ਜਬ ਚਿੜੀਆਂ ਚੁਗ ਗਈਂ ਖੇਤ...! ਸਿੱਧੂ ਖ਼ਿਲਾਫ ਅਕਾਲੀਆਂ ਦੇ ਖੜਕੇ-ਦੜਕੇ ਮਗਰੋਂ ਹੁਣ ਜਾਗੇ ਕਾਂਗਰਸੀ

ਚੰਡੀਗੜ੍ਹ: ਬੀਤੇ ਦਿਨੀਂ ਸਾਲ 2019-20 ਲਈ ਪੰਜਾਬ ਦਾ ਬਜਟ ਪੇਸ਼ ਕੀਤੇ ਜਾਣ ਸਮੇਂ ਅਕਾਲੀ ਦਲ ਨੇ ਜਿੱਥੇ ਨਵਜੋਤ ਸਿੱਧੂ ਖ਼ਿਲਾਫ਼ ਜ਼ਬਰਦਸਤ ਪ੍ਰਦਰਸ਼ਨ ਕੀਤਾ, ਉੱਥੇ ਆਪਣੀ ਅਹਿਮੀਅਤ ਵੀ ਜਤਾ ਦਿੱਤੀ। ਹੁਣ ਕਾਂਗਰਸੀਆਂ ਨੂੰ ਵੀ ਸਭ ਕੁਝ ਹੋਣ ਵਾਪਰਨ 'ਤੇ ਭਾਜੀ ਮੋੜਨ ਦਾ ਚੇਤਾ ਆਇਆ ਹੈ। ਇਸ ਲਈ ਮਜੀਠੀਆ ਤੇ ਬਾਦਲ ਦੇ ਪਾਕਿਸਤਾਨ ਦੌਰੇ 'ਤੇ ਸਵਾਲ ਚੁੱਕਦਿਆਂ ਕੁਝ ਤਸਵੀਰਾਂ ਫੜ ਵਿਧਾਨ ਸਭਾ ਦੇ ਬਾਹਰ ਪ੍ਰਦਰਸ਼ਨ ਕੀਤਾ ਹੈ। ਕਾਂਗਰਸੀ ਵਿਧਾਇਕਾਂ ਨੇ ਵਿਧਾਨ ਸਭਾ ਦੇ ਬਾਹਰ ਬਿਕਰਮ ਮਜੀਠੀਆ ਤੇ ਸੁਖਬੀਰ ਬਾਦਲ ਦੀਆਂ ਪਾਕਿਸਤਾਨ ਵਿੱਚ ਗੋਲ ਗੱਪੇ ਖਾਂਦਿਆਂ ਦੀਆਂ ਤਸਵੀਰਾਂ ਲਹਿਰਾ ਪ੍ਰਦਰਸ਼ਨ ਕੀਤਾ। ਤਸਵੀਰਾਂ ਦਰਸਾਉਂਦੇ ਹੋਏ ਵਿਧਾਇਕ ਡਾ. ਹਰਜੋਤ ਕਮਲ ਨੇ ਕਿਹਾ ਕਿ ਅਕਾਲੀ ਦਲ ਜੋ ਨਵਜੋਤ ਸਿੰਘ ਸਿੱਧੂ ਦੇ ਪਾਕਿਸਤਾਨ ਦੀ ਜੱਫੀ ਦੀ ਖ਼ਿਲਾਫ਼ਤ ਕਰ ਰਹੀ ਹੈ ਆਪਣੀਆਂ ਫ਼ੋਟੋਆਂ 'ਤੇ ਜਵਾਬ ਦੇਵੇ। ਹਾਲਾਂਕਿ ਇਹ ਫੋਟੋਆਂ ਸਿਰਫ ਵਿਧਾਨ ਸਭਾ ਦੇ ਬਾਹਰ ਤੱਕ ਹੀ ਸੀਮਤ ਰਹਿਣਗੀਆਂ ਕਿਉਂਕਿ ਵਿਧਾਇਕ ਹਰਮਿੰਦਰ ਗਿੱਲ ਨੇ ਕਿਹਾ ਕਿ ਅਸੈਂਬਲੀ ਵਿੱਚ ਇਹ ਮੁੱਦਾ ਨਹੀਂ ਚੁੱਕਿਆ ਜਾਵੇਗਾ। ਹਾਲਾਂਕਿ, ਇਸ ਦੌਰਾਨ ਇਹ ਵੀ ਚਰਚਾ ਦਾ ਵਿਸ਼ਾ ਰਿਹਾ ਕਿ ਉਕਤ ਕਾਂਗਰਸੀ ਵਿਧਾਇਕ ਅਕਾਲੀ ਦਲ ਦੇ ਪ੍ਰਦਰਸ਼ਨ ਦਾ ਜਵਾਬ ਦੇਣ ਪਹੁੰਚੇ ਹਨ ਜਾਂ ਨਵਜੋਤ ਸਿੱਧੂ ਦਾ ਪੱਖ ਪੂਰਨ। ਬਜਟ ਪੇਸ਼ ਕਰਨ ਵਾਲੇ ਦਿਨ ਕਾਂਗਰਸ ਦਾ ਕੋਈ ਵਿਧਾਇਕ ਸਿੱਧੂ ਦੇ ਪ੍ਰਦਰਸ਼ਨ ਵਿੱਚ ਨਹੀਂ ਸੀ ਆਇਆ। ਹਾਲਾਂਕਿ, ਜਦ ਸਿੱਧੂ ਨੇ ਉੱਠ ਕੇ ਮਜੀਠੀਆ ਦਾ ਵਿਰੋਧ ਸ਼ੁਰੂ ਕੀਤਾ ਤਾਂ ਸੁਖਜਿੰਦਰ ਰੰਧਾਵਾ ਤੇ ਇੰਦਰਬੀਰ ਸਿੰਘ ਬੁਲਾਰੀਆ ਸਮੇਤ ਕਈ ਕਾਂਗਰਸੀਆਂ ਨੇ ਮਜੀਠੀਆ ਦਾ ਵਿਰੋਧ ਕੀਤਾ।