Deepak Chahar Wedding Photos: ਵਿਆਹ ਦੇ ਬੰਧਨ 'ਚ ਬੱਝੇ ਦੀਪਕ ਚਾਹਰ, ਜਯਾ ਭਾਰਦਵਾਜ ਨਾਲ ਲਏ ਸੱਤ ਫੇਰੇ

ਵਿਆਹ ਦੇ ਬੰਧਨ 'ਚ ਬੱਝੇ ਦੀਪਕ ਚਾਹਰ

ਭਾਰਤੀ ਟੀਮ ਦੇ ਤੇਜ਼ ਗੇਂਦਬਾਜ਼ ਦੀਪਕ ਚਾਹਰ ਵਿਆਹ ਦੇ ਬੰਧਨ ਵਿੱਚ ਬੱਝ ਗਏ ਹਨ। ਲੰਬੇ ਰਿਲੇਸ਼ਨ ਤੋਂ ਬਾਅਦ, ਉਹਨਾਂ ਨੇ ਆਪਣੀ ਪ੍ਰੇਮਿਕਾ ਜਯਾ ਭਾਰਦਵਾਜ ਨਾਲ ਵਿਆਹ ਕਰ ਲਿਆ ਹੈ। ਆਗਰਾ ਦੇ ਵਾਯੂ ਵਿਹਾਰ ਦੇ ਰਹਿਣ ਵਾਲੇ ਚਾਹਰ ਅਤੇ ਜਯਾ ਨੇ ਫਤਿਹਾਬਾਦ ਰੋਡ 'ਤੇ ਸਥਿਤ ਜੇਪੀ ਪੈਲੇਸ 'ਚ 7 ਫੇਰੇ ਲਾਏ। ਇਸ ਤੋਂ ਪਹਿਲਾਂ ਮੰਗਲਵਾਰ ਨੂੰ ਮਹਿੰਦੀ ਦੀ ਰਸਮ ਅਤੇ ਸੰਗੀਤ ਸਮਾਰੋਹ ਹੋਇਆ।

ਲਾੜਾ ਬਣੇ ਦੀਪਕ ਚਾਹਰ ਘੋੜੀ 'ਤੇ ਬੈਠ ਬੈਂਡ-ਵਾਜੇ ਨਾਲ ਬਾਰਾਤ ਲੈ ਕੇ ਹੋਟਲ ਪਹੁੰਚੇ। ਦੀਪਕ ਨੇ ਵ੍ਹਾਈਟ ਕਲਰ ਦੀ ਸ਼ੇਰਵਾਨੀ ਅਤੇ ਪਗੜੀ ਪਾਈ। ਦੀਪਕ ਦੇ ਚਚੇਰੇ ਭਰਾ ਲੈੱਗ ਸਪਿਨਰ ਰਾਹੁਲ ਚਾਹਰ ਅਤੇ ਭੈਣ ਮਾਲਤੀ ਚਾਹਰ ਨੇ ਬੈਂਡ-ਬਾਜਾ ਦੀ ਧੁਨ 'ਤੇ ਖੂਬ ਡਾਂਸ ਕੀਤਾ।

ਮੀਡੀਆ ਰਿਪੋਰਟਾਂ ਮੁਤਾਬਕ ਰਾਤ 10 ਵਜੇ ਵਿਆਹ ਦੀਆਂ ਰਸਮਾਂ ਸ਼ੁਰੂ ਹੋਈਆਂ। ਦੂਜੇ ਪਾਸੇ ਦੁਲਹਨ ਜਯਾ ਭਾਰਦਵਾਜ ਨੇ ਵੀ ਸ਼ਾਨਦਾਰ ਗੈਟਅੱਪ ਲਿਆ। ਦੀਪਕ ਅਤੇ ਜਯਾ ਦੇ ਵਿਆਹ 'ਚ ਦੋਹਾਂ ਪਰਿਵਾਰਾਂ ਦੇ ਲੋਕ ਖੁਸ਼ੀ ਨਾਲ ਝੂਮ ਰਹੇ ਹਨ। ਹੋਟਲ ਜੇਪੀ ਪੈਲੇਸ 'ਚ ਦੀਪਕ ਤੇ ਜਯਾ ਦੇ ਵਿਆਹ ਦੀਆਂ ਸ਼ਾਹੀ ਤਿਆਰੀਆਂ ਹੋ ਚੁੱਕੀਆਂ ਹਨ। ਵਿਸ਼ੇਸ਼ ਮਹਿਮਾਨਾਂ ਨੇ ਲਾੜੇ ਦੇ ਪਿਤਾ ਲੋਕੇਂਦਰ ਸਿੰਘ ਚਾਹਰ, ਚਾਚਾ ਦੇਸਰਾਜ ਚਾਹਰ, ਭਰਾ ਰਾਹੁਲ ਚਾਹਰ, ਭੈਣ ਮਾਲਤੀ ਨਾਲ ਡਾਂਸ ਕੀਤਾ।

ਇਸ ਤੋਂ ਪਹਿਲਾਂ ਮਹਿੰਦੀ ਤੇ ਸੰਗੀਤ ਸਮਾਰੋਹ 'ਚ ਦੀਪਕ ਚਾਹਰ ਅਤੇ ਜਯਾ ਦੇ ਦੇਸੀ ਅੰਦਾਜ਼ ਨੂੰ ਲੋਕਾਂ ਨੇ ਕਾਫੀ ਪਸੰਦ ਕੀਤਾ ਸੀ। ਮਨੀਸ਼ ਮਲਹੋਤਰਾ ਨੇ ਵਿਆਹ ਲਈ ਦੀਪਕ ਚਾਹਰ ਅਤੇ ਜਯਾ ਭਾਰਦਵਾਜ ਦਾ ਪਹਿਰਾਵਾ ਡਿਜ਼ਾਈਨ ਕੀਤਾ ਹੈ। ਚਾਹਰ ਦੇ ਪਰਿਵਾਰਕ ਮੈਂਬਰ ਲਾੜੇ ਦੇ ਪਹਿਰਾਵੇ ਨਾਲ ਮੇਲ ਖਾਂਦੇ ਥੀਮ ਵਿੱਚ ਬਾਰਾਤ ਵਿੱਚ ਦਿਖਾਈ ਦਿੱਤੇ।

ਦੱਸ ਦੇਈਏ ਕਿ ਦੀਪਕ ਨੇ ਜਯਾ ਨੂੰ ਪਿਛਲੇ ਸਾਲ ਯੂਏਈ ਵਿੱਚ ਆਈਪੀਐਲ ਮੈਚ ਦੌਰਾਨ ਸਟੇਡੀਅਮ ਵਿੱਚ ਪ੍ਰਪੋਜ਼ ਕੀਤਾ ਸੀ। ਇਸ ਤੋਂ ਪਹਿਲਾਂ ਦੋਵੇਂ ਕਾਫੀ ਸਮੇਂ ਤੋਂ ਇਕ-ਦੂਜੇ ਨੂੰ ਡੇਟ ਕਰ ਰਹੇ ਸਨ। IPL ਮੈਚਾਂ ਦੌਰਾਨ ਜਯਾ ਨੂੰ ਸਟੇਡੀਅਮ 'ਚ ਕਈ ਵਾਰ ਦੀਪਕ ਨੂੰ ਚੀਅਰ ਕਰਦੇ ਦੇਖਿਆ ਗਿਆ।

ਜਯਾ ਦਾ ਭਰਾ ਸਿਧਾਰਥ 'ਬਿੱਗ ਬੌਸ' 'ਚ ਨਜ਼ਰ ਆ ਚੁੱਕਾ ਹੈ। ਸਿਧਾਰਥ ਐਮਟੀਵੀ ਸਪਲਿਟਸਵਿਲਾ ਸੀਜ਼ਨ 2 ਦਾ ਵਿਜੇਤਾ ਵੀ ਹੈ। ਸਿਧਾਰਥ ਨੇ ਭੈਣ ਜਯਾ ਦੀ ਮੰਗਣੀ 'ਤੇ ਫੋਟੋ ਸ਼ੇਅਰ ਕਰਕੇ ਵਧਾਈ ਵੀ ਦਿੱਤੀ। ਚਾਹਰ ਨੂੰ CSK ਨੇ IPL 2022 ਦੀ ਮੇਗਾ ਨਿਲਾਮੀ ਦੌਰਾਨ 14 ਕਰੋੜ ਰੁਪਏ ਵਿੱਚ ਖਰੀਦਿਆ ਸੀ। ਹਾਲਾਂਕਿ, ਉਹ ਸੱਟ ਕਾਰਨ ਪੂਰੇ ਸੀਜ਼ਨ ਤੋਂ ਬਾਹਰ ਹੋ ਗਏ ਸਨ।