IND vs PAK: ਕੈਚ ਡਰਾਪ 'ਤੇ ਅਰਸ਼ਦੀਪ ਨੂੰ ਮਿਲਿਆ ਵਿਰਾਟ ਦਾ ਸਾਥ, ਪ੍ਰੈੱਸ ਕਾਨਫਰੰਸ 'ਚ ਕੋਹਲੀ ਨੇ ਕਹੀ ਇਹ ਖਾਸ ਗੱਲ
Asia Cup 2022: ਸੁਪਰ-4 ਦੌਰ 'ਚ ਪਾਕਿਸਤਾਨ ਨੇ ਭਾਰਤ ਨੂੰ 5 ਵਿਕਟਾਂ ਨਾਲ ਹਰਾਇਆ। ਇਸ ਮੈਚ ਦਾ ਟਰਨਿੰਗ ਪੁਆਇੰਟ ਅਰਸ਼ਦੀਪ ਦਾ ਕੈਚ ਡਰਾਪ ਮੰਨਿਆ ਜਾ ਰਿਹਾ ਹੈ। ਉਸਨੇ 18ਵੇਂ ਓਵਰ ਵਿੱਚ ਇੱਕ ਕੈਚ ਛੱਡਿਆ।
Virat Kohli on Arshdeep: ਭਾਰਤੀ ਖਿਡਾਰੀ ਅਰਸ਼ਦੀਪ ਸਿੰਘ ਨੇ ਐਤਵਾਰ ਨੂੰ ਏਸ਼ੀਆ ਕੱਪ 'ਚ ਪਾਕਿਸਤਾਨ ਖਿਲਾਫ਼ ਅਹਿਮ ਕੈਚ ਸੁੱਟ ਦਿੱਤਾ ਸੀ। 18ਵੇਂ ਓਵਰ ਦੀ ਤੀਜੀ ਗੇਂਦ 'ਤੇ ਉਸ ਨੇ ਆਸਿਫ ਅਲੀ ਦਾ ਕੈਚ ਛੱਡ ਦਿੱਤਾ। ਆਸਿਫ ਨੇ ਬਾਅਦ 'ਚ 8 ਗੇਂਦਾਂ 'ਚ 16 ਦੌੜਾਂ ਬਣਾ ਕੇ ਪਾਕਿਸਤਾਨ ਨੂੰ ਜਿੱਤ ਦੀ ਦਹਿਲੀਜ਼ 'ਤੇ ਪਹੁੰਚਾਇਆ। ਅਰਸ਼ਦੀਪ ਦੀ ਇਸ ਮਿਸਫੀਲਡਿੰਗ ਨਾਲ ਭਾਰਤ ਨੇ ਮੈਚ ਵਿੱਚ ਵਾਪਸੀ ਦਾ ਚੰਗਾ ਮੌਕਾ ਗੁਆ ਦਿੱਤਾ। ਇਹ ਭਾਰਤ ਦੀ ਹਾਰ ਦਾ ਇੱਕ ਵੱਡਾ ਕਾਰਨ ਸੀ। ਹਾਲਾਂਕਿ ਮੈਚ ਤੋਂ ਬਾਅਦ ਪ੍ਰੈੱਸ ਕਾਨਫਰੰਸ 'ਚ ਵਿਰਾਟ ਕੋਹਲੀ ਨੇ ਇਸ ਨੌਜਵਾਨ ਤੇਜ਼ ਗੇਂਦਬਾਜ਼ ਦੇ ਸਮਰਥਨ 'ਚ ਗੱਲ ਕੀਤੀ।
ਵਿਰਾਟ ਨੇ ਕਿਹਾ, 'ਜਦੋਂ ਮੈਂ ਚੈਂਪੀਅਨਸ ਟਰਾਫੀ 'ਚ ਪਾਕਿਸਤਾਨ ਖਿਲਾਫ਼ ਆਪਣਾ ਪਹਿਲਾ ਮੈਚ ਖੇਡ ਰਿਹਾ ਸੀ ਤਾਂ ਮੈਂ ਵੀ ਖਰਾਬ ਸ਼ਾਟ ਖੇਡ ਕੇ ਆਊਟ ਹੋ ਗਿਆ ਸੀ। ਦਬਾਅ ਹੇਠ ਕੋਈ ਵੀ ਗਲਤੀ ਕਰ ਸਕਦਾ ਹੈ। ਟੀਮ 'ਚ ਇਸ ਸਮੇਂ ਮਾਹੌਲ ਕਾਫੀ ਚੰਗਾ ਹੈ। ਇਸ ਦਾ ਸਿਹਰਾ ਟੀਮ ਪ੍ਰਬੰਧਨ ਅਤੇ ਕਪਤਾਨ ਨੂੰ ਜਾਂਦਾ ਹੈ। ਅਰਸ਼ਦੀਪ ਨੂੰ ਆਪਣੀ ਗਲਤੀ ਨੂੰ ਸਮਝਣਾ ਹੋਵੇਗਾ ਤਾਂ ਕਿ ਉਹ ਅਗਲੀ ਵਾਰ ਦਬਾਅ ਵਾਲੇ ਹਾਲਾਤਾਂ 'ਚ ਬਿਹਤਰ ਪ੍ਰਦਰਸ਼ਨ ਕਰ ਸਕੇ।
ਮੁਹੰਮਦ ਨਵਾਜ਼ ਦੀ ਪਾਰੀ ਗੇਮ ਚੇਂਜਰ
ਇਸ ਦੌਰਾਨ ਕੋਹਲੀ ਨੇ ਮੁਹੰਮਦ ਨਵਾਜ਼ ਦੀ 20 ਗੇਂਦਾਂ 'ਤੇ 42 ਦੌੜਾਂ ਦੀ ਪਾਰੀ ਨੂੰ ਗੇਮ ਚੇਂਜਰ ਦੱਸਿਆ। “ਉਨ੍ਹਾਂ (ਮੁਹੰਮਦ ਨਵਾਜ਼) ਨੂੰ ਬੱਲੇਬਾਜ਼ੀ ਕ੍ਰਮ ਵਿੱਚ ਭੇਜ ਕੇ ਇੱਕ ਮੌਕਾ ਲਿਆ ਗਿਆ, ਜੋ ਪਾਕਿਸਤਾਨ ਲਈ ਸਹੀ ਸਾਬਤ ਹੋਇਆ। ਅਜਿਹੀ ਪ੍ਰਭਾਵਸ਼ਾਲੀ ਪਾਰੀ ਖੇਡਣਾ ਵੱਡੀ ਗੱਲ ਹੈ। ਜੇ ਉਸ ਦੀ ਪਾਰੀ 15-20 ਦੌੜਾਂ ਤੱਕ ਸੀਮਤ ਹੁੰਦੀ ਤਾਂ ਹਾਲਾਤ ਬਹੁਤ ਬਦਲ ਸਕਦੇ ਸਨ।
'ਵਿਕਟ ਗੁਆਉਣ ਕਾਰਨ 200 ਤੱਕ ਨਹੀਂ ਪਹੁੰਚ ਸਕੇ'
ਕੋਹਲੀ ਨੇ ਕਿਹਾ, 'ਅਸੀਂ ਜਿਸ ਤਰ੍ਹਾਂ ਨਾਲ ਖੇਡ ਰਹੇ ਹਾਂ, ਸਾਨੂੰ ਉਹ ਨਤੀਜੇ ਮਿਲ ਰਹੇ ਹਨ ਜੋ ਅਸੀਂ ਚਾਹੁੰਦੇ ਹਾਂ। ਸਾਡੀ ਮਿਡਲ ਓਵਰ ਰਨ ਰੇਟ 'ਚ ਸੁਧਾਰ ਹੋ ਰਿਹਾ ਹੈ ਪਰ ਕਈ ਵਾਰ ਚੀਜ਼ਾਂ ਉਹ ਨਹੀਂ ਹੁੰਦੀਆਂ ਜਿਵੇਂ ਅਸੀਂ ਚਾਹੁੰਦੇ ਹਾਂ ਕਿ ਉਹ ਹੋਣ। ਅਸੀਂ ਮੱਧ ਓਵਰ ਵਿੱਚ ਕੁਝ ਵਿਕਟਾਂ ਗੁਆ ਦਿੱਤੀਆਂ ਅਤੇ ਇਸ ਕਾਰਨ ਅਸੀਂ 200 ਦੌੜਾਂ ਤੱਕ ਨਹੀਂ ਪਹੁੰਚ ਸਕੇ। ਜੇ ਉਸ ਸਥਿਤੀ 'ਚ ਸਾਡੇ ਕੋਲ ਜ਼ਿਆਦਾ ਵਿਕਟਾਂ ਹੁੰਦੀਆਂ ਤਾਂ ਅਸੀਂ ਜ਼ਿਆਦਾ ਦੌੜਾਂ ਬਣਾ ਸਕਦੇ ਸੀ।
ਪਾਕਿਸਤਾਨ 5 ਵਿਕਟਾਂ ਨਾਲ ਗਿਆ ਜਿੱਤ
ਇਸ ਮੈਚ ਵਿੱਚ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਭਾਰਤ ਨੇ ਰੋਹਿਤ ਸ਼ਰਮਾ (28), ਕੇਐਲ ਰਾਹੁਲ (28) ਅਤੇ ਵਿਰਾਟ ਕੋਹਲੀ (60) ਦੀਆਂ ਦਮਦਾਰ ਪਾਰੀਆਂ ਦੀ ਬਦੌਲਤ 7 ਵਿਕਟਾਂ ਦੇ ਨੁਕਸਾਨ ’ਤੇ 181 ਦੌੜਾਂ ਬਣਾਈਆਂ। ਜਵਾਬ 'ਚ ਪਾਕਿਸਤਾਨ ਦੀ ਟੀਮ ਨੇ ਮੁਹੰਮਦ ਰਿਜ਼ਵਾਨ (71) ਅਤੇ ਮੁਹੰਮਦ ਨਵਾਜ਼ (42) ਦੀ ਸ਼ਾਨਦਾਰ ਬੱਲੇਬਾਜ਼ੀ ਦੇ ਦਮ 'ਤੇ ਜਿੱਤ ਦਰਜ ਕੀਤੀ। ਪਾਕਿਸਤਾਨ ਨੇ ਇਹ ਮੈਚ ਇੱਕ ਗੇਂਦ ਬਾਕੀ ਰਹਿੰਦਿਆਂ ਜਿੱਤ ਲਿਆ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
