ਸਿਰਫ 10 ਰੁਪਏ 'ਚ ਗੰਭੀਰ ਤੋਂ ਗੰਭੀਰ ਇਲਾਜ ਕਰਦਾ MBBS ਡਾਕਟਰ, ਲੋਕ ਰੋਂਦੇ ਆਉਂਦੇ ਤੇ ਹੱਸਦੇ ਹੋਏ ਜਾਂਦੇ

ਦੇਸ਼ 'ਚ ਮਹਿੰਗਾਈ ਅਸਮਾਨ ਨੂੰ ਛੂਹ ਰਹੀ ਹੈ ਤੇ ਗਰੀਬਾਂ ਨੂੰ ਢਿੱਡ ਭਰਨਾ ਮੁਸ਼ਕਲ ਹੋ ਰਿਹਾ ਹੈ। ਅਜਿਹੇ 'ਚ ਨਾਲੰਦਾ ਦਾ ਇੱਕ ਐਮਬੀਬੀਐਸ ਡਾਕਟਰ ਸਹੀ ਅਰਥਾਂ 'ਚ ਧਰਤੀ ਦੇ ਰੱਬ ਦਾ ਫਰਜ਼ ਨਿਭਾਅ ਰਿਹਾ ਹੈ।

ਸੰਕੇਤਕ ਤਸਵੀਰ

ਨਾਲੰਦਾ: ਦੇਸ਼ 'ਚ ਮਹਿੰਗਾਈ ਅਸਮਾਨ ਨੂੰ ਛੂਹ ਰਹੀ ਹੈ ਤੇ ਗਰੀਬਾਂ ਨੂੰ ਢਿੱਡ ਭਰਨਾ ਮੁਸ਼ਕਲ ਹੋ ਰਿਹਾ ਹੈ। ਅਜਿਹੇ 'ਚ ਨਾਲੰਦਾ ਦਾ ਇੱਕ ਐਮਬੀਬੀਐਸ ਡਾਕਟਰ ਸਹੀ ਅਰਥਾਂ 'ਚ ਧਰਤੀ ਦੇ ਰੱਬ ਦਾ ਫਰਜ਼ ਨਿਭਾਅ ਰਿਹਾ ਹੈ। ਨਾਲੰਦਾ ਦੇ ਬੇਨ ਥਾਣਾ ਖੇਤਰ ਦੇ ਹਾਂਡੀ ਬੀਘਾ ਪਿੰਡ ਦਾ ਰਹਿਣ ਵਾਲਾ ਓਮ ਪ੍ਰਕਾਸ਼ ਆਰੀਆ ਪਿਛਲੇ 30 ਸਾਲਾਂ ਤੋਂ ਪਰਬਲਪੁਰ ਬਾਜ਼ਾਰ ਨੇੜੇ ਸੜਕ ਕਿਨਾਰੇ ਕਲੀਨਕ ਖੋਲ੍ਹ ਕੇ ਮਰੀਜ਼ਾਂ ਦੀ ਸੇਵਾ ਕਰ ਰਿਹਾ ਹੈ। ਫੀਸ ਦਸ ਰੁਪਏ ਹੋਣ ਕਾਰਨ ਇੱਥੇ ਰੋਜ਼ਾਨਾ ਸੈਂਕੜੇ ਮਰੀਜ਼ ਪਹੁੰਚਦੇ ਹਨ। ਇਲਾਜ ਤੋਂ ਬਾਅਦ ਮਰੀਜ਼ ਤੇ ਉਨ੍ਹਾਂ ਦੇ ਪਰਿਵਾਰ ਵਾਲੇ ਖੁਸ਼ ਹੋ ਕੇ ਡਾਕਟਰ ਦੀ ਤਾਰੀਫ ਕਰਦੇ ਹਨ।

ਸੀਮਤ ਸਾਧਨਾਂ ਵਿੱਚ ਡਾ. ਓਮ ਪ੍ਰਕਾਸ਼ ਆਰੀਆ ਝੁੱਗੀ-ਝੌਂਪੜੀ ਵਿੱਚ ਮਰੀਜ਼ਾਂ ਦਾ ਇਲਾਜ ਕਰ ਰਹੇ ਹਨ। ਪਿੰਡ ਵਾਸੀਆਂ ਅਨੁਸਾਰ ਡਾਕਟਰ ਪਿਛਲੇ ਕਰੀਬ 30 ਸਾਲਾਂ ਤੋਂ ਮਰੀਜ਼ਾਂ ਦੀ ਸੇਵਾ ਵਿੱਚ ਲੱਗੇ ਹੋਏ ਹਨ। ਪਹਿਲਾਂ ਤਾਂ ਉਹ ਸਿਰਫ਼ ਚਾਰ ਆਨੇ ਵਿੱਚ ਮਰੀਜ਼ਾਂ ਨੂੰ ਦੇਖਦੇ ਸੀ। ਹੌਲੀ-ਹੌਲੀ ਮਹਿੰਗਾਈ ਹੋਣ ਕਰਕੇ ਹੁਣ 10 ਰੁਪਏ ਲੈਂਦੇ ਹਨ। ਲੋਕਾਂ ਨੇ ਕਿਹਾ ਕਿ ਅਸਮਾਨੀ ਚੜ੍ਹਦੀ ਮਹਿੰਗਾਈ ਵਿੱਚ ਗਰੀਬ ਮਰੀਜ਼ਾਂ ਲਈ 10 ਰੁਪਏ ਦੀ ਫੀਸ ਕਿਸੇ ਵਰਦਾਨ ਤੋਂ ਘੱਟ ਨਹੀਂ ਹੈ।

ਦੱਸਿਆ ਜਾਂਦਾ ਹੈ ਕਿ ਓਮ ਪ੍ਰਕਾਸ਼ ਆਰੀਆ ਜ਼ਿਮੀਂਦਾਰ ਪਰਿਵਾਰ ਨਾਲ ਸਬੰਧਤ ਹਨ। ਉਹ ਦੋ ਭਰਾਵਾਂ ਵਿੱਚੋਂ ਸਭ ਤੋਂ ਵੱਡੇ ਹਨ। ਤਜਰਬੇਕਾਰ ਡਾਕਟਰ ਦਾ ਹੁਨਰ ਅਜਿਹਾ ਹੈ ਕਿ ਮਰੀਜ਼ ਰੋਂਦਾ ਹੋਇਆ ਆਉਂਦਾ ਹੈ, ਪਰ ਇੱਥੋਂ ਹੱਸਦਾ ਹੋਇਆ ਜਾਂਦਾ ਹੈ। ਡਾਕਟਰ ਓਮ ਪ੍ਰਕਾਸ਼ ਆਰੀਆ ਨੂੰ ਉਨ੍ਹਾਂ ਦੀ ਸੇਵਾ ਭਾਵਨਾ ਕਾਰਨ ਇਲਾਕੇ ਵਿੱਚ ਕਾਫੀ ਸਤਿਕਾਰ ਦਿੱਤਾ ਜਾਂਦਾ ਹੈ।

ਦੱਸਿਆ ਜਾਂਦਾ ਹੈ ਕਿ ਡਾਕਟਰ ਓਮ ਪ੍ਰਕਾਸ਼ ਆਰੀਆ ਕੋਲ ਵਿਸ਼ੇਸ਼ ਸਹੂਲਤਾਂ ਨਹੀਂ। ਉਹ ਇੱਥੇ ਮਰੀਜ਼ਾਂ ਦਾ ਇਲਾਜ ਸਿਰਫ਼ ਝੌਂਪੜੀਆਂ ਵਿੱਚ ਚੌਕੀਆਂ 'ਤੇ ਹੀ ਕਰਦੇ ਹਨ। ਖਾਸ ਗੱਲ ਇਹ ਵੀ ਹੈ ਕਿ ਉਹ ਅਜਿਹੀ ਦਵਾਈ ਲਿਖਦੇ ਹਨ, ਜਿਸ ਦੀ ਕੀਮਤ ਘੱਟ ਹੁੰਦੀ ਹੈ ਤੇ ਅਸਰਦਾਰ ਵੀ ਹੁੰਦੀ ਹੈ। ਸਸਤੀਆਂ ਦਵਾਈਆਂ ਦੇਣ ਵਾਲੀਆਂ ਕੰਪਨੀਆਂ ਦੇ ਨੁਮਾਇੰਦੇ ਹੀ ਉਨ੍ਹਾਂ ਨੂੰ ਮਿਲਦੇ ਹਨ।

ਮਰੀਜ਼ਾਂ ਨੇ ਕਿਹਾ- ਰੱਬ ਤੋਂ ਘੱਟ ਨਹੀਂ
ਇਲਾਜ ਕਰਵਾ ਰਹੇ ਇੱਕ ਮਰੀਜ਼ ਨੇ ਦੱਸਿਆ ਕਿ ਕੌਣ ਐਮਬੀਬੀਐਸ ਡਾਕਟਰ ਦਸ ਰੁਪਏ ਫੀਸ ਲੈ ਕੇ ਇਲਾਜ ਕਰਦਾ ਹੈ। ਡਾਕਟਰ ਓਮ ਪ੍ਰਕਾਸ਼ ਆਰੀਆ ਗਰੀਬਾਂ ਦਾ ਇਲਾਜ ਨਹੀਂ, ਸੇਵਾ ਕਰ ਰਹੇ ਹਨ। ਉਹ ਮਰੀਜ਼ਾਂ ਲਈ ਰੱਬ ਤੋਂ ਘੱਟ ਨਹੀਂ ਹੈ। ਮਰੀਜ਼ ਕਲਾਵਤੀ ਦੇਵੀ ਨੇ ਦੱਸਿਆ ਕਿ ਉਹ ਪਹਿਲਾਂ ਵੀ ਇਸ ਕਲੀਨਿਕ ਵਿੱਚ ਆਪਣੇ ਇਲਾਜ ਲਈ ਆਉਂਦੀ ਸੀ। ਇਸ ਤੋਂ ਬਾਅਦ ਹੁਣ ਬੱਚੇ ਪੋਤੇ-ਪੋਤੀਆਂ ਦਾ ਵੀ ਇਲਾਜ ਕਰਵਾ ਰਹੇ ਹਨ।

ਕੀ ਕਹਿੰਦੇ ਇਲਾਜ ਕਰਨ ਵਾਲੇ ਡਾਕਟਰ?
ਓਮ ਪ੍ਰਕਾਸ਼ ਆਰੀਆ ਨੇ ਕਿਹਾ ਕਿ ਇਹ ਪ੍ਰਭੂ ਦਾ ਸ਼ੁਕਰਾਨਾ ਹੈ, ਜਿਸ ਨੇ ਮੈਨੂੰ ਗਰੀਬ ਮਰੀਜ਼ਾਂ ਦੀ ਸੇਵਾ ਕਰਨ ਦੇ ਯੋਗ ਬਣਾਇਆ। ਇਸ ਦੌਰਾਨ ਡਾਕਟਰ ਨੇ ਆਪਣੇ ਕੰਮ ਸਬੰਧੀ ਵਿਸਥਾਰਪੂਰਵਕ ਜਾਣਕਾਰੀ ਨਾ ਦਿੰਦਿਆਂ ਕਿਹਾ ਕਿ ਤੁਸੀਂ ਮਰੀਜ਼ਾਂ ਤੋਂ ਹੀ ਪਤਾ ਕਰੋ। ਉਨ੍ਹਾਂ ਇਸ ਸੇਵਾ ਦਾ ਮੀਡੀਆ ਵਿੱਚ ਪ੍ਰਚਾਰ ਨਾ ਕਰਨ ਦੀ ਵੀ ਅਪੀਲ ਕੀਤੀ।