ਹਾਏ ਰੱਬਾ ! 10 ਘੰਟਿਆਂ ਚ ਲੱਗਣ ਵਾਲੀ ਡ੍ਰਿੱਪ 15 ਮਿੰਟਾਂ ਵਿੱਚ ਲਾਈ, ਮਰੀਜ਼ ਦੀ ਹੋਈ ਮੌਤ, ਸਟਾਫ ਨਰਸਾਂ ਤੇ ਇੱਕ ਵਾਰਡ ਬੁਆਏ ਮੁਅੱਤਲ

ਘਟਨਾ ਸਮੇਂ ਡਿਊਟੀ 'ਤੇ ਮੌਜੂਦ ਨਰਸਾਂ ਸੰਗੀਤਾ ਪਾਲ ਅਤੇ ਸੁਮਨ ਪਾਲ ਦੀਆਂ ਸੇਵਾਵਾਂ ਜਾਂਚ ਪੂਰੀ ਹੋਣ ਤੱਕ ਮੁਅੱਤਲ ਕਰ ਦਿੱਤੀਆਂ ਗਈਆਂ ਹਨ। ਨਾਲ ਹੀ ਸਬੰਧਤ ਵਾਰਡ ਬੁਆਏ ਨੂੰ ਤੁਰੰਤ ਡਿਊਟੀ ਤੋਂ ਹਟਾ ਦਿੱਤਾ ਗਿਆ ਹੈ। 

Medical

Source : Abp Live

Viral News: ਰਾਜਰਿਸ਼ੀ ਦਸ਼ਰਥ ਮੈਡੀਕਲ ਕਾਲਜ ਵਿੱਚ ਇਲਾਜ ਵਿੱਚ ਲਾਪਰਵਾਹੀ ਦੇ ਦੋਸ਼ ਵਿੱਚ ਦੋ ਸਟਾਫ ਨਰਸਾਂ ਤੇ ਇੱਕ ਵਾਰਡ ਬੁਆਏ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ 'ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ 10 ਘੰਟਿਆਂ ਵਿੱਚ ਦਿੱਤੀ ਜਾਣ ਵਾਲੀ ਡ੍ਰਿੱਪ ਸਿਰਫ਼ 15 ਮਿੰਟਾਂ ਵਿੱਚ ਦਿੱਤੀ, ਜਿਸ ਕਾਰਨ ਮਰੀਜ਼ ਦੀ ਹਾਲਤ ਵਿਗੜ ਗਈ ਅਤੇ ਉਸਦੀ ਮੌਤ ਹੋ ਗਈ।

ਮੈਡੀਕਲ ਕਾਲਜ ਦੇ ਪ੍ਰਿੰਸੀਪਲ ਡਾ. ਸੱਤਿਆਜੀਤ ਵਰਮਾ ਨੇ ਕਿਹਾ ਕਿ ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ, CMS ਡਾ. ਅਰਵਿੰਦ ਸਿੰਘ ਦੀ ਪ੍ਰਧਾਨਗੀ ਹੇਠ ਇੱਕ ਉੱਚ ਪੱਧਰੀ ਜਾਂਚ ਕਮੇਟੀ ਬਣਾਈ ਗਈ ਹੈ। ਕਮੇਟੀ 48 ਘੰਟਿਆਂ ਵਿੱਚ ਆਪਣੀ ਰਿਪੋਰਟ ਪੇਸ਼ ਕਰੇਗੀ।

ਦੂਜੇ ਪਾਸੇ, ਮ੍ਰਿਤਕ ਦੇ ਪਰਿਵਾਰਕ ਮੈਂਬਰਾਂ ਦਾ ਦੋਸ਼ ਹੈ ਕਿ ਬੀਕਾਪੁਰ ਇਲਾਕੇ ਦੇ ਰਾਜੌਰਾ ਪਿੰਡ ਦੇ ਰਹਿਣ ਵਾਲੇ ਨਰਿੰਦਰ ਬਹਾਦਰ ਸਿੰਘ ਨੂੰ ਜਦੋਂ ਮੈਡੀਕਲ ਕਾਲਜ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਸੀ ਤਾਂ ਉਹ ਪੂਰੀ ਤਰ੍ਹਾਂ ਠੀਕ ਹਾਲਤ ਵਿੱਚ ਸੀ। ਗੋਂਡਾ ਵਿੱਚ ਤਾਇਨਾਤ ਉਸਦੀ ਨਰਸ ਧੀ ਮੀਨਾਕਸ਼ੀ ਸਿੰਘ ਨੇ ਦੱਸਿਆ ਕਿ ਉਸਦੇ ਪਿਤਾ ਨੂੰ 10 ਘੰਟੇ ਲਈ ਦਿੱਤੀ ਜਾਣ ਵਾਲੀ ਡ੍ਰਿੱਪ ਸਿਰਫ਼ 15 ਮਿੰਟਾਂ ਵਿੱਚ ਦਿੱਤੀ ਗਈ, ਜਿਸ ਕਾਰਨ ਉਸਦੀ ਸਿਹਤ ਅਚਾਨਕ ਵਿਗੜ ਗਈ।

ਇਸ ਦੌਰਾਨ ਨਰਿੰਦਰ ਦੇ ਪੁੱਤਰ ਨੇ ਕਈ ਵਾਰ ਹਸਪਤਾਲ ਦੇ ਡਾਕਟਰਾਂ ਅਤੇ ਪੈਰਾ ਮੈਡੀਕਲ ਸਟਾਫ ਤੋਂ ਮਦਦ ਦੀ ਗੁਹਾਰ ਲਗਾਈ ਪਰ ਕੋਈ ਵੀ ਸਮੇਂ ਸਿਰ ਨਹੀਂ ਪਹੁੰਚਿਆ। ਅੰਤ ਵਿੱਚ ਇਲਾਜ ਦੀ ਘਾਟ ਕਾਰਨ ਮਰੀਜ਼ ਦੀ ਮੌਤ ਹੋ ਗਈ। ਘਟਨਾ ਤੋਂ ਬਾਅਦ ਪਰਿਵਾਰਕ ਮੈਂਬਰਾਂ ਤੇ ਸਥਾਨਕ ਲੋਕਾਂ ਵਿੱਚ ਡੂੰਘਾ ਗੁੱਸਾ ਦੇਖਣ ਨੂੰ ਮਿਲਿਆ। ਭੀੜ ਇਕੱਠੀ ਹੁੰਦੀ ਦੇਖ ਪ੍ਰਿੰਸੀਪਲ ਡਾ. ਵਰਮਾ ਨੂੰ ਮੌਕੇ 'ਤੇ ਪਹੁੰਚ ਕੇ ਸਥਿਤੀ ਨੂੰ ਕਾਬੂ ਕਰਨਾ ਪਿਆ। ਨਰਿੰਦਰ ਦਾ ਪੋਸਟਮਾਰਟਮ ਸ਼ਨੀਵਾਰ ਨੂੰ ਕੀਤਾ ਗਿਆ।

ਘਟਨਾ ਸਮੇਂ ਡਿਊਟੀ 'ਤੇ ਮੌਜੂਦ ਨਰਸਾਂ ਸੰਗੀਤਾ ਪਾਲ ਅਤੇ ਸੁਮਨ ਪਾਲ ਦੀਆਂ ਸੇਵਾਵਾਂ ਜਾਂਚ ਪੂਰੀ ਹੋਣ ਤੱਕ ਮੁਅੱਤਲ ਕਰ ਦਿੱਤੀਆਂ ਗਈਆਂ ਹਨ। ਨਾਲ ਹੀ ਸਬੰਧਤ ਵਾਰਡ ਬੁਆਏ ਨੂੰ ਤੁਰੰਤ ਡਿਊਟੀ ਤੋਂ ਹਟਾ ਦਿੱਤਾ ਗਿਆ ਹੈ। 

ਮੈਡੀਕਲ ਕਾਲਜ ਦੇ ਪ੍ਰਿੰਸੀਪਲ ਡਾ. ਸੱਤਿਆਜੀਤ ਵਰਮਾ ਨੇ ਕਿਹਾ ਕਿ ਪਹਿਲੀ ਨਜ਼ਰੇ ਲਾਪਰਵਾਹੀ ਦੇ ਆਧਾਰ 'ਤੇ ਵਾਰਡ ਬੁਆਏ ਅਖਿਲੇਸ਼ ਅਤੇ ਸਬੰਧਤ ਸਟਾਫ ਨਰਸ ਨੂੰ ਤੁਰੰਤ ਪ੍ਰਭਾਵ ਨਾਲ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਮਾਮਲੇ ਵਿੱਚ ਦੋਸ਼ੀ ਪਾਏ ਜਾਣ ਵਾਲੇ ਕਿਸੇ ਵੀ ਹੋਰ ਵਿਅਕਤੀ ਵਿਰੁੱਧ ਵੀ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।