ਅੰਮ੍ਰਿਤਸਰ 'ਚ ਦਿਨ ਦਿਹਾੜੇ ਨੌਜਵਾਨ ਨੂੰ ਮਾਰੀ ਗੋਲੀ, ਪੇਟ ਤੋਂ ਆਰ-ਪਾਰ ਹੋਣ ਤੋਂ ਬਾਅਦ ਗੋਲੀ ਔਰਤ ਨੂੰ ਜਾ ਵੱਜੀ; CCTV 'ਚ ਕੈਦ ਹੋਇਆ ਪੂਰਾ ਹਾਦਸਾ
ਅੰਮ੍ਰਿਤਸਰ ਤੋਂ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਚਿੱਟੇ ਹੀ ਦਿਨ ਇੱਕ ਬਦਮਾਸ਼ ਵੱਲੋਂ ਨੌਜਵਾਨ ਉੱਤੇ ਗੋਲੀ ਚਲਾ ਦਿੱਤੀ ਅਤੇ ਗੋਲੀ ਲੱਗਦੇ ਹੀ ਨੌਜਵਾਨ ਖੜ੍ਹਾ-ਖੜ੍ਹਾ ਹੀ ਹੇਠਾਂ ਡਿੱਗ ਪਿਆ। ਜਦੋਂ ਗੋਲੀ ਪੇਟ ਚੋਂ ਆਰ-ਪਾਰ ਹੋਈ ਤਾਂ..
ਪੰਜਾਬ ਦੇ ਅੰਮ੍ਰਿਤਸਰ ਵਿੱਚ ਸਕੂਟੀ ਸਵਾਰ ਬਦਮਾਸ਼ ਨੇ ਇੱਕ ਨੌਜਵਾਨ ਨੂੰ ਗੋਲੀ ਮਾਰ ਦਿੱਤੀ। ਗੋਲੀ ਉਸਦੇ ਪੇਟ ਤੋਂ ਆਰ-ਪਾਰ ਹੋ ਗਈ, ਜਿਸ ਤੋਂ ਬਾਅਦ ਨੇੜੇ ਖੜ੍ਹੀ ਇੱਕ ਔਰਤ ਨੂੰ ਜਾ ਲੱਗੀ। ਗੋਲੀ ਲੱਗਦੇ ਹੀ ਨੌਜਵਾਨ ਖੜ੍ਹਾ-ਖੜ੍ਹਾ ਹੀ ਹੇਠਾਂ ਡਿੱਗ ਪਿਆ। ਵਾਰਦਾਤ ਦੇ ਸਮੇਂ ਉੱਥੇ ਕਾਫ਼ੀ ਲੋਕ ਮੌਜੂਦ ਸਨ।
ਚਸ਼ਮਦੀਦਾਂ ਦੇ ਅਨੁਸਾਰ, ਦੋਸ਼ੀ ਨੇ ਅਚਾਨਕ ਪਿਸਤੌਲ ਕੱਢੀ ਅਤੇ ਸੜਕ ‘ਤੇ ਪੈਦਲ ਜਾ ਰਹੇ ਨੌਜਵਾਨ ‘ਤੇ ਬਿਨਾਂ ਕਿਸੇ ਵਜ੍ਹਾ ਗੋਲੀਆਂ ਚਲਾ ਦਿੱਤੀਆਂ। ਹੁਣ ਇਸ ਘਟਨਾ ਨਾਲ ਸੰਬੰਧਿਤ ਇੱਕ ਵੀਡੀਓ ਵੀ ਸਾਹਮਣੇ ਆਇਆ ਹੈ। ਉੱਧਰ ਪਰਿਵਾਰ ਦਾ ਦਾਅਵਾ ਹੈ ਕਿ ਦੋਸ਼ੀ ਨੇ ਗੰਨਪੁਆਇੰਟ ‘ਤੇ ਇੱਕ ਘਰ ਤੋਂ ਸਕੂਟੀ ਚੋਰੀ ਕੀਤੀ ਸੀ ਅਤੇ ਉਸੇ ਸਕੂਟੀ ‘ਤੇ ਆ ਕੇ ਗੋਲੀ ਮਾਰਨ ਦੀ ਵਾਰਦਾਤ ਨੂੰ ਅੰਜ਼ਾਮ ਦਿੱਤਾ।
ਪੁਲਿਸ ਕਰ ਰਹੀ ਸੀਸੀਟੀਵੀ ਦੀ ਜਾਂਚ
ਨੌਜਵਾਨ ਅਤੇ ਔਰਤ ਦੋਵਾਂ ਨੂੰ ਗੰਭੀਰ ਹਾਲਤ ਵਿੱਚ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ। ਉੱਧਰ ਪੁਲਿਸ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰ ਰਹੀ ਹੈ ਅਤੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਚੈਕਿੰਗ ਕੀਤੀ ਜਾ ਰਹੀ ਹੈ।
ਪੈਦਲ ਜਾ ਰਹੇ ਨੌਜਵਾਨ ‘ਤੇ ਫਾਇਰਿੰਗ
ਅੰਮ੍ਰਿਤਸਰ ਦੇ ਗੁਰੂ ਨਾਨਕ ਪੁਰਾ ਇਲਾਕੇ ਵਿੱਚ ਲੋਕ ਸੜਕ ‘ਤੇ ਹੀ ਖੜ੍ਹੇ ਹੋ ਕੇ ਗੱਲਬਾਤ ਕਰ ਰਹੇ ਸਨ। ਐਤਵਾਰ ਸਵੇਰੇ ਲਗਭਗ 10 ਵਜੇ ਇੱਕ ਸਕੂਟੀ ਸਵਾਰ ਨੌਜਵਾਨ ਕਾਲੋਨੀ ਵਿੱਚ ਦਾਖ਼ਲ ਹੋਇਆ। ਉਸਨੇ ਨੀਲੀ ਜੈਕਟ ਪਹਿਨੀ ਹੋਈ ਸੀ। ਕਾਲੀ ਸਕੂਟੀ ‘ਤੇ ਉਹ ਤੇਜ਼ ਰਫ਼ਤਾਰ ਨਾਲ ਅੰਦਰ ਆਇਆ। ਵੀਡੀਓ ਵਿੱਚ ਕਾਲੋਨੀ ਦੀਆਂ ਦੁਕਾਨਾਂ ਵੀ ਬੰਦ ਦਿਖਾਈ ਦੇ ਰਹੀਆਂ ਹਨ।
ਪਿਸਤੌਲ ਕੱਢ ਕੇ ਮਾਰੀ ਗੋਲੀ
ਕੁੱਝ ਹੀ ਮੀਟਰ ਅੱਗੇ ਜਾਣ ‘ਤੇ ਸਕੂਟੀ ਸਵਾਰ ਦੋਸ਼ੀ ਨੇ ਪੈਦਲ ਜਾ ਰਹੇ ਨੌਜਵਾਨ ਬਿੱਲੂ ਨੂੰ ਟੱਕਰ ਮਾਰ ਦਿੱਤੀ। ਨੇੜੇ ਲੰਘ ਰਹੀ ਇੱਕ ਔਰਤ ਡਰ ਕੇ ਉੱਥੋਂ ਦੂਰ ਹੋ ਗਈ। ਟੱਕਰ ਮਾਰਦੇ ਹੀ ਦੋਸ਼ੀ ਨੇ ਜੇਬ ਵਿੱਚੋਂ ਪਿਸਤੌਲ ਕੱਢ ਕੇ ਬਿੱਲੂ ‘ਤੇ ਗੋਲੀ ਚਲਾ ਦਿੱਤੀ। ਗੋਲੀ ਲੱਗਦੇ ਹੀ ਬਿੱਲੂ ਖੜ੍ਹਾ-ਖੜ੍ਹਾ ਹੀ ਹੇਠਾਂ ਡਿੱਗ ਪਿਆ।
ਗੋਲੀ ਲੱਗਣ ਨਾਲ ਜ਼ਖ਼ਮੀ ਹੋਏ ਬਿੱਲੂ ਨੂੰ ਆਲੇ-ਦੁਆਲੇ ਮੌਜੂਦ ਲੋਕਾਂ ਨੇ ਤੁਰੰਤ ਨਜ਼ਦੀਕੀ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ। ਗੋਲੀ ਉਸਦੇ ਪੇਟ ਤੋਂ ਆਰ-ਪਾਰ ਨਿਕਲ ਗਈ। ਉੱਧਰ ਗੋਲੀ ਮਾਰਣ ਤੋਂ ਬਾਅਦ ਸਕੂਟੀ ਸਵਾਰ ਦੋਸ਼ੀ ਤੇਜ਼ ਰਫ਼ਤਾਰ ਨਾਲ ਮੌਕੇ ਤੋਂ ਫਰਾਰ ਹੋ ਗਿਆ।
ਪਰਿਵਾਰ ਨੇ ਕਿਹਾ– ਸਕੂਟੀ ਚੋਰੀ ਦੀ ਸੀ
ਮਾਮਲੇ ਵਿੱਚ ਬਿੱਲੂ ਦੇ ਚਾਚਾ ਅਸ਼ਵਨੀ ਕੁਮਾਰ ਨੇ ਦੱਸਿਆ ਕਿ ਗੋਲੀ ਚਲਾਣ ਵਾਲੇ ਨੌਜਵਾਨ ਦੇ ਪਿੱਛੇ ਪੁਲਿਸ ਲੱਗੀ ਹੋਈ ਸੀ। ਉਸਨੇ ਨੇੜੇ ਹੀ ਇੱਕ ਘਰ ਵਿੱਚ ਵੜ ਕੇ ਗੰਨ ਪੁਆਇੰਟ ‘ਤੇ ਇੱਕ ਔਰਤ ਤੋਂ ਸਕੂਟੀ ਖੋਹ ਲਈ। ਇਸ ਤੋਂ ਬਾਅਦ ਉਹ ਉਸੇ ਸਕੂਟੀ ‘ਤੇ ਸਵਾਰ ਹੋ ਕੇ ਕਾਲੋਨੀ ਦੀ ਗਲੀ ਵਿੱਚੋਂ ਨਿਕਲਣ ਲੱਗਾ। ਰਸਤੇ ਵਿੱਚ ਉਸਨੇ ਬਿੱਲੂ ਨੂੰ ਗੋਲੀ ਮਾਰ ਦਿੱਤੀ।
ਜਲਦ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ-ਪੁਲਿਸ
ਏਸੀਪੀ ਜਸਪਾਲ ਸਿੰਘ ਨੇ ਦੱਸਿਆ ਕਿ ਬਿੱਲੂ ਨਾਮ ਦਾ ਇੱਕ ਵਿਅਕਤੀ ਆਪਣੇ ਘਰ ਤੋਂ ਦੁਕਾਨ ‘ਤੇ ਵਾਲਾਂ ਦਾ ਕਲਰ ਲੈਣ ਜਾ ਰਿਹਾ ਸੀ। ਰਸਤੇ ਵਿੱਚ ਸਕੂਟੀ ਸਵਾਰ ਨੌਜਵਾਨ ਦੀ ਬਿੱਲੂ ਨਾਲ ਟੱਕਰ ਹੋ ਗਈ, ਜਿਸ ਤੋਂ ਬਾਅਦ ਦੋਹਾਂ ਵਿਚਕਾਰ ਬਹਿਸ ਸ਼ੁਰੂ ਹੋ ਗਈ। ਇਸ ਦੌਰਾਨ ਦੋਸ਼ੀ ਨੇ ਬਿੱਲੂ ‘ਤੇ ਗੋਲੀ ਚਲਾ ਦਿੱਤੀ।
ਬਿੱਲੂ ਨੂੰ ਗੁਰੂ ਨਾਨਕ ਦੇਵ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ। ਪੁਲਿਸ ਦੀਆਂ ਟੀਮਾਂ ਮਾਮਲੇ ਦੀ ਜਾਂਚ ਕਰ ਰਹੀਆਂ ਹਨ ਅਤੇ ਦੋਸ਼ੀ ਨੂੰ ਜਲਦ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ। ਇਸ ਘਟਨਾ ਵਿੱਚ ਇੱਕ ਔਰਤ ਨੂੰ ਵੀ ਗੋਲੀ ਲੱਗੀ ਹੈ, ਜਿਸ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
