ਸਾਉਣੀ ਦੀਆਂ ਫ਼ਸਲਾਂ ਦਾ ਘਟੇਗਾ ਝਾੜ

ਨਵੀਂ ਦਿੱਲੀ: ਅਰਥਚਾਰੇ ਦੀ ਮੱਠੀ ਚਾਲ ਕਾਰਨ ਸੰਕਟ ਵਿੱਚੋਂ ਲੰਘ ਰਹੀ ਮੋਦੀ ਸਰਕਾਰ ਲਈ ਇੱਕ ਹੋਰ ਬੁਰੀ ਖ਼ਬਰ ਆ ਰਹੀ ਹੈ। ਦੇਸ਼ ਵਿੱਚ ਇਸ ਸਾਲ ਚੌਲ ਤੇ ਦਾਲਾਂ ਜਿਹੀਆਂ ਸਾਉਣੀ ਦੀਆਂ ਫ਼ਸਲਾਂ ਦੀ ਪੈਦਾਵਾਰ ਵਿੱਚ ਤਕਰੀਬਨ 38 ਲੱਖ ਟਨ ਦੀ ਕਮੀ ਆਉਣ ਦੀ ਸੰਭਾਵਨਾ ਹੈ। ਖੇਤੀ ਮੰਤਰਾਲੇ 2017-18 ਵੱਲੋਂ ਸਾਉਣੀ ਦੀਆਂ ਫ਼ਸਲਾਂ ਦੀ ਪੈਦਾਵਾਰ ਸਬੰਧੀ ਪਹਿਲਾ ਅੰਕੜਾ ਜਾਰੀ ਕੀਤਾ ਹੈ। ਅੰਕੜਿਆਂ ਮੁਤਾਬਕ ਦੇਸ਼ ਦੇ ਕਈ ਇਲਾਕਿਆਂ ਵਿੱਚ ਪੈ ਰਹੇ ਸੋਕੇ ਕਾਰਨ ਚੌਲ ਤੇ ਦਾਲਾਂ ਦਾ ਝਾੜ ਘੱਟ ਹੋ ਸਕਦਾ ਹੈ। ਕਿੰਨੀ ਪੈਦਾਵਾਰ ਹੋਵੇਗੀ..? 2016-17 ਵਿੱਚ ਸਾਉਣੀ ਦੀਆਂ ਫ਼ਸਲਾਂ ਤੋਂ ਤਕਰੀਬਨ 13.85 ਕਰੋੜ ਟਨ ਹੋਇਆ ਸੀ ਜੋ ਦੇਸ਼ ਵਿੱਚ ਸਭ ਤੋਂ ਵੱਧ ਸੀ। ਹਾਲਾਂਕਿ, ਸਰਕਾਰ ਨੇ ਪਹਿਲੇ ਅੰਦਾਜ਼ੇ ਮੁਤਾਬਕ ਕੁੱਲ ਉਤਪਾਦਨ 13.46 ਕਰੋੜ ਟਨ ਹੀ ਰਹੇਗਾ। ਉਂਝ ਸਰਕਾਰ ਨੇ ਇਸ ਰੁੱਤ ਵਿੱਚ ਪੈਦਾਵਾਰ ਟੀਚਾ 13.70 ਕਰੋੜ ਟਨ ਰੱਖਿਆ ਹੋਇਆ ਹੈ, ਜੋ ਪਿਛਲੇ ਸਾਲ 2016-17 ਦੇ 13.85 ਕਰੋੜ ਟਨ ਦੇ ਮੁਕਾਬਲੇ ਘੱਟ ਹੈ। ਕਿਹੜੀਆਂ ਫ਼ਸਲਾਂ ਦਾ ਝਾੜ ਘਟੇਗਾ..? ਜੇਕਰ ਸਾਉਣੀ ਦੀ ਸਭ ਤੋਂ ਮੁੱਖ ਫ਼ਸਲ ਚੌਲ ਦੀ ਗੱਲ ਕਰੀਏ ਤਾਂ ਪੈਦਾਵਾਰ ਵਿੱਚ ਕੋਈ ਖ਼ਾਸ ਕਮੀ ਆਉਣ ਦੀ ਸੰਭਾਵਨਾ ਹੈ। 2016-17 ਵਿੱਚ ਚੌਲਾਂ ਦਾ ਕੁੱਲ ਝਾੜ 9.64 ਕਰੋੜ ਟਨ ਸੀ ਜੋ ਇਸ ਵਾਰ 9.44 ਕਰੋੜ ਟਨ ਰਹਿਣ ਦੀ ਸੰਭਵਨਾ ਹੈ, ਯਾਨੀ ਪਿਛਲੇ ਸਾਲ ਦੇ ਮੁਕਾਬਲੇ 20 ਲੱਖ ਟਨ ਘੱਟ। ਸਰਕਾਰ ਨੂੰ ਅਸਲੀ ਝਟਕਾ ਦਾਲ, ਖ਼ਾਸ ਤੌਰ 'ਤੇ ਅਰਹਰ ਦਾਲ ਦੇ ਉਤਪਾਦਨ ਵਿੱਚ ਲੱਗ ਸਕਦਾ ਹੈ। 2016-17 ਵਿੱਚ ਜਿੱਥੇ ਅਰਹਰ ਦਾਲ ਦਾ ਰਿਕਾਰਡ ਝਾੜ 47.8 ਲੱਖ ਟਨ ਰਿਹਾ ਉੱਥੇ ਹੀ ਇਸ ਵਾਰ ਇਹ 40 ਲੱਖ ਟਨ ਰਹਿਣ ਦਾ ਅੰਦਾਜ਼ਾ ਹੈ। ਹਾਲਾਂਕਿ, ਸਰਕਾਰ ਦਾ ਟੀਚਾ 42.5 ਲੱਖ ਟਨ ਦਾਲ ਪੈਦਾ ਕਰਨ ਦਾ ਟੀਚਾ ਰੱਖਿਆ ਸੀ। ਪੈਦਾਵਾਰ ਘਟਣ ਦੇ ਕਿਹੜੇ ਕਾਰਨ..? ਉਤਪਾਦਨ ਵਿੱਚ ਕਮੀ ਦਾ ਵੱਡਾ ਕਾਰਨ ਮਾਨਸੂਨ ਦਾ ਬੇਤਰਤੀਬਾ ਰਹਿਣਾ। ਸਰਕਾਰੀ ਅੰਕੜਿਆਂ ਮੁਤਾਬਕ 1 ਜੂਨ ਤੋਂ 6 ਸਤੰਬਰ ਦਰਮਿਆਨ ਮਾਨਸੂਨ ਵਿੱਚ 5 ਫ਼ੀ ਸਦੀ ਦੀ ਕਮੀ ਵੇਖੀ ਗਈ ਹੈ। ਇਸ ਕਾਰਨ ਪਿਛਲੇ ਸਾਲ ਦੇ ਮੁਕਾਬਲੇ ਚੌਲ ਅਤੇ ਦਾਲਾਂ ਹੇਠ ਰਕਬੇ ਵਿੱਚ 80 ਹਜ਼ਾਰ ਹੈਕਟੇਅਰ ਦੀ ਕਮੀ ਆਈ ਹੈ।