Horse David Price: ਪੰਜਾਬ ਦੇ ਇੱਕ ਘੋੜੇ ਦੀ ਕੀਮਤ 'ਚ ਖਰੀਦੀ ਜਾ ਸਕਦੀ 80 ਕਿੱਲੇ ਜ਼ਮੀਨ, ਭਾਰਤ ਵਿੱਚ ਸਭ ਤੋਂ ਉੱਚੇ ਕੱਦ-ਕਾਠ ਵਾਲਾ ਡੇਵਿਡ
Horse David's Price 21 Crore: ਕਿਸੇ ਵੇਲੇ ਘੋੜਾ ਆਵਾਜਾਈ ਦਾ ਸਾਧਨ ਹੁੰਦਾ ਸੀ ਪਰ ਅੱਜ ਇਹ ਅਮੀਰੀ ਦੀ ਨਿਸ਼ਾਨੀ ਬਣ ਗਿਆ ਹੈ। ਇਹੀ ਕਾਰਨ ਹੈ ਕਿ ਕਈ ਨਸਲੀ ਘੋੜਿਆਂ ਦੀ ਕੀਮਤ ਲਗਜ਼ਰੀ ਕਾਰਾਂ ਨਾਲੋਂ ਵੀ ਵੱਧ ਹੈ।
Horse David's Price 21 Crore: ਕਿਸੇ ਵੇਲੇ ਘੋੜਾ ਆਵਾਜਾਈ ਦਾ ਸਾਧਨ ਹੁੰਦਾ ਸੀ ਪਰ ਅੱਜ ਇਹ ਅਮੀਰੀ ਦੀ ਨਿਸ਼ਾਨੀ ਬਣ ਗਿਆ ਹੈ। ਇਹੀ ਕਾਰਨ ਹੈ ਕਿ ਕਈ ਨਸਲੀ ਘੋੜਿਆਂ ਦੀ ਕੀਮਤ ਲਗਜ਼ਰੀ ਕਾਰਾਂ ਨਾਲੋਂ ਵੀ ਵੱਧ ਹੈ। ਸ਼੍ਰੀ ਮੁਕਤਸਰ ਸਾਹਿਬ ਵਿਖੇ ਮਾਘੀ ਮੇਲੇ ਮੌਕੇ 21 ਕਰੋੜ ਰੁਪਏ ਦਾ ਘੋੜਾ ਪਹੁੰਚਿਆ। ਇਸ ਘੋੜੇ ਨੂੰ ਵੇਖਣ ਲਈ ਲੋਕਾਂ ਦੀ ਭੀੜ ਲੱਗੀ ਰਹੀ। ਡੇਵਿਡ ਨਾਂ ਦੇ ਇਸ ਘੋੜੇ ਦੀ ਕੀਮਤ ਵਿੱਚ ਕਈ ਲਗਜ਼ਰੀ ਕਾਰਾਂ ਖਰੀਦੀਆਂ ਜਾ ਸਕਦੀਆਂ ਹਨ।
ਦਰਅਸਲ ਮੇਲਾ ਮਾਘੀ ਮੌਕੇ ਲੱਗਣ ਵਾਲੀ ਭਾਰਤ ਦੀ ਮਸ਼ਹੂਰ ਘੋੜਾ ਮੰਡੀ ਵਿੱਚ ਦੇਸ਼ ਭਰ ’ਚੋਂ ਘੋੜਾ ਵਪਾਰੀ ਕਈ ਕਿਸਮਾਂ ਦੇ ਘੋੜੇ ਲੈ ਕੇ ਪੁੱਜੇ। ਇਨ੍ਹਾਂ ਘੋੜਿਆਂ ਦੀ ਕੀਮਤ ਕਰੋੜਾਂ ਰੁਪਏ ਵਿੱਚ ਦੱਸੀ ਜਾਂਦੀ ਹੈ। ਮਾਰਵਾੜੀ ਨਸਲ ਦੇ ਘੋੜੇ ‘ਡੇਵਿਡ’ ਦੀ ਕੀਮਤ ਘੋੜਾ ਪਾਲਕ ਵਿਕਰਮਜੀਤ ਸਿੰਘ ਵਿੱਕੀ ਬਰਾੜ ਨੇ 21 ਕਰੋੜ ਰੁਪਏ ਦੱਸੀ। ਇਹ ਘੋੜਾ ਸੰਜਮ ਸਟੱਡ ਫਾਰਮ ਬਾਦਲ ਦਾ ਹੈ। ਵਿੱਕੀ ਨੇ ਦੱਸਿਆ ਕਿ ਇਸ ਘੋੜੇ ਦੇ ਜੰਮਣ ਦੇ ਇੱਕ ਘੰਟੇ ਬਾਅਦ ਹੀ ਇਸ ਦੀ ਕੀਮਤ ਇੱਕ ਕਰੋੜ ਰੁਪਏ ਲੱਗ ਗਈ ਸੀ। ਉਨ੍ਹਾਂ ਦੱਸਿਆ ਕਿ ਘੋੜੇ ਦੀ ਕੀਮਤ ਇਸ ਦੀ ਨਸਲ, ਕੱਦ ਤੇ ਮਾਂ-ਪਿਓ ਦੇ ਜੀਨਜ਼ ’ਤੇ ਨਿਰਭਰ ਕਰਦੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ 38 ਮਹੀਨਿਆਂ ਦਾ ਇਹ ਘੋੜਾ ‘ਡੇਵਿਡ’ 72 ਇੰਚ ਉੱਚਾ ਹੈ, ਜੋ ਭਾਰਤ ਵਿੱਚ ਸਭ ਤੋਂ ਵੱਧ ਹੈ।
ਇਸੇ ਤਰ੍ਹਾਂ ਤਲਵੰਡੀ ਦੇ ਭਾਈ ਡੱਲਾ ਸਟੱਡ ਫਾਰਮ, ਬਰਕੰਦੀ ਦੇ ਯਾਦਵਿੰਦਰ ਸਟੱਡ ਫਾਰਮ ਦਾ 64 ਇੰਚ ਕੱਦ ਵਾਲਾ ਨੁੱਕਰਾ ਘੋੜਾ ਸਿਕੰਦਰ, ਹਰਿਆਣਾ ਦੇ ਚੌਧਰੀ ਸਟੱਡ ਫਾਰਮ ਦਾ ਘੋੜਾ ਗੁਨਵਾਨ ਵੀ ਖਿੱਚ ਦਾ ਕੇਂਦਰ ਬਣਿਆ ਹੋਇਆ ਹੈ। ਘੋੜੇ ਖਰੀਦਣ ਲਈ ਦਿੱਲੀ, ਗੁਜਰਾਤ, ਮਹਾਰਾਸ਼ਟਰ ਤੇ ਰਾਜਸਥਾਨ ਦੇ ਵਪਾਰੀ ਆਏ ਹੋਏ ਹਨ। ਲੱਖਾਂ ਰੁਪਏ ਦੇ ਘੋੜਿਆਂ ਦੀ ਖਰੀਦੋ-ਫਰੋਖਤ ਹੋ ਰਹੀ ਹੈ। ਜ਼ਿਆਦਾ ਵਪਾਰ ਨੁੱਕਰੇ ਤੇ ਮਾਰਵਾੜੀ ਨਸਲ ਦੇ ਘੋੜਿਆਂ ਦਾ ਹੁੰਦਾ ਹੈ ਜਦੋਂਕਿ ਕਾਠੀਆਵਾੜ ਤੇ ਸਿੰਧੀ ਨਸਲ ਦੇ ਘੋੜੇ ਬਹੁਤ ਘੱਟ ਆਉਂਦੇ ਹਨ।
ਇਸ ਦੌਰਾਨ ਘੋੜਾ ਪਾਲਕਾਂ ਨੇ ਮੰਗ ਕੀਤੀ ਕਿ ਮੰਡੀ ਨੂੰ ਸਥਾਈ ਰੂਪ ਦਿੱਤਾ ਜਾਵੇ ਤੇ ਟੈਂਟ ਵਗੈਰ੍ਹਾ ਦੀਆਂ ਕੀਮਤਾਂ ਘੱਟ ਕੀਤੀਆਂ ਜਾਣ ਤਾਂ ਜੋ ਉਨ੍ਹਾਂ ’ਤੇ ਬੇਲੋੜਾ ਖਰਚਾ ਨਾ ਪਵੇ। ਘੋੜਾ ਮੰਡੀ ਦੇ ਪ੍ਰਬੰਧਕ ਸੁਖਪਾਲ ਸਿੰਘ ਭਾਟੀ ਨੇ ਦੱਸਿਆ ਕਿ ਕਰੀਬ ਤਿੰਨ ਹਜ਼ਾਰ ਘੋੜੇ ਮੰਡੀ ’ਚ ਆ ਚੁੱਕੇ ਹਨ। ਇਹ ਘੋੜਾ ਮੰਡੀ 20 ਜਨਵਰੀ ਤੱਕ ਲੱਗੇਗੀ। ਮੰਡੀ ’ਚ ਪੰਜਾਬ ਤੋਂ ਇਲਾਵਾ ਰਾਜਸਥਾਨ, ਹਰਿਆਣਾ, ਉੱਤਰ ਪ੍ਰਦੇਸ਼, ਦਿੱਲੀ ਤੇ ਹੋਰ ਸੂਬਿਆਂ ਦੇ ਘੋੜਾ ਪਾਲਕ ਆਉਂਦੇ ਹਨ। ਕੁੱਝ ਘੋੜੇ ਸਿਰਫ ਪ੍ਰਦਰਸ਼ਨੀ ਵਾਸਤੇ ਹੁੰਦੇ ਹਨ ਜਦੋਂ ਕਿ ਕੁੱਝ ਵੇਚਣ ਵਾਸਤੇ।
ਘੋੜਾ ਮੰਡੀ ਵਿੱਚ ਪੁੱਜੇ ਡਿਪਟੀ ਕਮਿਸ਼ਨਰ ਰਾਜੇਸ਼ ਤ੍ਰਿਪਾਠੀ ਨੇ ਘੋੜਾ ਪਾਲਕਾਂ ਨਾਲ ਗੱਲਬਾਤ ਕਰਦਿਆਂ ਜਿੱਥੇ ਘੋੜਿਆਂ ਦੀਆਂ ਨਸਲਾਂ, ਉਨ੍ਹਾਂ ਦੀ ਖੁਰਾਕ ਤੇ ਕੀਮਤ ਆਦਿ ਬਾਰੇ ਜਾਣਕਾਰੀ ਹਾਸਲ ਕੀਤੀ, ਉੱਥੇ ਹੀ ਮੰਡੀ ਵਿੱਚ ਦਰਪੇਸ਼ ਸਮੱਸਿਆਵਾਂ ਵੀ ਜਾਣੀਆਂ। ਇਸ ਦੌਰਾਨ ਉਨ੍ਹਾਂ ਪੂਰੀ ਮੰਡੀ ਦਾ ਪੈਦਲ ਚੱਕਰ ਲਾਇਆ ਅਤੇ ਘੋੜਿਆਂ, ਪੰਛੀਆਂ ਤੇ ਕੁੱਤਿਆਂ ਬਾਰੇ ਜਾਣਕਾਰੀ ਹਾਸਲ ਕੀਤੀ। ਉਨ੍ਹਾਂ ਮੰਡੀ ਠੇਕੇਦਾਰਾਂ ਨੂੰ ਹਦਾਇਤ ਕੀਤੀ ਕਿ ਮੰਡੀ ਵਿੱਚ ਸਫਾਈ ਤੇ ਸੁਰੱਖਿਆ ਦਾ ਪ੍ਰਬੰਧ ਕੀਤਾ ਜਾਵੇ। ਕਿਸੇ ਹੰਗਾਮੀ ਹਾਲਤ ਦੀ ਸੂਚਨਾ ਦੇਣ ਲਈ ਸਪੀਕਰ ਲਾਏ ਜਾਣ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
