਥੇ ਖਰੀਦਦਾਰੀ ਕਰਨ ਨਹੀਂ ਆਉਂਦਾ, ਪਰ ਉਸ ਦੇ ਘਰ ਪਹੁੰਚਣ ਵਾਲਾ ਸਮਾਨ ਇੱਥੋਂ ਹੀ ਨਿਕਲਦਾ ਹੈ। ਹੁਣ ਇੱਥੇ ਖੁਰਾਕ ਸੁਰੱਖਿਆ ਨੂੰ ਲੈ ਕੇ ਵੀ ਗੰਭੀਰ ਸਵਾਲ ਸਾਹਮਣੇ ਆਏ ਹਨ। ਹਾਲ ਹੀ ਵਿੱਚ ਮਹਾਰਾਸ਼ਟਰ ਐੱਫਡੀਏ ਨੇ ਮੁੰਬਈ ਦੇ ਮਲਾਡ ਵੈਸਟ ਸਥਿਤ ਬਲਿੰਕ ਕਾਮਰਸ, ਯਾਨੀ ਬਲਿੰਕਿਟ ਦੇ ਡਾਰਕ ਸਟੋਰ ਦਾ ਫੂਡ ਲਾਇਸੈਂਸ ਮੁਅੱਤਲ ਕਰ ਦਿੱਤਾ। ਮੀਡੀਆ ਰਿਪੋਰਟਾਂ ਮੁਤਾਬਕ ਜਾਂਚ ਦੌਰਾਨ ਉੱਥੇ ਫਲਾਂ ਅਤੇ ਸਬਜ਼ੀਆਂ ਦੇ ਆਲੇ-ਦੁਆਲੇ ਕਾਕਰੋਚ ਅਤੇ ਗੰਦਗੀ ਮਿਲੀ।
ਜ਼ੈਪਟੋ ਦੇ ਵੇਅਰਹਾਊਸ ਵਿੱਚ ਕੀ ਮਿਲਿਆ?
ਸਿਰਫ਼ ਬਲਿੰਕਿਟ ਹੀ ਨਹੀਂ, ਜ਼ੈਪਟੋ ਦੇ ਇੱਕ ਵੇਅਰਹਾਊਸ ’ਤੇ ਵੀ ਕਾਰਵਾਈ ਹੋਈ ਹੈ। ਬੈਂਗਲੁਰੂ ਦੇ ਹੋਸਕੋਟੇ ਤਾਲੁਕ ਵਿੱਚ ਜ਼ੈਪਟੋ ਨਾਲ ਜੁੜੇ ਇੱਕ ਵੇਅਰਹਾਊਸ ਨੂੰ ਫੂਡ ਸੇਫਟੀ ਐਂਡ ਡਰੱਗ ਐਡਮਿਨਿਸਟ੍ਰੇਸ਼ਨ ਵਿਭਾਗ ਨੇ ਸੀਲ ਕਰ ਦਿੱਤਾ ਹੈ। ਜਾਂਚ ਵਿੱਚ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਦੀ ਸਟੋਰੇਜ ਅਤੇ ਹੈਂਡਲਿੰਗ ਨਾਲ ਜੁੜੀਆਂ ਕਈ ਕਮੀਆਂ ਸਾਹਮਣੇ ਆਈਆਂ ਹਨ।
ਸਮਾਨ ਦੀ ਸੁਰੱਖਿਆ ਹੈ ਜ਼ਰੂਰੀ
ਕਵਿਕ ਕਾਮਰਸ ਦਾ ਪੂਰਾ ਮਾਡਲ ਸਹੂਲਤ ਅਤੇ ਸਪੀਡ ’ਤੇ ਆਧਾਰਿਤ ਹੈ। ਪਰ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਦੇ ਮਾਮਲੇ ਵਿੱਚ ਸਿਰਫ਼ ਤੇਜ਼ੀ ਕਾਫ਼ੀ ਨਹੀਂ ਹੈ। ਮੰਨ ਲਓ ਦੁੱਧ, ਫਲ, ਸਬਜ਼ੀਆਂ, ਬ੍ਰੈੱਡ ਜਾਂ ਕੋਈ ਪੈਕਡ ਫੂਡ ਕੁਝ ਮਿੰਟਾਂ ਵਿੱਚ ਘਰ ਪਹੁੰਚ ਗਿਆ, ਪਰ ਉਸ ਦੀ ਸਟੋਰੇਜ ਸਹੀ ਤਰੀਕੇ ਨਾਲ ਨਹੀਂ ਹੋਈ ਸੀ। ਅਜਿਹੇ ਵਿੱਚ ਗਾਹਕ ਲਈ 10 ਜਾਂ 15 ਮਿੰਟ ਦੀ ਡਿਲਿਵਰੀ ਦਾ ਕੋਈ ਫਾਇਦਾ ਨਹੀਂ ਰਹਿ ਜਾਂਦਾ।
ਗਿਗ ਵਰਕਰਾਂ ’ਤੇ ਵੀ ਧਿਆਨ
ਕਵਿਕ ਕਾਮਰਸ ਸੈਕਟਰ ਦੀ ਕਹਾਣੀ ਸਿਰਫ਼ ਡਿਲਿਵਰੀ ਟਾਈਮ ਅਤੇ ਸਮਾਨ ਤੱਕ ਸੀਮਿਤ ਨਹੀਂ ਹੈ। ਇਸ ਦੇ ਪਿੱਛੇ ਵੱਡੀ ਗਿਣਤੀ ਵਿੱਚ ਗਿਗ ਵਰਕਰ ਕੰਮ ਕਰਦੇ ਹਨ। ਸਰਕਾਰ ਨੇ 2026 ਵਿੱਚ ਬਲਿੰਕਿਟ, ਜ਼ੈਪਟੋ, ਸਵਿਗੀ ਇੰਸਟਾਮਾਰਟ, ਜ਼ੋਮੈਟੋ, ਉਬਰ, ਓਲਾ ਅਤੇ ਰੈਪਿਡੋ ਵਰਗੇ ਪਲੇਟਫਾਰਮਾਂ ਨੂੰ ਆਪਣੇ ਗਿਗ ਵਰਕਰਾਂ ਨੂੰ ਈ-ਸ਼੍ਰਮ ਪੋਰਟਲ ’ਤੇ ਰਜਿਸਟਰ ਕਰਨ ਅਤੇ ਉਨ੍ਹਾਂ ਲਈ ਸੋਸ਼ਲ ਸਕਿਊਰਿਟੀ ਦਾ ਦਾਇਰਾ ਵਧਾਉਣ ਦੀ ਦਿਸ਼ਾ ਵਿੱਚ ਕਦਮ ਚੁੱਕਣ ਲਈ ਕਿਹਾ ਹੈ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
