Sangrur News: ਸਾਲ 2023 'ਚ ਸੀਐਮ ਭਗਵੰਤ ਮਾਨ ਦੇ ਜ਼ਿਲ੍ਹੇ ਸੰਗਰੂਰ 'ਚ ਕਿਵੇਂ ਰਿਹਾ ਅਪਰਾਧਾਂ ਦਾ ਗ੍ਰਾਫ, ਪੁਲਿਸ ਵੱਲੋਂ ਰਿਪੋਰਟ ਕਾਰਡ ਪੇਸ਼
Crime In Punjab In 2023: ਚਾਹਲ ਨੇ ਦੱਸਿਆ ਕਿ ਸਾਲ 2023 ਵਿੱਚ ਐਨਡੀਪੀਐਸ ਐਕਟ ਤਹਿਤ ਕੁੱਲ 479 ਕੇਸ ਦਰਜ ਕੀਤੇ ਗਏ ਜਦੋਂਕਿ 559 ਗ੍ਰਿਫ਼ਤਾਰੀਆਂ ਹੋਈਆਂ।
Sangrur News: ਮੁੱਖ ਮੰਤਰੀ ਭਗਵੰਤ ਮਾਨ ਦਾ ਜ਼ਿਲ੍ਹਾ ਸੰਗਰੂਰ ਹੁਣ ਚਰਚਾ ਵਿੱਚ ਰਹਿੰਦਾ ਹੈ। ਇੱਕ ਪਾਸੇ ਇਹ ਜ਼ਿਲ੍ਹਾ ਧਰਨਿਆਂ ਕਰਕੇ ਤੇ ਦੂਜੇ ਪਾਸੇ ਅਮਨ-ਕਾਨੂੰਨ ਦੀ ਸਥਿਤੀ ਨੂੰ ਲੈ ਕੇ ਚਰਚਾ ਵਿੱਚ ਰਹਿੰਦਾ ਹੈ। ਮੁੱਖ ਮੰਤਰੀ ਦਾ ਜ਼ਿਲ੍ਹਾ ਹੋਣ ਕਰਕੇ ਪੁਲਿਸ ਵੀ ਪੂਰੀ ਤਰ੍ਹਾਂ ਚੌਕਸ ਰਹਿੰਦੀ ਹੈ। ਇਸ ਲਈ ਸਾਲ 2023 ਵਿੱਚ ਪੁਲਿਸ ਐਕਸ਼ਨ ਮੋਡ ਵਿੱਚ ਨਜ਼ਰ ਆਈ। ਪੁਲਿਸ ਨੇ ਹੁਣ ਆਪਣਾ ਰਿਪੋਰਟ ਕਾਰਡ ਜਾਰੀ ਕੀਤਾ ਹੈ।
ਜ਼ਿਲ੍ਹਾ ਪੁਲਿਸ ਮੁਖੀ ਸਰਤਾਜ ਸਿੰਘ ਚਾਹਲ ਨੇ ਜ਼ਿਲ੍ਹਾ ਪੁਲਿਸ ਸੰਗਰੂਰ ਵੱਲੋਂ ਸਾਲ 2023 ਦੌਰਾਨ ਪੁਲਿਸ ਪ੍ਰਾਪਤੀਆਂ ਦੀ ਰਿਪੋਰਟ ਮੀਡੀਆ ਨਾਲ ਸਾਂਝੀ ਕੀਤੀ। ਚਾਹਲ ਨੇ ਦੱਸਿਆ ਕਿ ਸਾਲ 2023 ਵਿੱਚ ਐਨਡੀਪੀਐਸ ਐਕਟ ਤਹਿਤ ਕੁੱਲ 479 ਕੇਸ ਦਰਜ ਕੀਤੇ ਗਏ ਜਦੋਂਕਿ 559 ਗ੍ਰਿਫ਼ਤਾਰੀਆਂ ਹੋਈਆਂ। ਪੁਲਿਸ ਵੱਲੋਂ 4.829 ਕਿਲੋਗ੍ਰਾਮ ਹੈਰੋਇਨ, 21.189 ਕਿਲੋ ਅਫੀਮ, ਲਗਭਗ 5462 ਕਿਲੋ ਭੁੱਕੀ ਚੂਰਾ ਪੋਸਤ, 12.550 ਗ੍ਰਾਮ ਗਾਂਜਾ ਚਰਸ, 0.169 ਗ੍ਰਾਮ ਨਸ਼ੀਲਾ ਪਾਊਡਰ, 79 ਗ੍ਰਾਮ ਸਮੈਕ, 6.145 ਕਿਲੋਗ੍ਰਾਮ ਸੁਲਫਾ, 196 ਰੈਕਸਕੈਫ, 159786 ਗੋਲੀਆਂ ਤੇ ਕੈਪਸੂਲ ਬਰਾਮਦ ਕੀਤੇ।
ਉਨ੍ਹਾਂ ਦੱਸਿਆ ਕਿ ਐਕਸਾਇਜ਼ ਐਕਟ ਤਹਿਤ 250 ਕੇਸ ਦਰਜ ਕੀਤੇ ਗਏ ਜਦੋਂਕਿ 260 ਵਿਅਕਤੀ ਗ੍ਰਿਫਤਾਰ ਕੀਤੇ ਗਏ। ਇਸੇ ਸਾਲ 11 ਚਾਲੂ ਭੱਠੀਆਂ ਵੀ ਫੜੀਆਂ ਗਈਆਂ ਤੇ 17936 ਲਗਭਗ ਦੇਸੀ, ਅੰਗਰੇਜ਼ੀ ਸ਼ਰਾਬ ਦੀ ਬਰਾਮਦਗੀ ਹੋਈ। 21.500 ਲੀਟਰ ਸਪਰਿੱਟ ਤੇ 10665 ਲੀਟਰ ਲਾਹਣ ਵੀ ਫੜਿਆ ਗਿਆ। ਅਸਲਾ ਐਕਟ ਤਹਿਤ 8 ਕੇਸ ਦਰਜ ਕਰਦਿਆਂ 20 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਜਦੋਂਕਿ 39 ਅਸਲੇ ਵੀ ਬਰਾਮਦ ਹੋਏ। ਇਸ ਦੇ ਨਾਲ ਹੀ 56 ਕਾਰਤੂਸ ਅਤੇ 4 ਮੈਗਜ਼ੀਨ ਵੀ ਪ੍ਰਾਪਤ ਹੋਏ। ਇਸ ਦੇ ਨਾਲ ਹੀ ਜੂਆ ਐਕਟ ਤਹਿਤ ਲਗਪਗ 55 ਕੇਸ ਦਰਜ ਕਰਦਿਆਂ 100 ਵਿਅਕਤੀ ਗ੍ਰਿਫਤਾਰ ਕੀਤੇ ਜਿਨ੍ਹਾਂ ਪਾਸੋਂ 297795 ਰੁਪਏ ਰਿਕਵਰ ਕੀਤੇ ਗਏ।
ਪੁਲਿਸ ਲਾਈਨ ਸੰਗਰੂਰ ਵਿੱਚ ਆਧੁਨਿਕ ਹਾਈਟੈਕ ਕੰਟਰੋਲ ਰੂਮ ਨਾਲ ਸੰਗਰੂਰ ਜ਼ਿਲ੍ਹੇ ਦੇ 88 ਪਿੰਡਾਂ ਨੂੰ ਜੋੜਿਆ ਗਿਆ ਹੈ ਤਾਂ ਜੋ ਗੈਰ ਸਮਾਜੀ ਅਨਸਰਾਂ ਖਿਲਾਫ ਕਾਰਵਾਈ ਹੋ ਸਕੇ। ਖੇਡਾਂ ਦੇ ਖੇਤਰ ਦੀਆਂ ਪ੍ਰਾਪਤੀਆਂ ਬਾਰੇ ਉਨ੍ਹਾਂ ਦੱਸਿਆ ਕਿ ਪੁਲੀਸ ਸਪੋਰਟਸ ਕਲੱਬ ਰਾਹੀਂ ਕਬੱਡੀ, ਸਕੇਟਿੰਗ, ਬਾਕਸਿੰਗ, ਅਥਲੈਟਿਕਸ, ਵਾਲੀਬਾਲ ਤੇ ਤੈਰਾਕੀ ਨਾਲ ਸਬੰਧਤ ਕਰੀਬ 300 ਬੱਚੇ ਪ੍ਰੈਕਟਿਸ ਕਰਦੇ ਹਨ।
ਇਨ੍ਹਾਂ ਬੱਚਿਆਂ ਵੱਲੋਂ ਸਾਲ 2023 ਦੌਰਾਨ ਕੌਮੀ ਪੱਧਰ ਅਤੇ ਪੰਜਾਬ ਪੱਧਰ ਤੇ ਤੈਰਾਕੀ ਵਿੱਚੋਂ 63 ਮੈਡਲ, ਅਥਲੈਟਿਕਸ ਵਿੱਚੋਂ 66 ਮੈਡਲ, ਕਬੱਡੀ ਵਿੱਚੋਂ 68 ਮੈਡਲ, ਸਕੇਟਿੰਗ ਵਿੱਚੋਂ 145 ਮੈਡਲ, ਬਾਕਸਿੰਗ ਵਿੱਚੋਂ 62 ਮੈਡਲ, ਵਾਲੀਬਾਲ ਵਿੱਚੋਂ 54 ਮੈਡਲ, ਕੁੱਲ 458 ਮੈਡਲ ਹਾਸਿਲ ਕੀਤੇ ਗਏ ਹਨ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
