ਪਹਾੜਾਂ 'ਚ ਮੀਂਹ ਤੇ ਜ਼ਮੀਨ ਖਿਸਕਣ ਨਾਲ ਭਾਰੀ ਤਬਾਹੀ, 1500 ਤੋਂ ਵੱਧ ਸੈਲਾਨੀ ਫਸੇ, ਕਈ ਲਾਪਤਾ, ਇੱਕ ਦੀ ਮੌਤ
Sikkim News: ਉੱਤਰੀ ਸਿੱਕਮ ਵਿੱਚ ਭਾਰੀ ਮੀਂਹ ਅਤੇ ਜ਼ਮੀਨ ਖਿਸਕਣ ਕਾਰਨ ਸਥਿਤੀ ਹੋਰ ਵੀ ਵਿਗੜ ਗਈ ਹੈ। ਸ਼ਨੀਵਾਰ ਨੂੰ, ਲਾਚੇਨ ਅਤੇ ਲਾਚੁੰਗ ਖੇਤਰਾਂ ਵਿੱਚ ਲਗਭਗ 1,500 ਸੈਲਾਨੀ ਫਸੇ ਹੋਏ ਹਨ।
Sikkim News: ਉੱਤਰੀ ਸਿੱਕਮ ਵਿੱਚ ਭਾਰੀ ਬਾਰਿਸ਼ ਤੇ ਜ਼ਮੀਨ ਖਿਸਕਣ ਕਾਰਨ ਸਥਿਤੀ ਗੰਭੀਰ ਹੋ ਗਈ ਹੈ। ਸ਼ਨੀਵਾਰ ਨੂੰ ਲਾਚੇਨ ਤੇ ਲਾਚੁੰਗ ਖੇਤਰਾਂ ਵਿੱਚ ਲਗਭਗ 1,500 ਸੈਲਾਨੀ ਫਸੇ ਹੋਏ ਹਨ। ਮੰਗਨ ਜ਼ਿਲ੍ਹੇ ਦੇ ਐਸਪੀ ਸੋਨਮ ਦੇਚੂ ਭੂਟੀਆ ਨੇ ਕਿਹਾ ਕਿ 115 ਸੈਲਾਨੀ ਲਾਚੇਨ ਵਿੱਚ ਅਤੇ 1,350 ਸੈਲਾਨੀ ਲਾਚੁੰਗ ਵਿੱਚ ਰਹਿ ਰਹੇ ਹਨ। ਜ਼ਮੀਨ ਖਿਸਕਣ ਕਾਰਨ ਦੋਵਾਂ ਪਾਸਿਆਂ ਤੋਂ ਸੜਕਾਂ ਬੰਦ ਕਰ ਦਿੱਤੀਆਂ ਗਈਆਂ ਹਨ। ਸਾਰੇ ਸੈਲਾਨੀਆਂ ਨੂੰ ਫਿਲਹਾਲ ਆਪਣੇ ਹੋਟਲਾਂ ਵਿੱਚ ਰਹਿਣ ਦੀ ਸਲਾਹ ਦਿੱਤੀ ਗਈ ਹੈ।
ਵੀਰਵਾਰ ਰਾਤ ਨੂੰ ਲਾਚੇਨ-ਲਾਚੁੰਗ ਹਾਈਵੇਅ 'ਤੇ ਮੁਨਸਿਥਾਂਗ ਨੇੜੇ ਇੱਕ ਸੈਲਾਨੀ ਵਾਹਨ ਲਗਭਗ 1000 ਫੁੱਟ ਦੀ ਡੂੰਘਾਈ 'ਤੇ ਤੀਸਤਾ ਨਦੀ ਵਿੱਚ ਡਿੱਗ ਗਿਆ। ਇਸ ਹਾਦਸੇ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਜਦੋਂ ਕਿ ਦੋ ਨੂੰ ਗੰਭੀਰ ਹਾਲਤ ਵਿੱਚ ਗੰਗਟੋਕ ਦੇ ਐਸਟੀਐਨਐਮ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਵਾਹਨ ਵਿੱਚ ਕੁੱਲ 11 ਲੋਕ ਸਵਾਰ ਸਨ, ਜਿਨ੍ਹਾਂ ਵਿੱਚੋਂ 8 ਅਜੇ ਵੀ ਲਾਪਤਾ ਹਨ।
ਕੌਣ-ਕੌਣ ਹੋਇਆ ਲਾਪਤਾ
ਓਡੀਸ਼ਾ: ਅਜੀਤ ਕੁਮਾਰ ਨਾਇਕ, ਸੁਨੀਤਾ ਨਾਇਕ, ਸਾਹਿਲ ਜੇਨਾ, ਇਤਸਿਰੀ ਜੇਨਾ
ਤ੍ਰਿਪੁਰਾ: ਦੇਬਜਯੋਤੀ ਜੋਏ ਦੇਵ, ਸਵਪਨਿਲ ਦੇਬ
ਉੱਤਰ ਪ੍ਰਦੇਸ਼: ਕੌਸ਼ਲੇਂਦਰ ਪ੍ਰਤਾਪ ਸਿੰਘ, ਅੰਕਿਤਾ ਸਿੰਘ
ਜਾਣਕਾਰੀ ਮੁਤਾਬਕ, ਭਾਰੀ ਬਾਰਸ਼ ਕਾਰਨ ਤੀਸਤਾ ਨਦੀ ਦਾ ਪਾਣੀ ਦਾ ਪੱਧਰ ਤੇਜ਼ੀ ਨਾਲ ਵਧਿਆ ਹੈ, ਜਿਸ ਕਾਰਨ ਬਚਾਅ ਕਾਰਜਾਂ ਵਿੱਚ ਰੁਕਾਵਟ ਆਈ। ਸ਼ਨੀਵਾਰ ਨੂੰ ਨਦੀ ਦੇ ਕੰਢੇ ਤੋਂ ਚਾਰ ਪਛਾਣ ਪੱਤਰ ਤੇ ਛੇ ਮੋਬਾਈਲ ਬਰਾਮਦ ਕੀਤੇ ਗਏ। ਜ਼ਿਲ੍ਹਾ ਕੁਲੈਕਟਰ ਅਨੰਤ ਜੈਨ ਖੁਦ ਮੌਕੇ 'ਤੇ ਮੌਜੂਦ ਹਨ ਤੇ ਬਚਾਅ ਕਾਰਜਾਂ ਦੀ ਨਿਗਰਾਨੀ ਕਰ ਰਹੇ ਹਨ।
ਤੇਜ਼ ਵਹਾਅ ਕਾਰਨ ਮੰਗਨ ਨੂੰ ਚੁੰਗਥਾਂਗ ਨਾਲ ਜੋੜਨ ਵਾਲਾ ਫਿਡਾਂਗ ਬੇਲੀ ਪੁਲ ਵੀ ਅੰਸ਼ਕ ਤੌਰ 'ਤੇ ਨੁਕਸਾਨਿਆ ਗਿਆ ਹੈ। ਪੁਲ ਦੀ ਮੁਰੰਮਤ ਦਾ ਕੰਮ ਐਤਵਾਰ ਸਵੇਰ ਤੋਂ ਹੀ ਚੱਲ ਰਿਹਾ ਹੈ।
ਸ਼ੁੱਕਰਵਾਰ ਦੁਪਹਿਰ ਤੋਂ ਵਿਘਨ ਪਈ ਬਿਜਲੀ ਸਪਲਾਈ ਸ਼ਨੀਵਾਰ ਸ਼ਾਮ ਤੱਕ ਬਹਾਲ ਕਰ ਦਿੱਤੀ ਗਈ। ਸ਼ਨੀਵਾਰ ਦੁਪਹਿਰ 3 ਵਜੇ ਦੇ ਕਰੀਬ ਮੋਬਾਈਲ ਨੈੱਟਵਰਕ ਮੁੜ ਸ਼ੁਰੂ ਹੋ ਗਿਆ। ਪੀਣ ਵਾਲੇ ਪਾਣੀ ਦੀ ਸਪਲਾਈ ਬਹਾਲ ਕਰਨ ਦੀਆਂ ਕੋਸ਼ਿਸ਼ਾਂ ਐਤਵਾਰ ਤੱਕ ਜਾਰੀ ਰਹੀਆਂ। ਸਥਿਤੀ ਨੂੰ ਦੇਖਦੇ ਹੋਏ, ਪ੍ਰਸ਼ਾਸਨ ਨੇ ਸ਼ਨੀਵਾਰ ਨੂੰ ਕਿਸੇ ਵੀ ਸੈਲਾਨੀ ਨੂੰ ਪਰਮਿਟ ਜਾਰੀ ਨਹੀਂ ਕੀਤਾ ਤੇ ਐਤਵਾਰ ਨੂੰ ਵੀ ਕੋਈ ਪਰਮਿਟ ਜਾਰੀ ਨਾ ਕਰਨ ਦਾ ਫੈਸਲਾ ਕੀਤਾ ਹੈ।
ਮੌਸਮ ਵਿਭਾਗ ਅਤੇ ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਬੇਲੋੜੀ ਯਾਤਰਾ ਤੋਂ ਬਚਣ, ਘਰ ਦੇ ਅੰਦਰ ਰਹਿਣ ਅਤੇ ਨਦੀ ਜਾਂ ਅਸਥਿਰ ਢਲਾਣਾਂ ਦੇ ਨੇੜੇ ਨਾ ਜਾਣ। ਲਗਾਤਾਰ ਭਾਰੀ ਬਾਰਸ਼ ਕਾਰਨ ਹੋਰ ਜ਼ਮੀਨ ਖਿਸਕਣ ਦੀ ਸੰਭਾਵਨਾ ਹੈ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
