ਸਿੱਧੂ ਨੇ ਮੁੜ ਆਪਣੀ ਹੀ ਸਰਕਾਰ ਤੇ ਬੋਲਿਆ ਹਮਲਾ, ਮੁੱਖ ਮੰਤਰੀ ਚੰਨੀ ਦੇ ਐਲਾਨਾਂ ਨੂੰ ਦੱਸਿਆ ਝੂਠ-ਫਰੇਬ, ਕਿਹਾ ਵੰਡ ਰਹੇ ਲੌਲੀਪੌਪ
ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਨੇ ਇੱਕ ਵਾਰ ਫਿਰ ਆਪਣੀ ਹੀ ਪੰਜਾਬ ਸਰਕਾਰ 'ਤੇ ਵੱਡਾ ਹਮਲਾ ਬੋਲਿਆ ਹੈ।
ਚੰਡੀਗੜ੍ਹ: ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਨੇ ਇੱਕ ਵਾਰ ਫਿਰ ਆਪਣੀ ਹੀ ਪੰਜਾਬ ਸਰਕਾਰ 'ਤੇ ਵੱਡਾ ਹਮਲਾ ਬੋਲਿਆ ਹੈ। ਮੁੱਖ ਮੰਤਰੀ ਚੰਨੀ ਵੱਲੋਂ ਪੰਜਾਬ ਦੇ ਲੋਕਾਂ ਨੂੰ 3 ਰੁਪਏ ਬਿਜਲੀ ਸਸਤੀ ਕਰਕੇ ਦਿੱਤੇ ਤੋਹਫ਼ੇ ਨੂੰ ਸਿੱਧੂ ਨੇ ਝੂਠ ਤੇ ਫਰੇਬ ਕਰਾਰ ਦਿੱਤਾ ਹੈ।
ਸਿੱਧੂ ਚੰਡੀਗੜ੍ਹ ਵਿੱਚ ਸੰਯੁਕਤ ਹਿੰਦੂ ਮਹਾਸਭਾ ਦੇ ਪ੍ਰੋਗਰਾਮ ਨੂੰ ਸੰਬੋਧਨ ਕਰ ਰਹੇ ਸਨ। ਸਿੱਧੂ ਨੇ ਕਿਹਾ ਕਿ "ਸਾਢੇ ਪੰਜ ਸਾਲ ਮੌਜ ਮਸਤੀ ਕਰਨ ਤੋਂ ਬਾਅਦ ਪਿਛਲੇ ਦੋ ਮਹੀਨਿਆਂ ਤੋਂ ਲਾਲੀਪਾਪ ਵੰਡੇ ਜਾ ਰਹੇ ਹਨ।"
ਉਸ ਨੇ ਪੁੱਛਿਆ ਕਿ, "ਤੁਸੀਂ ਜੋ ਸਬਸਿਡੀ ਦਿਓਗੇ, ਇਹ ਪੈਸਾ ਕਿੱਥੋਂ ਆਵੇਗਾ?" ਸਿੱਧੂ ਨੇ ਕਿਹਾ ਕਿ "ਪੰਜਾਬ ਦੇ ਵਿਕਾਸ ਲਈ ਰੋਡ ਮੈਪ ਕੀ ਹੈ?" ਇਹ ਗੱਲ ਲੀਡਰਾਂ ਨੂੰ ਦੱਸਣੀ ਚਾਹੀਦੀ ਹੈ।
ਸਿੱਧੂ ਨੇ ਬਿਨਾਂ ਨਾਮ ਲਏ ਕਾਂਗਰਸ ਸਰਕਾਰ ਨੂੰ ਸਵਾਲ ਕੀਤਾ ਕਿ, "ਪੰਜਾਬ ਦੀ ਭਲਾਈ ਕਿਵੇਂ ਹੋਵੇਗੀ? ਕੋਈ ਨਹੀਂ ਦੱਸਦਾ। ਸਾਢੇ ਪੰਜ ਸਾਲਾਂ ਤੋਂ ਸਾਰੇ ਇੱਕ ਦੂਜੇ ਨੂੰ ਨੀਵਾਂ ਦਿਖਾਉਣ ਵਿੱਚ ਲੱਗੇ ਹੋਏ ਸਨ। ਅੱਤਿਆਚਾਰ ਕਰਦੇ ਰਹੇ। ਪਿਛਲੇ 2 ਮਹੀਨਿਆਂ 'ਚ ਅਸਮਾਨ ਨੂੰ ਜ਼ਮੀਨ 'ਤੇ ਲਿਆਂਦਾ ਜਾ ਰਿਹਾ ਹੈ। ਤਾਰਿਆਂ ਨੂੰ ਤੋੜ ਰਹੇ ਹਨ, ਕੋਈ ਦੱਸੇਗਾ ਕਿ ਇਹ ਸਭ ਕਿੱਥੋਂ ਦੇਣਗੇ? "
ਸਿੱਧੂ ਨੇ ਸਵਾਲ ਕੀਤਾ ਕਿ, "ਕੀ ਪੰਜਾਬ 'ਚ ਮਕਸਦ ਸਿਰਫ ਸਰਕਾਰ ਬਣਾਉਣਾ ਹੈ। ਸੱਤਾ ਵਿੱਚ ਆਉਣ ਅਤੇ ਇਸ ਲਈ ਝੂਠ ਬੋਲਣਾ। 500 ਝੂਠੇ ਵਾਅਦੇ ਕਰਕੇ ਸੱਤਾ ਹਾਸਲ ਕਰਨ ਦੇ ਯਤਨ ਕੀਤੇ ਜਾ ਰਹੇ ਹਨ। ਸਿੱਧੂ ਨੇ ਕਿਹਾ ਕਿ ਹੁਣ ਰਾਜਨੀਤੀ ਮਿਸ਼ਨ ਨਹੀਂ ਸਗੋਂ ਵਪਾਰ ਬਣ ਗਿਆ ਹੈ।"
ਸਿੱਧੂ ਨੇ ਕਿਹਾ ਕਿ, " ਪੰਜਾਬ ਸਿਰ 5 ਲੱਖ ਕਰੋੜ ਦਾ ਕਰਜ਼ਾ ਹੈ। ਕਮੇਟੀਆਂ ਅਤੇ ਰੈਸਟ ਹਾਊਸ ਗਿਰਵੀ ਹਨ। ਇਹ ਸਮਝੋ ਕਿ ਸਰਕਾਰ ਕਰਜ਼ਾ ਨਹੀਂ ਮੋੜੇਗੀ। ਇਹ ਲੋਕਾਂ ਨੂੰ ਦੇਣਾ ਪਵੇਗਾ। ਪੰਜਾਬ ਦਾ ਅਮੀਰ ਆਦਮੀ ਸਿਰਫ਼ 225 ਕਰੋੜ ਦਾ ਟੈਕਸ ਅਦਾ ਕਰਦਾ ਹੈ। ਆਮ ਆਦਮੀ ਆਟਾ, ਦਾਲ, ਚੀਨੀ ਅਤੇ ਨਮਕ ਵਰਗੀਆਂ ਚੀਜ਼ਾਂ 'ਤੇ ਲਗਭਗ 50 ਹਜ਼ਾਰ ਕਰੋੜ ਰੁਪਏ ਦਿੰਦਾ ਹੈ।"
ਸਿੱਧੂ ਨੇ ਕਿਹਾ ਕਿ, "ਜੇਕਰ ਕੋਈ ਤੁਹਾਨੂੰ ਕਹੇ ਕਿ ਪੰਜਾਬ ਦਾ ਖਜ਼ਾਨਾ ਭਰ ਗਿਆ ਹੈ ਤਾਂ ਇਹ ਕੋਰਾ ਝੂਠ ਹੈ। ਜੇਕਰ ਅਜਿਹਾ ਹੈ ਤਾਂ ਈ.ਟੀ.ਟੀ. ਅਧਿਆਪਕਾਂ ਨੂੰ 50-50 ਹਜ਼ਾਰ ਤਨਖਾਹ ਦਿੱਤੀ ਜਾਵੇ। ਜਿਨ੍ਹਾਂ ਨੂੰ 2004 ਤੋਂ ਪੈਨਸ਼ਨ ਨਹੀਂ ਮਿਲੀ ਉਨ੍ਹਾਂ ਨੂੰ ਪੈਨਸ਼ਨ ਦਿੱਤੀ ਜਾਵੇ। ਕੀ ਪੰਜਾਬ ਕੋਲ 50,000 ਕਰੋੜ ਰੁਪਏ ਦਾ ਸਰਪਲੱਸ ਹੈ? ਦਿੱਲੀ ਅਤੇ ਤਾਮਿਲਨਾਡੂ ਦੇ ਕੋਲ ਹੈ।" ਸਿੱਧੂ ਨੇ ਕਿਹਾ ਕਿ ਏਜੰਡੇ 'ਤੇ ਵੋਟ ਪਾਓ, ਕਿਸੇ ਦੇ ਲਾਲੀਪਾਪ 'ਤੇ ਨਹੀਂ। ਸਿੱਧੂ ਨੇ ਕਿਹਾ ਕਿ ਅਸੀਂ ਕਰਜ਼ਾ ਲੈ ਕੇ ਕਰਜ਼ਾ ਮੋੜ ਰਹੇ ਹਾਂ।
ਸਿੱਧੂ ਨੇ ਕਿਹਾ ਕਿ, "ਜੇਕਰ ਪੰਜਾਬ ਕੋਲ ਖਜ਼ਾਨਾ ਹੈ ਤਾਂ ਇੰਡਸਟਰੀ ਨੂੰ ਸਬਸਿਡੀ ਦਿਓ।" ਉਨ੍ਹਾਂ ਕਿਹਾ ਕਿ "ਪੰਜਾਬ ਵਿੱਚ 5.40 ਲੱਖ ਕਰੋੜ ਦਾ ਟੈਕਸ ਆਉਂਦਾ ਹੈ। ਇਹਨਾਂ ਵਿੱਚੋਂ, 75% ਸਿਰਫ ਉਦਯੋਗ ਤੋਂ ਉਪਲਬਧ ਹਨ।ਫਿਰ ਇੰਡਸਟਰੀ ਪੰਜਾਬ ਵਿੱਚ ਕਿਉਂ ਨਹੀਂ ਆ ਰਹੀ। ਤੁਸੀਂ ਹਿਮਾਚਲ ਪ੍ਰਦੇਸ਼ ਕਿਉਂ ਜਾ ਰਹੇ ਹੋ? ਪੰਜਾਬ 17-18ਵੇਂ ਨੰਬਰ 'ਤੇ ਕਿਉਂ?"
ਸਿੱਧੂ ਨੇ ਇਸ਼ਾਰਿਆਂ-ਇਸ਼ਾਰਿਆਂ ਵਿੱਚ ਇਹ ਵੀ ਸਪੱਸ਼ਟ ਕਰ ਦਿੱਤਾ ਕਿ ਉਹ ਅਗਲੀਆਂ ਚੋਣਾਂ ਵਿੱਚ ਪੰਜਾਬ ਦੇ ਮੁੱਖ ਮੰਤਰੀ ਦੇ ਅਹੁਦੇ ਦੇ ਦਾਅਵੇਦਾਰ ਹੋਣਗੇ। ਸਿੱਧੂ ਨੇ ਕਿਹਾ ਕਿ, "ਲੋਕਾਂ ਨੇ ਫੈਸਲਾ ਕਰਨਾ ਹੈ ਕਿ ਚੋਰ ਨੂੰ ਥਾਂ ਦੇਣੀ ਹੈ ਜਾਂ ਇਮਾਨਦਾਰ ਨੂੰ।"
ਉਨ੍ਹਾਂ ਕਿਹਾ ਕਿ, "ਇਸ ਵਾਰ ਪੰਜਾਬ ਨੂੰ ਪਾਰਟੀਆਂ ਤੋਂ ਉੱਪਰ ਉੱਠ ਕੇ ਵਾਰਸ ਦੀ ਚੋਣ ਕਰਨੀ ਪਵੇਗੀ। ਅੰਤ 'ਚ ਸਿੱਧੂ ਨੇ ਮੈਂ ਹੂੰ ਨਾ... ਕਹਿ ਕੇ ਆਪਣਾ ਸੰਬੋਧਨ ਖ਼ਤਮ ਕੀਤਾ।"
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
