Flood : ਬਾਂਹ ਟੁੱਟੀ ਹੋਣ ਤੇ ਵੀ ਫੌਜੀ ਨੇ ਬਚਾਈ 24 ਲੋਕਾਂ ਦੀ ਜਾਨ
punjab ਫ਼ੌਜੀ ਸਰਹੱਦ ’ਤੇ ਹੋਵੇ ਜਾਂ ਪਿੰਡ ’ਚ, ਉਹ ਲੋਕਾਂ ਦੀ ਰੱਖਿਆ ਲਈ ਹਮੇਸ਼ਾ ਅੱਗੇ ਰਹਿੰਦਾ ਹੈ। ਇਹ ਸਾਬਤ ਕੀਤਾ ਹੈ ਪਿੰਡ ਹਰਸ਼ਾ ਬੇਲਾ ਦੇ ਰਹਿਣ ਵਾਲੇ ਕਾਰਗਿਲ ਯੁੱਧ ਲੜ ਚੁੱਕੇ ਸਾਬਕਾ ਫ਼ੌਜੀ 44 ਸਾਲਾ ਜਸਪਾਲ ਸਿੰਘ ਨੇ..
flood - ਫ਼ੌਜੀ ਸਰਹੱਦ ’ਤੇ ਹੋਵੇ ਜਾਂ ਪਿੰਡ ’ਚ, ਉਹ ਲੋਕਾਂ ਦੀ ਰੱਖਿਆ ਲਈ ਹਮੇਸ਼ਾ ਅੱਗੇ ਰਹਿੰਦਾ ਹੈ। ਇਹ ਸਾਬਤ ਕੀਤਾ ਹੈ ਪਿੰਡ ਹਰਸ਼ਾ ਬੇਲਾ ਦੇ ਰਹਿਣ ਵਾਲੇ ਕਾਰਗਿਲ ਯੁੱਧ ਲੜ ਚੁੱਕੇ ਸਾਬਕਾ ਫ਼ੌਜੀ 44 ਸਾਲਾ ਜਸਪਾਲ ਸਿੰਘ ਨੇ, ਉਨ੍ਹਾਂ ਬਾਂਹ ਦੀ ਹੱਡੀ ਟੁੱਟ ਜਾਣ ਤੋਂ ਬਾਅਦ ਇਸ ’ਚ ਰਾਡ ਲੱਗੀ ਹੋਣ ਦੇ ਬਾਵਜੂਦ ਹੌਸਲੇ ਦੇ ਬਲ ’ਤੇ ਆਪਣੇ ਪਿੰਡ ਦੇ 24 ਹੜ੍ਹ ਪੀੜਤਾਂ ਨੂੰ ਬਚਾਇਆ।
ਉਹ ਦੱਸਦੇ ਹਨ ਕਿ ਦੋ ਹਫ਼ਤੇ ਪਹਿਲਾਂ ਉਨ੍ਹਾਂ ਦੀ ਬਾਂਹ ਦੀ ਹੱਡੀ ਟੁੱਟ ਗਈ ਸੀ। ਨੂਰਪੁਰ ਬੇਦੀ ਦੇ ਨਿੱਜੀ ਹਸਪਤਾਲ ’ਚ ਡਾਕਟਰ ਨੇ 14 ਅਗਸਤ ਨੂੰ ਆਪ੍ਰੇਸ਼ਨ ਕਰ ਕੇ ਬਾਂਹ ’ਚ ਰਾਡ ਪਾਈ ਸੀ। ਹੱਥ ’ਤੇ ਲੋਹੇ ਦੀਆਂ ਤਾਰਾਂ ਲੱਗੀਆਂ ਸਨ। ਇਸੇ ਦੌਰਾਨ ਉਨ੍ਹਾਂ ਨੂੰ ਸੂਚਨਾ ਮਿਲੀ ਕਿ ਪਾਣੀ ਦਾ ਪੱਧਰ ਵਧਣ ਕਰਕੇ ਭਾਖੜਾ ਬੰਨ੍ਹ ’ਚੋਂ ਪਾਣੀ ਛੱਡਿਆ ਜਾ ਰਿਹਾ ਹੈ, ਜੋ ਉਨ੍ਹਾਂ ਦੇ ਪਿੰਡ ’ਚ ਜਾ ਰਿਹਾ ਹੈ। ਉਨ੍ਹਾਂ ਨੂੰ ਰਾਤ ਭਰ ਨੀਂਦ ਨਹੀਂ ਆਈ। ਇਹ ਸੋਚਦੇ ਰਹੇ ਕਿ ਘਰ ਤੇ ਪਰਿਵਾਰ ਦਾ ਕੀ ਹਾਲ ਹੋਵੇਗਾ, ਲੋਕ ਕਿਵੇਂ ਹੋਣਗੇ। 15 ਅਗਸਤ ਦੀ ਸਵੇਰ ਪਤਾ ਲੱਗਿਆ ਕਿ ਪਿੰਡ ਦਾ ਹੇਠਲਾ ਇਲਾਕਾ ਪਾਣੀ ’ਚ ਡੁੱਬ ਗਿਆ ਹੈ। ਬਚਾਅ ਲਈ ਲੋਕ ਉੱਪਰੀ ਇਲਾਕਿਆਂ ’ਚ ਚਲੇ ਗਏ ਹਨ। ਪਿੰਡ ’ਚ ਪਾਣੀ ਦਾ ਪੱਧਰ ਲਗਾਤਾਰ ਵਧਣ ਕਾਰਨ ਲੋਕਾਂ ਦੀ ਜਾਨ ਖ਼ਤਰੇ ’ਚ ਪੈਣ ਲੱਗੀ ਹੈ।
ਉਹ ਸੋਚ ਰਹੇ ਸਨ ਕਿ ਮੈਨੂੰ ਖੰਭ ਲੱਗ ਜਾਣ, ਉੱਡ ਕੇ ਆਪਣੇ ਪਿੰਡ ਪਹੁੰਚ ਜਾਵਾਂ ਅਤੇ ਲੋਕਾਂ ਨੂੰ ਬਚਾਵਾਂ ਪਰ ਡਾਕਟਰ ਜਾਣ ਤੋਂ ਰੋਕ ਰਹੇ ਸਨ। ਉਨ੍ਹਾਂ ਤੋਂ ਰਿਹਾ ਨਹੀਂ ਗਿਆ ਅਤੇ 16 ਅਗਸਤ ਸਵੇਰੇ ਡਾਕਟਰਾਂ ਅਤੇ ਮੁਲਾਜ਼ਮਾਂ ਦੀ ਨਜ਼ਰ ਤੋਂ ਬਚ ਕੇ ਨਿਕਲੇ ਤੇ ਪਿੰਡ ਕੋਲ ਪਹੁੰਚੇ। ਇੱਥੇ ਪਹੁੰਚ ਕੇ ਦੇਖਿਆ ਕਿ ਪਿੰਡ ’ਚ ਪਾਣੀ ਦਾ ਪੱਧਰ ਲਗਾਤਾਰ ਵਧ ਰਿਹਾ ਹੈ। ਐੱਨਡੀਆਰਐੱਫ ਦੀ ਟੀਮ ਨੇ ਵੀ ਰੁੱਖਾਂ ਕਾਰਨ ਪਿੰਡ ’ਚ ਦਾਖ਼ਲ ਹੋਣ ’ਚ ਖ਼ਤਰਾ ਦੱਸਿਆ। ਉਨ੍ਹਾਂ ਦਾ ਇਕ ਹੱਥ ਆਪ੍ਰੇਸ਼ਨ ਕਾਰਨ ਬੰਨਿਆ ਹੋਇਆ ਸੀ ਪਰ ਹੌਸਲਾ ਅਪਾਰ ਸੀ। ਉਸ ਸਮੇਂ ਫ਼ੌਜ ’ਚ ਮਿਲੀ ਸਿਖਲਾਈ ਕੰਮ ਆਈ। ਉਹ ਤੁਰੰਤ ਟਰੱਕ ਦੇ ਟਾਇਰ ਦੇ ਚਾਰ ਟਿਊਬ ਖ਼ਰੀਦ ਕੇ ਲਿਆਏ। ਇਨ੍ਹਾਂ ਟਿਊਬਾਂ ’ਚ ਹਵਾ ਭਰ ਕੇ ਸਾਰਿਆਂ ਨੂੰ ਇਕੱਠਾ ਬੰਨ੍ਹ ਦਿੱਤਾ। ਇਸ ਤੋਂ ਬਾਅਦ ਇਨ੍ਹਾਂ ਟਿਊਬਾਂ ਦੇ ਉੱਪਰ ਇਕ ਮੰਜਾ ਪੁੱਠਾ ਕਰ ਕੇ ਬੰਨ੍ਹ ਦਿੱਤਾ। ਇਸ ਤਰ੍ਹਾਂ ਆਪਣੀ ਜੁਗਾੜੂ ਕਿਸ਼ਤੀ ਤਿਆਰ ਕਰ ਕੇ ਆਪਣੇ ਪਿੰਡ ਦੇ ਤੈਰਾਕੀ ਜਾਣਨ ਵਾਲੇ ਸਾਥੀਆਂ ਜਸਪਾਲ ਸਿੰਘ, ਹਰਜਿੰਦਰ ਸਿੰਘ, ਸਤਵਿੰਦਰ ਸਿੰਘ, ਮਲਕੀਤ ਸਿੰਘ, ਮਹਿੰਦਰ ਸਿੰਘ ਤੇ ਜੁਝਾਰ ਸਿੰਘ ਨੂੰ ਨਾਲ ਲਿਆ। ਇਸ ਤੋਂ ਬਾਅਦ ਉਸ ਕਿਸ਼ਤੀ ਨਾਲ ਪਿੰਡ ਦੇ ਬਜ਼ੁਰਗਾਂ, ਬੱਚਿਆਂ ਅਤੇ ਔਰਤਾਂ ਨੂੰ ਸੁਰੱਖਿਅਤ ਥਾਂ ’ਤੇ ਪਹੁੰਚਾਉਣਾ ਸ਼ੁਰੂ ਕਰ ਦਿੱਤਾ। ਉਹ ਪੰਜ ਵਾਰ ’ਚ 24 ਪਿੰਡ ਵਾਸੀਆਂ ਨੂੰ ਕੱਢ ਲਿਆਏ। ਫ਼ੌਜ ’ਚ ਜਵਾਨਾਂ ਨੂੰ ਅਜਿਹੇ ਮੁਸ਼ਕਲ ਹਾਲਾਤ ਨਾਲ ਨਜਿੱਠਣ ਲਈ ਸਿਖਲਾਈ ਦਿੱਤੀ ਜਾਂਦੀ ਹੈ, ਜੋ ਕੰਮ ਆਈ। ਜਦੋਂ ਹਸਪਤਾਲ ਪਰਤੇ ਤਾਂ ਡਾਕਟਰ ਨੇ ਬਿਨਾਂ ਦੱਸੇ ਜਾਣ ਲਈ ਮੈਨੂੰ ਡਾਂਟਿਆ ਵੀ ਸੀ। ਜਸਪਾਲ ਸਿੰਘ ਦੱਸਦੇ ਹਨ ਕਿ ਉਹ ਫ਼ੌਜ ਦੀ 16ਵੀਂ ਸਿੱਖ ਬਟਾਲੀਅਨ ’ਚ 20 ਸਾਲ ਸੇਵਾ ਕਰਨ ਤੋਂ ਬਾਅਦ ਸੇਵਾਮੁਕਤੀ ਲੈ ਕੇ ਪਿੰਡ ਆ ਕੇ ਰਹਿਣ ਲੱਗੇ। ਇਹ ਪਹਿਲਾ ਮੌਕਾ ਨਹੀਂ ਹੈ ਜਦੋਂ ਪਿੰਡ ’ਚ ਹੜ੍ਹ ਆਇਆ ਹੋਵੇ। ਇਸ ਤੋਂ ਪਹਿਲਾਂ 2019 ’ਚ ਹੜ੍ਹ ਆਇਆ ਸੀ। ਉਸ ਸਮੇਂ ਵੀ ਮੈਂ ਕਿਸ਼ਤੀ ਲੈ ਕੇ ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਸੀ। ਉਸ ਸਮੇਂ ਰਾਤ ’ਚ ਪਾਣੀ ਵਧਣਾ ਸ਼ੁਰੂ ਹੋਇਆ ਤੇ ਉਨ੍ਹਾਂ ਨੇ ਸਵੇਰੇ ਛੇ ਵਜੇ ਬਚਾਅ ਮੁਹਿੰਮ ਸ਼ੁਰੂ ਕੀਤੀ ਸੀ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
