ਅਮਰੀਕੀ ਰੇਡੀਓ ਨੇ ਉਡਾਇਆ ਦਸਤਾਰ ਦਾ ਮਜ਼ਾਕ, ਹੋਸਟਾਂ ਵਿਰੁੱਧ ਕਾਰਵਾਈ

ਨਿਊਯਾਰਕ: ਅਮਰੀਕਾ ਦੇ ਦੋ ਰੇਡੀਓ ਹੋਸਟਾਂ ਵੱਲੋਂ ਨਿਊਜਰਸੀ ਦੇ ਅਟਾਰਨੀ ਜਨਰਲ ਗੁਰਬੀਰ ਗਰੇਵਾਲ ਉੱਪਰ ਉਨ੍ਹਾਂ ਦੀ ਦਸਤਾਰ ਬਾਰੇ ਨਸਲੀ ਟਿੱਪਣੀਆਂ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਘਟਨਾ ਤੋਂ ਬਾਅਦ ਡੈਨਿਸ ਮਲੋਏ ਤੇ ਜੂਡੀ ਫਰੈਂਕੋ ਦੀ ਕਾਫੀ ਆਲੋਚਨਾ ਹੋ ਰਹੀ ਹੈ। ਕੀ ਕਿਹਾ ਰੇਡੀਓ ਹੋਸਟਾਂ ਨੇ- ਨਿਊ ਜਰਸੀ 101.5 ਐਫਐਮ ਰੇਡੀਓ 'ਤੇ ਚੱਲਣ ਵਾਲੇ ਦੋਵਾਂ ਦੇ ਪ੍ਰੋਗਰਾਮ ਡੈਨਿਸ ਐਂਡ ਜੂਡੀ ਸ਼ੋਅ ਵਿੱਚ ਦੋਵੇਂ ਪੇਸ਼ਕਰਤਾਵਾਂ ਨੇ ਗਰੇਵਾਲ ਦੇ ਨਸ਼ੀਲੇ ਪਦਾਰਥ 'ਭੰਗ' ਸਬੰਧੀ ਕੇਸਾਂ ਦੀ ਪੈਰਵੀ ਨੂੰ ਰੋਕਣ ਦੇ ਫੈਸਲੇ ਬਾਰੇ ਟਿੱਪਣੀ ਕਰਦਿਆਂ ਉਨ੍ਹਾਂ ਨੂੰ ਦਸਤਾਰਧਾਰੀ ਬੰਦਾ ਕਹਿ ਸੱਦਣਾ ਸ਼ੁਰੂ ਕਰ ਦਿੱਤਾ। ਦੋਵਾਂ ਨੇ ਪ੍ਰੋਗਰਾਮ ਦੌਰਾਨ ਕਿਹਾ ਕਿ ਜੇਕਰ ਅਜਿਹਾ ਕਹਿਣਾ ਬੁਰਾ ਲੱਗਦਾ ਹੈ ਤਾਂ ਤੁਸੀਂ ਦਸਤਾਰ ਨਾ ਪਹਿਨੋ ਤੇ ਮੈਂ ਤੁਹਾਡਾ ਨਾਂ ਹੀ ਯਾਦ ਰੱਖਾਂਗਾ। ਦਸਤਾਰ ਤੇ ਗਰੇਵਾਲ ਬਾਰੇ ਕੀਤੀ ਨਸਲੀ ਟਿੱਪਣੀ- ਇੰਨਾ ਹੀ ਨਹੀਂ ਪ੍ਰੋਗਰਾਮ ਵਿੱਚ ਮਲੋਏ ਨੇ ਕਿਹਾ ਕਿ ਜੇਕਰ ਤੁਸੀਂ ਮੈਨੂੰ ਬੇਸਬਾਲ ਹੈਟ ਵਾਲਾ ਬੰਦਾ ਸੱਦੋ ਤੇ ਜਿੱਥੇ ਮੈਂ ਰਹਿੰਦਾ ਹੋਵਾਂ ਉੱਥੇ ਕੋਈ ਵੀ ਅਜਿਹਾ ਬਣ ਕੇ ਰਹਿੰਦਾ ਹੋਵੇ ਤਾਂ ਕੀ ਮੈਨੂੰ ਬੁਰਾ ਮੰਨਣਾ ਚਾਹੀਦਾ ਹੈ? ਤਾਂ ਜੂਡੀ ਨੇ ਜਵਾਬ ਦਿੱਤਾ ਕਿ ਓਹ ਨਹੀਂ। ਇਸ ਤੋਂ ਬਾਅਦ ਵੀ ਉਨ੍ਹਾਂ ਅਟਾਰਨੀ ਜਨਰਲ ਨੂੰ ਦਸਤਾਰਧਾਰੀ ਬੰਦਾ ਕਹਿ ਕੇ ਸੱਦਿਆ ਤੇ ਕਿਹਾ ਉਹ ਸਤੰਬਰ ਤਕ ਮਾਮਲੇ ਦੀ ਪੈਰਵੀ ਨਹੀਂ ਕਰਨਗੇ। ਨਸਲੀ ਟਿੱਪਣੀ ਤੋਂ ਖਫ਼ਾ ਹੋਏ ਗਵਰਨਰ- ਪ੍ਰੋਗਰਾਮ ਪੇਸ਼ਕਾਰਾਂ ਦੀ ਇਸ ਬੇਸ਼ਰਮੀ ਉੱਪਰ ਨਿਊਜਰਸੀ ਦੇ ਗਵਰਨਰ ਫਿਲ ਮਰਫ਼ੀ ਨੇ ਟਵੀਟ ਕਰ ਰੇਡੀਓ ਸਟੇਸ਼ਨ ਤੋਂ ਦੋਵਾਂ ਵਿਰੁੱਧ ਕਾਰਵਾਈ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਪ੍ਰਬੰਧਕਾਂ ਨੂੰ ਨਾ ਸਹਿਣਯੋਗ ਤੇ ਨਸਲੀ ਟਿੱਪਣੀਆਂ ਲਈ ਪ੍ਰੋਗਰਾਮ ਪੇਸ਼ਕਾਰਾਂ 'ਤੇ ਕਾਰਵਾਈ ਜ਼ਰੂਰ ਕਰਨੀ ਚਾਹੀਦੀ ਹੈ। ਇਸ ਤੋਂ ਬਾਅਦ ਰੇਡੀਓ ਸਟੇਸ਼ਨ ਵੱਲੋਂ ਟਵੀਟ ਰਾਹੀਂ ਜਵਾਬ ਦਿੱਤਾ ਗਿਆ ਹੈ ਕਿ ਅਗਲੇ ਹੁਕਮਾਂ ਤਕ ਦੋਵਾਂ ਨੂੰ ਪ੍ਰੋਗਰਾਮ ਪੇਸ਼ ਕਰਨ ਤੋਂ ਹਟਾ ਦਿੱਤਾ ਗਿਆ ਹੈ। ਨਸਲੀ ਟਿੱਪਣੀ ਕਰਨ ਵਾਲਿਆਂ ਨੂੰ ਸਿੱਖ ਮੇਅਰ ਦਾ ਜਵਾਬ- ਨਿਊਜਰਸੀ ਦੇ ਹੋਬੋਕਨ ਤੋਂ ਪਹਿਲੇ ਸਿੱਖ ਅਮਰੀਕੀ ਮੇਅਰ ਰਵੀ ਭੱਲਾ ਨੇ ਵੀ ਇਸ ਮਾਮਲੇ 'ਤੇ ਗੰਭੀਰ ਨੋਟਿਸ ਲੈਂਦਿਆਂ ਦੋਵਾਂ ਰੇਡੀਓ ਪੇਸ਼ਕਾਰਾਂ ਨੂੰ ਕਿਹਾ ਕਿ ਉਹ ਇਸ ਤਰ੍ਹਾਂ ਦਾ ਨਸਲੀ ਕੂੜਾ ਇੱਥੇ ਨਾ ਫੈਲਾਉਣ। ਉਨ੍ਹਾਂ ਦੋਵਾਂ ਨੂੰ ਨਸਲੀਵਾਦੀ ਸੰਬੋਧਨ ਕਰਦਿਆਂ ਕਿਹਾ ਕਿ ਮੈਂ ਜਰਸੀ ਦਾ ਬਾਸ਼ਿੰਦਾ ਹਾਂ, ਇੱਥੇ ਪੈਦਾ ਤੇ ਵੱਡਾ ਹੋਇਆ ਤੇ ਇੰਝ ਹੀ ਨਿਊਜਰਸੀ ਦੇ ਅਟਾਰਨੀ ਜਨਰਲ ਗਰੇਵਾਲ ਹਨ। ਭੱਲਾ ਨੇ ਗਵਰਨਰ ਮਰਫ਼ੀ ਦੀ ਇਸ ਘਟਨਾ ਦੀ ਨਿੰਦਾ ਕਰਨ 'ਤੇ ਸ਼ਲਾਘਾ ਵੀ ਕੀਤੀ।