ਫੈਕਟਰੀਆਂ ਵੱਲੋਂ ਧਰਤੀ ਹੇਠਲਾ ਪਾਣੀ ਪ੍ਰਦੂਸ਼ਿਤ ਕਰਨਾ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ: ਭਾਰਤੀ ਕਿਸਾਨ ਯੂਨੀਅਨ (ਕ੍ਰਾਂਤੀਕਾਰੀ)
ਚੰਡੀਗੜ੍ਹ: ਪਿਛਲੇ ਦਿਨੀਂ ਜ਼ੀਰਾ ਲਾਗਲੇ ਪਿੰਡ ਦੀ ਸਮਾਧ ਵਿੱਚ ਜਦੋਂ ਲੋਕ ਬੋਰ ਕਰ ਰਹੇ ਸਨ ਤਾਂ ਸਾਢੇ ਪੰਜ ਸੌ ਤੋਂ ਹੇਠਾਂ ਜਾਂਦਿਆਂ ਹੀ ਬਹੁਤ ਪ੍ਰਦੂਸ਼ਤ ਪਾਣੀ ਨਿਕਲਿਆ ਜੋ ਸ਼ਰਾਬ ਤੇ ਲਾਹਨ ਵਰਗਾ ਸੀ।
ਚੰਡੀਗੜ੍ਹ: ਪਿਛਲੇ ਦਿਨੀਂ ਜ਼ੀਰਾ ਲਾਗਲੇ ਪਿੰਡ ਦੀ ਸਮਾਧ ਵਿੱਚ ਜਦੋਂ ਲੋਕ ਬੋਰ ਕਰ ਰਹੇ ਸਨ ਤਾਂ ਸਾਢੇ ਪੰਜ ਸੌ ਤੋਂ ਹੇਠਾਂ ਜਾਂਦਿਆਂ ਹੀ ਬਹੁਤ ਪ੍ਰਦੂਸ਼ਤ ਪਾਣੀ ਨਿਕਲਿਆ ਜੋ ਸ਼ਰਾਬ ਤੇ ਲਾਹਨ ਵਰਗਾ ਸੀ। ਇਸ ਨੂੰ ਵੇਖਦਿਆਂ ਆਲੇ-ਦੁਆਲੇ ਦੇ ਪਿੰਡਾਂ ਦੇ ਲੋਕਾਂ ਵਿੱਚ ਰੋਸ ਫੈਲ ਗਿਆ। ਇਸ 'ਤੇ ਲੋਕਾਂ ਨੇ ਇਕੱਠੇ ਹੋ ਕੇ ਮਤੇ ਪਾਏ ਤੇ ਇਹ ਮਾਮਲਾ ਭਾਰਤੀ ਕਿਸਾਨ ਯੂਨੀਅਨ (ਕ੍ਰਾਂਤੀਕਾਰੀ) ਦੇ ਧਿਆਨ ਵਿੱਚ ਲਿਆਂਦਾ। ਉਨ੍ਹਾਂ ਨੇ ਪਿੰਡ ਦੇ ਲੋਕਾਂ ਤੇ ਹੋਰ ਜਥੇਬੰਦੀਆਂ ਨਾਲ ਮਿਲ ਕੇ ਸ਼ਰਾਬ ਫੈਕਟਰੀ ਅੱਗੇ ਦਿਨ ਰਾਤ ਦਾ ਪੱਕਾ ਧਰਨਾ ਲਾ ਦਿੱਤਾ ਜੋ ਅੱਜ ਚੌਥੇ ਦਿਨ ਵਿੱਚ ਪਹੁੰਚ ਗਿਆ ਹੈ।
ਭਾਰਤੀ ਕਿਸਾਨ ਯੂਨੀਅਨ (ਕ੍ਰਾਂਤੀਕਾਰੀ) ਦੇ ਸੂਬਾ ਪ੍ਰਧਾਨ ਸੁਰਜੀਤ ਸਿੰਘ ਫੂਲ ਤੇ ਜਨਰਲ ਸਕੱਤਰ ਬਲਦੇਵ ਸਿੰਘ ਜ਼ੀਰਾ ਦਾ ਸਾਂਝਾ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਫੈਕਟਰੀ 15 ਸਾਲ ਤੋਂ ਚੱਲ ਰਹੀ ਹੈ। ਫੈਕਟਰੀ ਲਾਉਣ ਵੇਲੇ ਵੀ ਇਲਾਕੇ ਦੇ ਲੋਕਾਂ ਨੂੰ ਝੂਠ ਬੋਲ ਕੇ ਦਸਖ਼ਤ ਕਰਵਾਏ ਗਏ ਕਿ ਇੱਥੇ ਸ਼ਰਾਬ ਫੈਕਟਰੀ ਨਹੀਂ ਲਾਈ ਜਾਵੇਗੀ। ਕਈ ਵਾਰ ਲੋਕਾਂ ਨੇ ਸ਼ਰਾਬ ਫੈਕਟਰੀ ਦਾ ਗੰਦਾ ਪਾਣੀ ਉਨ੍ਹਾਂ ਦੀਆਂ ਜ਼ਮੀਨਾਂ ਵਿੱਚ ਪਾਏ ਜਾਣ ਕਾਰਨ ਵਿਰੋਧ ਕੀਤਾ।
ਉਨ੍ਹਾਂ ਕਿਹਾ ਕਿ ਫੈਕਟਰੀ ਵਿੱਚੋਂ ਹਰ ਰੋਜ ਨਿਕਲਣ ਵਾਲਾ 18 ਲੱਖ ਲਿਟਰ ਪ੍ਰਦੂਸ਼ਿਤ ਪਾਣੀ ਨਾਲ ਲੱਗਦੀ ਖੰਡ ਮਿਲ ਦੀ ਜ਼ਮੀਨ ਵਿੱਚ ਵੀ ਪਾਇਆ ਗਿਆ ਜਿਸ ਕਾਰਨ 100 ਸਾਲ ਪੁਰਾਣੇ ਰੁੱਖ ਸੁਕ ਸੜ ਗਏ। ਉੱਥੇ ਵਿਰੋਧ ਹੋਣ ਤੋਂ ਬਾਅਦ ਇਹ ਪਾਣੀ ਨਾਲ ਲੱਗਦੇ ਸ਼ੇਮ ਨਾਲੇ ਵਿੱਚ ਪਾਇਆ ਜਾਣ ਲੱਗਾ ਜਿਸ ਕਾਰਨ ਇਲਾਕੇ ਵਿੱਚ ਬਦਬੂ ਫੈਲ ਗਈ ਤੇ ਲੋਕਾਂ ਦੇ ਵਿਰੋਧ ਨੇ ਫੈਕਟਰੀ ਦਾ ਪਾਣੀ ਸ਼ੇਮ ਨਾਲੇ ਵਿੱਚੋਂ ਵੀ ਬੰਦ ਕਰ ਦਿੱਤਾ। ਇਸ ਤੋਂ ਗੰਦੇ ਪਾਣੀ ਦਾ ਨਿਪਟਾਰਾ ਕਰਨ ਲਈ ਫੈਕਟਰੀ ਵਿੱਚ ਕਈ ਬੋਰ ਕੀਤੇ ਤੇ ਪਾਣੀ ਧਰਤੀ ਹੇਠ ਪਾਇਆ ਜਾਣ ਲੱਗਾ। ਪਾਣੀ ਖੁੱਲ੍ਹੇ ਵਿੱਚ ਬੰਦ ਹੋਣ ਕਾਰਨ ਲੋਕ ਕੁਝ ਸਮੇਂ ਲਈ ਸ਼ਾਂਤ ਹੋ ਗਏ।
ਇਹ ਮਸਲਾ ਕੁਝ ਮਹੀਨੇ ਪਹਿਲਾਂ ਪਿੰਡ ਮਨਸੂਰਵਾਲ ਦੇ 60 ਡੰਗਰ (ਮੱਝਾਂ, ਗਾਵਾਂ) ਦੇ ਮਰ ਜਾਣ ਨਾਲ ਮੁੜ ਸ਼ੁਰੂ ਹੋਇਆ ਕਿਉਂਕਿ ਜਿਨ੍ਹਾਂ ਕਿਸਾਨਾਂ ਦੇ ਪਸ਼ੂ ਮਰੇ ਉਨ੍ਹਾਂ ਦੀ ਜ਼ਮੀਨ ਫੈਕਟਰੀ ਦੇ ਨੇੜੇ ਸੀ। ਫੈਕਟਰੀ ਦੀ ਚਿਮਨੀ ਵਿੱਚੋਂ ਨਿਕਲਣ ਵਾਲੀ ਸੁਵਾਹ ਹਰੇ ਚਾਰੇ ਤੇ ਪੈਣ ਕਾਰਨ ਹਰਾ ਚਾਰਾ ਜ਼ਹਿਰਿਲਾ ਹੋ ਗਿਆ ਪਰ ਫੈਕਟਰੀ ਮਾਲਕਾਂ ਨੇ 10 ਲੱਖ ਰੁਪਏ ਉਨ੍ਹਾਂ ਕਿਸਾਨਾਂ ਨੂੰ ਵੰਡ ਕੇ ਚੁੱਪ ਕਰਾ ਦਿੱਤਾ।
ਤਾਜੀ ਘਟਨਾ ਨਾਲ ਲੱਗਦੇ ਪਿੰਡ ਮਹੀਆਂਵਾਲਾ ਕਲਾ ਵਿੱਚ ਹੋਈ ਜਿੱਥੇ ਭਗਤ ਬਾਬਾ ਦੁਨੀ ਚੰਦ ਦੀ ਸਮਾਧ ਤੇ ਬੋਰ ਕਰਦੇ ਸਮੇਂ 550 ਫੁੱਟ ਤੋਂ 650 ਫੁੱਟ ਤੱਕ ਧਰਤੀ ਹੇਠਲਾ ਪਾਣੀ ਤੇ ਰੇਤਾ ਕੈਮੀਕਲਾਂ ਕਾਰਨ ਕਾਲੇ ਰੰਗ ਦੀ ਨਿਕਲੀ ਜਿਸ ਨੂੰ ਦੇਖ ਕੇ ਪਿੰਡ ਵਾਸੀਆਂ ਤੇ ਪੂਰੇ ਇਲਾਕੇ ਵਿੱਚ ਸਹਿਮ ਦਾ ਮਾਹੌਲ ਬਣ ਗਿਆ। ਆਪਣਾ ਧਰਤੀ ਹੇਠਲਾ ਪਾਣੀ ਖਰਾਬ ਹੋਇਆ ਦੇਖ ਇਲਾਕੇ ਦੇ ਲੋਕ ਲਾਮਬੰਦ ਹੋ ਕੇ ਕਿਸਾਨ ਜਥੇਬੰਦੀ ਦੀ ਹਮਾਇਤ ਨਾਲ ਲੜਨ ਲਈ ਤਿਆਰ ਹੋ ਗਏ ਤੇ ਇੱਕੋ ਮੰਗ ਫੈਕਟਰੀ ਬੰਦ ਕਰਵਾਉਣ ਨੂੰ ਲੈ ਕੇ ਫੈਕਟਰੀ ਦੇ ਗੇਟ ਅੱਗੇ ਪੱਕਾ ਮੋਰਚਾ ਲਾ ਦਿੱਤਾ।
ਦੋਵਾਂ ਆਗੂਆਂ ਨੇ ਪੰਜਾਬ ਦੀਆਂ ਜਮਹੂਰੀ ਤੇ ਇਨਸਾਫ਼ਪਸੰਦ ਜਥੇਬੰਦੀਆਂ ਕਿਸਾਨ ਜਥੇਬੰਦੀਆਂ ਤੇ ਹੋਰ ਭਰਾਤਰੀ ਜਥੇਬੰਦੀਆਂ ਤੇ ਇਲਾਕੇ ਦੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਇਸ ਧਰਨੇ ਨੂੰ ਮਜ਼ਬੂਤ ਬਣਾਉਣ। ਪੰਜਾਬ ਸਰਕਾਰ ਤੋਂ ਵੀ ਮੰਗ ਕੀਤੀ ਕਿ ਉਹ ਜਲਦ ਤੋਂ ਜਲਦ ਅਜਿਹੀਆਂ ਫੈਕਟਰੀਆਂ ਨੂੰ ਬੰਦ ਕਰੇ ਜਿਹੜੀਆਂ ਆਉਣ ਵਾਲੇ ਭਵਿੱਖ ਲਈ ਬਹੁਤ ਖ਼ਤਰਨਾਕ ਸਿੱਧ ਹੋਣਗੀਆਂ।
Before You Go
ਰਾਜਪੁਰਾ ਮੀਂਹ 'ਚ ਡੁੱਬਿਆ! ਅੰਡਰਬ੍ਰਿਜ ਬਣਿਆ ਤਲਾਬ, ਕਿਲੋਮੀਟਰਾਂ ਲੰਮਾ ਜਾਮ
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
