Bullet Train Update:ਬੁਲੇਟ ਟਰੇਨ ਦਾ ਸੁਪਨਾ ਜਲਦ ਸਾਕਾਰ ਹੋਵੇਗਾ, ਰੇਲ ਮੰਤਰੀ ਨੇ ਵੀਡੀਓ ਸ਼ੇਅਰ ਕਰਕੇ ਦਿੱਤਾ ਵੱਡਾ ਅਪਡੇਟ

Bullet Train Update:ਮੁੰਬਈ-ਅਹਿਮਦਾਬਾਦ ਬੁਲੇਟ ਟਰੇਨ ਪ੍ਰਾਜੈਕਟ ਦਾ ਕੰਮ ਤੇਜ਼ੀ ਨਾਲ ਚੱਲ ਰਿਹਾ ਹੈ। ਇਸ ਪ੍ਰੋਜੈਕਟ ਦਾ ਇੱਕ ਕਿਲੋਮੀਟਰ ਲਗਾਤਾਰ ਵਾਇਆਡਕਟ ਪੂਰਾ ਹੋ ਚੁੱਕਾ ਹੈ।

Bullet Train Update

Mumbai-Ahmedabad Bullet Train: ਮੁੰਬਈ-ਅਹਿਮਦਾਬਾਦ ਬੁਲੇਟ ਟਰੇਨ ਪ੍ਰੋਜੈਕਟ ਨੂੰ ਲੈ ਕੇ ਇੱਕ ਵੱਡਾ ਅਪਡੇਟ ਸਾਹਮਣੇ ਆਇਆ ਹੈ। ਇਸ ਬੁਲੇਟ ਟਰੇਨ ਪ੍ਰਾਜੈਕਟ ਦਾ ਕੰਮ ਦਿਨ-ਰਾਤ ਚੱਲ ਰਿਹਾ ਹੈ। ਇਸ ਦੌਰਾਨ, 1 ਕਿਲੋਮੀਟਰ ਲਗਾਤਾਰ ਵਾਇਆਡਕਟ ਨੂੰ ਪੂਰਾ ਕੀਤਾ ਗਿਆ ਹੈ। ਇਹ ਜਾਣਕਾਰੀ ਖੁਦ ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਦਿੱਤੀ ਹੈ। ਉਨ੍ਹਾਂ ਨੇ ਇਸ ਦੀ ਇੱਕ ਵੀਡੀਓ ਵੀ ਟਵਿੱਟਰ 'ਤੇ ਸ਼ੇਅਰ ਕੀਤੀ ਹੈ।

1 ਕਿਲੋਮੀਟਰ ਲਗਾਤਾਰ ਵਾਇਆਡਕਟ ਪੂਰਾ ਹੋਇਆ

ਤੁਹਾਨੂੰ ਦੱਸ ਦੇਈਏ ਕਿ ਬੁਲੇਟ ਟਰੇਨ ਅਗਲੇ ਸਾਲ ਯਾਨੀ 2023 'ਚ ਚੱਲਣੀ ਸੀ ਪਰ ਮਹਾਰਾਸ਼ਟਰ 'ਚ ਜ਼ਮੀਨ ਐਕਵਾਇਰ ਦੀ ਰਫਤਾਰ ਮੱਠੀ ਹੋਣ ਕਾਰਨ ਇਸ 'ਚ ਦੇਰੀ ਹੋ ਰਹੀ ਹੈ। ਪਰ ਹੁਣ ਬੁਲੇਟ ਟਰੇਨ ਦਾ ਕੰਮ ਤੇਜ਼ੀ ਨਾਲ ਚੱਲ ਰਿਹਾ ਹੈ। ਰੇਲ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਵੀਡੀਓ ਨੂੰ ਟਵੀਟ ਕਰਦੇ ਹੋਏ ਕਿਹਾ, 'MAHSR (ਮੁੰਬਈ-ਅਹਿਮਦਾਬਾਦ ਹਾਈ-ਸਪੀਡ ਰੇਲ ਕੋਰੀਡੋਰ) ਨੇ ਇੱਕ ਹੋਰ ਮੀਲ ਪੱਥਰ ਹਾਸਲ ਕੀਤਾ ਹੈ। ਮੇਡ ਇਨ ਇੰਡੀਆ ਦੇ ਤਹਿਤ ਫੁੱਲ ਸਪੈਨ ਗਰਡਰ ਲਾਂਚਰਾਂ ਰਾਹੀਂ ਪਹਿਲੇ 1 ਕਿਲੋਮੀਟਰ ਲਗਾਤਾਰ ਵਾਇਆਡਕਟ ਦਾ ਕੰਮ ਪੂਰਾ ਕੀਤਾ ਗਿਆ ਹੈ।

 

ਜ਼ਮੀਨ ਪ੍ਰਾਪਤੀ ਦਾ 98.8 ਫੀਸਦੀ ਕੰਮ ਮੁਕੰਮਲ

ਹਾਲ ਹੀ 'ਚ ਭਾਰਤੀ ਰੇਲਵੇ ਨੇ ਟਵੀਟ ਕੀਤਾ ਸੀ ਕਿ ਮੁੰਬਈ-ਅਹਿਮਦਾਬਾਦ ਬੁਲੇਟ ਟਰੇਨ ਪ੍ਰੋਜੈਕਟ ਲਈ ਕਿੰਨਾ ਕੰਮ ਪੂਰਾ ਹੋ ਗਿਆ ਹੈ। ਰੇਲਵੇ ਨੇ ਦੱਸਿਆ ਸੀ ਕਿ ਇਸ ਪ੍ਰੋਜੈਕਟ ਲਈ ਲਗਭਗ 98.8 ਫੀਸਦੀ ਜ਼ਮੀਨ ਐਕਵਾਇਰ ਦਾ ਕੰਮ ਪੂਰਾ ਹੋ ਚੁੱਕਾ ਹੈ। ਇਸ ਦੇ ਨਾਲ ਹੀ 162 ਕਿਲੋਮੀਟਰ ਲੰਬੇ ਰੂਟ ਵਿੱਚ ਪਾਇਲਿੰਗ ਦਾ ਕੰਮ ਵੀ ਪੂਰਾ ਕਰ ਲਿਆ ਗਿਆ ਹੈ। ਰੇਲਵੇ ਨੇ ਅੱਗੇ ਦੱਸਿਆ ਕਿ ਪ੍ਰੋਜੈਕਟ ਦੇ 79.2 ਕਿਲੋਮੀਟਰ ਤੱਕ ਦੇ ਪੀਅਰ ਦਾ ਕੰਮ ਵੀ ਪੂਰਾ ਹੋ ਗਿਆ ਹੈ।

ਪੀਐਮ ਮੋਦੀ ਨੇ 2017 ਵਿੱਚ ਨੀਂਹ ਪੱਥਰ ਰੱਖਿਆ ਸੀ

ਤੁਹਾਨੂੰ ਦੱਸ ਦੇਈਏ ਕਿ ਮੁੰਬਈ-ਅਹਿਮਦਾਬਾਦ ਬੁਲੇਟ ਟਰੇਨ ਪ੍ਰੋਜੈਕਟ 508.17 ਕਿਲੋਮੀਟਰ ਦਾ ਹੈ। ਇਸ ਪ੍ਰੋਜੈਕਟ ਦਾ ਨੀਂਹ ਪੱਥਰ 14 ਸਤੰਬਰ 2017 ਨੂੰ ਦੇਸ਼ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਜਾਪਾਨ ਦੇ ਤਤਕਾਲੀ ਪ੍ਰਧਾਨ ਮੰਤਰੀ ਸ਼ਿੰਜੋ ਆਬੇ ਨੇ ਰੱਖਿਆ ਸੀ। ਇਹ ਪ੍ਰੋਜੈਕਟ 1.10 ਲੱਖ ਕਰੋੜ ਰੁਪਏ ਦਾ ਹੈ।ਇਸ ਰੇਲ ਮਾਰਗ ਵਿੱਚ ਗੁਜਰਾਤ ਦੇ ਵਲਸਾਡ, ਨਵਸਾਰੀ, ਸੂਰਤ, ਭਰੂਚ, ਵਡੋਦਰਾ, ਆਨੰਦ, ਖੇੜਾ ਅਤੇ ਅਹਿਮਦਾਬਾਦ ਸ਼ਾਮਲ ਹਨ। ਇਸ ਪ੍ਰੋਜੈਕਟ ਵਿੱਚ 12 ਰੇਲਵੇ ਸਟੇਸ਼ਨ ਹੋਣਗੇ ਜਿਸ ਵਿੱਚ ਗੁਜਰਾਤ ਵਿੱਚ 8 ਅਤੇ ਮਹਾਰਾਸ਼ਟਰ ਵਿੱਚ 4 ਸਟੇਸ਼ਨ ਸ਼ਾਮਲ ਹਨ।