ਜਸਵਿੰਦਰ ਸਿੱਖਾਂਵਾਲਾ ਵੱਲੋਂ ਮੋਦੀ ਨੂੰ ਨੋਟਿਸ

ਚੰਡੀਗੜ੍ਹ: ਪੰਜਾਬ ਕਾਂਗਰਸ ਦੇ ਬੁਲਾਰੇ ਜਸਵਿੰਦਰ ਸਿੰਘ ਸਿੱਖਾਂਵਾਲਾ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਕਾਨੂੰਨੀ ਨੋਟਿਸ ਭੇਜਿਆ ਹੈ। ਇਸ ਨੋਟਿਸ 'ਚ ਕਿਹਾ ਗਿਆ ਹੈ ਕਿ ਜਾਂ ਤਾਂ ਪ੍ਰਧਾਨ ਮੰਤਰੀ ਆਪਣੀ ਪਤਨੀ ਜਸ਼ੋਦਾਬੇਨ ਨੂੰ ਤਲਾਕ ਦੇਣ ਜਾਂ ਫਿਰ ਨਾਲ ਰੱਖਣ। ਜਸਵਿੰਦਰ ਨੇ ਕਿਹਾ ਕਿ ਇਸ ਤਰ੍ਹਾਂ ਔਰਤ ਦਾ ਨਿਰਾਦਰ ਕਰਨਾ ਸਮਾਜਿਕ ਕੁਰੀਤੀ ਹੈ। ਉਨ੍ਹਾਂ ਕਿਹਾ ਕਿ ਉਹ ਇਸ ਕੇਸ ਨੂੰ ਅੰਤ ਤੱਕ ਲੈ ਕੇ ਜਾਣਗੇ। ਦਰਅਸਲ ਨਰਿੰਦਰ ਮੋਦੀ ਨੇ ਲੋਕ ਸਭਾ ਚੋਣਾਂ ਵੇਲੇ ਆਪਣੇ ਨਾਮਜ਼ਦਗੀ ਪੱਤਰ ਵਿੱਚ ਪਤਨੀ ਦੇ ਨਾਂ ਵਾਲੇ ਕਾਲਮ ਵਿੱਚ ਪਹਿਲੀ ਵਾਰ ਆਪਣੀ ਪਤਨੀ ਦਾ ਨਾਂ ਭਰਿਆ ਸੀ। ਪਹਿਲਾਂ ਹਰ ਵਿਧਾਨ ਸਭਾ ਚੋਣਾਂ ਵੇਲੇ ਮੋਦੀ ਪਤਨੀ ਦਾ ਕਾਲਮ ਖਾਲੀ ਛੱਡ ਦਿੰਦੇ ਸਨ। ਉਸ ਸਮੇਂ ਆਪਣੀ ਪਤਨੀ ਦੇ ਅਸਾਸਿਆਂ ਤੇ ਦੇਣਦਾਰੀਆਂ ਦੇ ਕਾਲਮ ਵਿੱਚ ਮੋਦੀ ਨੇ ਲਿਖਿਆ ਸੀ ਕਿ ਉਨ੍ਹਾਂ ਨੂੰ ਇਸ ਦੀ ਕੋਈ ਜਾਣਕਾਰੀ ਨਹੀਂ ਹੈ। 62 ਸਾਲਾ ਜਸ਼ੋਦਾਬੇਨ ਪੇਸ਼ੇ ਵਜੋਂ ਅਧਿਆਪਕਾ ਸੀ ਤੇ ਅੱਜ-ਕੱਲ੍ਹ ਸੇਵਾਮੁਕਤ ਹੋ ਕੇ ਇਕੱਲੀ ਹੀ ਜ਼ਿੰਦਗੀ ਗੁਜ਼ਾਰ ਰਹੀ ਹੈ। ਉਨ੍ਹਾਂ ਦਾ ਵਿਆਹ ਚੜ੍ਹਦੀ ਉਮਰੇ ਹੋ ਗਿਆ ਸੀ ਪਰ ਨਰਿੰਦਰ ਮੋਦੀ ਵਿਆਹ ਤੋਂ ਤਿੰਨ ਮਹੀਨੇ ਬਾਅਦ ਹੀ ਘਰ ਛੱਡ ਕੇ ਚਲੇ ਗਏ ਸੀ।