Tea Leaf: ਚਾਹ ਪੀਣ ਤੋਂ ਪਹਿਲਾਂ ਇੰਝ ਕਰੋ ਨਕਲੀ- ਅਸਲੀ ਚਾਹਪੱਤੀ ਦੀ ਪਛਾਣ

Tea Leaf ਅੱਜ ਕੱਲ੍ਹ ਦੁਕਾਨਾਂ 'ਤੇ ਮਿਲਣ ਵਾਲੀ ਚਾਹਪੱਤੀ ਵਿੱਚ ਮਿਲਾਵਟ ਹੋਣ ਲੱਗੀ ਹੈ। ਮਿਲਾਵਟੀ ਚਾਹ ਪੀਣ ਨਾਲ ਨਾ ਸਿਰਫ਼ ਸਾਡੀ ਸਿਹਤ ਨੂੰ ਨੁਕਸਾਨ ਹੁੰਦਾ ਹੈ ਸਗੋਂ ਕਈ ਗੰਭੀਰ ਬਿਮਾਰੀਆਂ ਵੀ ਲੱਗ ਜਾਂਦੀਆਂ ਹਨ।

Tea Leaf

ਮਿਲਾਵਟੀ ਚਾਹ ਪੀਣ ਨਾਲ ਸਾਡੇ ਸਰੀਰ ਵਿੱਚ ਕੈਂਸਰ ਅਤੇ ਮਲਟੀਪਲ ਆਰਗਨ ਫੇਲਿਉਰ ਸਮੇਤ ਕਈ ਗੰਭੀਰ ਬਿਮਾਰੀਆਂ ਹੋ ਸਕਦੀਆਂ ਹਨ। ਮਿਲਾਵਟੀ ਚਾਹ ਵਿੱਚ ਰੰਗ ਜਾਂ ਡਾਈ ਦੀ ਮਿਲਾਵਟ ਹੁੰਦੀ ਹੈ ਜੋ ਸਾਡੇ ਸਰੀਰ ਲਈ ਬਹੁਤ ਹਾਨੀਕਾਰਕ ਹੈ।

ਫੂਡ ਸੇਫਟੀ ਐਂਡ ਸਟੈਂਡਰਡ ਅਥਾਰਟੀ ਆਫ ਇੰਡੀਆ (FSSAI) ਨੇ ਚਾਹਪੱਤੀ ਲਈ ਕਈ ਪਛਾਣ ਵਿਧੀਆਂ ਦਾ ਸੁਝਾਅ ਦਿੱਤਾ ਹੈ। ਬਾਜ਼ਾਰ ਤੋਂ ਚਾਹਪੱਤੀ ਖਰੀਦਣ ਤੋਂ ਬਾਅਦ ਕੋਈ ਵੀ ਵਿਅਕਤੀ ਵਿਸ਼ੇਸ਼ ਟਿਪਸ ਦੀ ਮਦਦ ਨਾਲ ਦੁਕਾਨ 'ਤੇ ਖੜ੍ਹੇ ਹੋ ਕੇ ਚਾਹਪੱਤੀ 'ਚ ਮਿਲਾਵਟ ਦੀ ਪਛਾਣ ਕਰ ਸਕਦਾ ਹੈ।

ਸਭ ਤੋਂ ਪਹਿਲਾਂ ਇਕ ਗਲਾਸ ਪਾਣੀ 'ਚ ਚਾਹਪੱਤੀ ਦੇ ਦਾਣੇ ਪਾ ਲਓ। ਗਲਾਸ ਵਿੱਚ ਪਾਣੀ ਠੰਡਾ ਹੋਣਾ ਚਾਹੀਦਾ ਹੈ। ਜੇਕਰ ਚਾਹਪੱਤੀ ਸ਼ੁੱਧ ਹੈ ਤਾਂ ਇਨ੍ਹਾਂ ਨੂੰ ਪਾਣੀ 'ਚ ਪਾਉਣ ਨਾਲ ਰੰਗ 'ਚ ਕੋਈ ਬਦਲਾਅ ਨਹੀਂ ਆਵੇਗਾ। ਜੇਕਰ ਚਾਹਪੱਤੀ ਵਿੱਚ ਮਿਲਾਵਟ ਹੁੰਦੀ ਹੈ ਤਾਂ ਚਾਹਪੱਤੀ ਦਾ ਰੰਗ ਪਾਣੀ ਵਿੱਚ ਘੁਲਣ ਲੱਗ ਜਾਵੇਗਾ।

ਚਾਹਪੱਤੀ ਦੀ ਪਛਾਣ ਕਰਨ ਲਈ ਕੱਚ ਦੇ ਭਾਂਡੇ 'ਚ ਨਿੰਬੂ ਦੇ ਰਸ ਦੀਆਂ ਕੁਝ ਬੂੰਦਾਂ ਪਾਓ ਅਤੇ ਫਿਰ ਉਸ 'ਚ ਚਾਹਪੱਤੀ ਦੇ ਕੁਝ ਦਾਣੇ ਮਿਲਾਓ। ਜੇਕਰ ਚਾਹਪੱਤੀ ਅਸਲੀ ਹੋਵੇ ਤਾਂ ਨਿੰਬੂ ਦਾ ਰਸ ਪੀਲਾ ਜਾਂ ਹਰਾ ਹੋ ਜਾਵੇਗਾ। ਜੇਕਰ ਨਿੰਬੂ ਦਾ ਰਸ ਸੰਤਰੀ ਜਾਂ ਕੋਈ ਹੋਰ ਰੰਗ ਦਾ ਹੋ ਜਾਵੇ ਤਾਂ ਇਹ ਚਾਹਪੱਤੀ ਦੀ ਮਿਲਾਵਟ ਦਾ ਸੰਕੇਤ ਹੈ।

ਟਿਸ਼ੂ ਪੇਪਰ ਰਾਹੀਂ ਵੀ ਚਾਹ ਪੱਤੀਆਂ ਦੀ ਪਛਾਣ ਕੀਤੀ ਜਾ ਸਕਦੀ ਹੈ। ਇਸ ਦੇ ਲਈ ਕੁਝ ਚਾਹਪੱਤੀ ਦੇ ਦਾਣਿਆਂ ਨੂੰ ਟਿਸ਼ੂ ਪੇਪਰ 'ਚ ਰੱਖੋ ਅਤੇ ਉਸ 'ਤੇ ਪਾਣੀ ਦੀਆਂ ਕੁਝ ਬੂੰਦਾਂ ਪਾ ਦਿਓ। ਇਸ ਨੂੰ ਕੁਝ ਦੇਰ ਧੁੱਪ 'ਚ ਰੱਖੋ। ਜੇਕਰ ਚਾਹ ਦੀਆਂ ਪੱਤੀਆਂ ਅਸਲੀ ਹੋਣ ਤਾਂ ਟਿਸ਼ੂ ਪੇਪਰ 'ਤੇ ਕੋਈ ਦਾਗ ਨਹੀਂ ਲੱਗੇਗਾ।

ਚੰਗੀ ਚਾਹ ਦੀਆਂ ਪੱਤੀਆਂ ਵਿੱਚ ਮਿੱਠੀ ਖੁਸ਼ਬੂ ਹੁੰਦੀ ਹੈ। ਚਾਹ ਦੀਆਂ ਪੱਤੀਆਂ ਦੀਆਂ ਵੱਖ-ਵੱਖ ਕਿਸਮਾਂ 'ਚ ਭਾਵੇਂ ਤੁਹਾਨੂੰ ਵੱਖ-ਵੱਖ ਤਰ੍ਹਾਂ ਦੀ ਖੁਸ਼ਬੂ ਮਿਲੇਗੀ ਪਰ ਚੰਗੀ ਚਾਹ ਪੱਤੀ ਤੁਹਾਨੂੰ ਸੁਹਾਵਣੀ ਖੁਸ਼ਬੂ ਦੇਵੇਗੀ। ਜੇਕਰ ਚਾਹ ਦੀਆਂ ਪੱਤੀਆਂ ਪੁਰਾਣੀਆਂ ਜਾਂ ਘਟੀਆ ਕੁਆਲਿਟੀ ਦੀਆਂ ਹਨ, ਤਾਂ ਉਸ ਵਿੱਚ ਲੱਕੜ ਵਾਂਗ ਗੰਧ ਆਵੇਗੀ।

ਤੁਸੀਂ ਚਾਹ ਦੀ ਪੱਤੀ ਨੂੰ ਆਪਣੇ ਹੱਥਾਂ 'ਤੇ ਇਕ ਤੋਂ ਦੋ ਮਿੰਟ ਲਈ ਰਗੜੋ। ਜੇਕਰ ਤੁਹਾਡੇ ਹੱਥਾਂ 'ਚ ਕੋਈ ਰੰਗ ਨਜ਼ਰ ਆਵੇ ਤਾਂ ਸਮਝੋ ਚਾਹ ਪੱਤੀ 'ਚ ਕੁਝ ਮਿਲਾਇਆ ਹੋਇਆ ਹੈ।