DeepSeek ਨੂੰ ਲੈਕੇ ਇੱਕ ਹੋਰ ਖਤਰੇ ਦੀ ਘੰਟੀ, ਇਸ ਖੁਫੀਆ ਏਜੰਸੀ ਨੇ ਕੀਤਾ ਅਲਰਟ, ਦੱਸਿਆ ਹਰ ਖਤਰਾ
ਚੀਨੀ AI ਚੈਟਬੋਟ ਡੀਪਸੀਕ ਲੰਬੇ ਸਮੇਂ ਤੋਂ ਸੁਰਖੀਆਂ ਵਿੱਚ ਹੈ। ਹੁਣ ਦੱਖਣੀ ਕੋਰੀਆ ਦੀ ਖੁਫੀਆ ਏਜੰਸੀ ਨੇ ਕਿਹਾ ਹੈ ਕਿ ਉਹ ਲੋੜ ਤੋਂ ਵੱਧ ਡੇਟਾ ਇਕੱਠਾ ਕਰਦੀ ਹੈ ਫਿਰ ਚੀਨੀ ਕੰਪਨੀਆਂ ਦੇ ਸਰਵਰਾਂ ਨੂੰ ਭੇਜਦੀ ਹੈ।
DeepSeek AI: ਪਿਛਲੇ ਕੁਝ ਦਿਨਾਂ ਤੋਂ ਚੀਨੀ ਕੰਪਨੀ DeepSeek ਦਾ AI ਮਾਡਲ ਚਰਚਾ ਵਿੱਚ ਹੈ। ਪਹਿਲਾਂ ਇਸ ਦੀ ਘੱਟ ਲਾਗਤ ਨੇ ਦੁਨੀਆ ਨੂੰ ਹੈਰਾਨ ਕਰ ਦਿੱਤਾ ਅਤੇ ਹੁਣ ਡੇਟਾ ਸਟੋਰੇਜ ਅਤੇ ਯੂਜ਼ਰਸ ਦੀ ਪ੍ਰਾਈਵੇਸੀ ਸਬੰਧੀ ਚਿੰਤਾਵਾਂ ਸਾਹਮਣੇ ਆ ਰਹੀਆਂ ਹਨ। ਹੁਣ ਦੱਖਣੀ ਕੋਰੀਆ ਦੀ ਖੁਫੀਆ ਏਜੰਸੀ ਨੇ DeepSeek ਦੇ AI ਚੈਟਬੋਟ 'ਤੇ ਬਹੁਤ ਜ਼ਿਆਦਾ ਨਿੱਜੀ ਡੇਟਾ ਇਕੱਠਾ ਕਰਨ ਅਤੇ ਇਸ ਡੇਟਾ ਦੀ ਵਰਤੋਂ ਆਪਣੇ ਆਪ ਨੂੰ ਸਿਖਲਾਈ ਦੇਣ ਲਈ ਕਰਨ ਦਾ ਦੋਸ਼ ਲਗਾਇਆ ਹੈ। ਆਓ ਜਾਣਦੇ ਹਾਂ ਕਿ ਖੁਫੀਆ ਏਜੰਸੀ ਨੇ ਇਸ ਬਾਰੇ ਹੋਰ ਕੀ ਕਿਹਾ ਹੈ।
ਸਰਕਾਰੀ ਏਜੰਸੀਆਂ ਨੂੰ ਦਿੱਤੀ ਚੇਤਾਵਨੀ
ਦੱਖਣੀ ਕੋਰੀਆ ਦੀ ਨੈਸ਼ਨਲ ਇੰਟੈਲੀਜੈਂਸ ਸਰਵਿਸ (NIS) ਨੇ ਕਿਹਾ ਕਿ ਉਸ ਨੇ ਸਾਰੀਆਂ ਸਰਕਾਰੀ ਏਜੰਸੀਆਂ ਨੂੰ DeepSeek ਸੰਬੰਧੀ ਸੁਰੱਖਿਆ ਸਾਵਧਾਨੀਆਂ ਵਰਤਣ ਦੀ ਸਲਾਹ ਦਿੱਤੀ ਹੈ। NIS ਨੇ ਪੁਸ਼ਟੀ ਕੀਤੀ ਹੈ ਕਿ ਚੈਟ ਰਿਕਾਰਡ DeepSeek ਵਿੱਚ ਟ੍ਰਾਂਸਫਰ ਕੀਤੇ ਜਾ ਸਕਦੇ ਹਨ ਅਤੇ ਇਸ ਵਿੱਚ ਕੀਬੋਰਡ ਇਨਪੁਟ ਪੈਟਰਨ ਇਕੱਠੇ ਕਰਨ ਦਾ ਇੱਕ ਫੰਕਸ਼ਨ ਹੈ, ਜੋ ਉਪਭੋਗਤਾਵਾਂ ਦੀ ਪਛਾਣ ਕਰ ਸਕਦਾ ਹੈ ਅਤੇ ਚੀਨੀ ਕੰਪਨੀਆਂ ਦੇ ਸਰਵਰਾਂ ਨਾਲ ਸੰਚਾਰ ਕਰ ਸਕਦਾ ਹੈ। ਤੁਹਾਨੂੰ ਦੱਸ ਦਈਏ ਕਿ ਦੱਖਣੀ ਕੋਰੀਆ ਦੇ ਕਈ ਮੰਤਰਾਲਿਆਂ ਨੇ ਸੁਰੱਖਿਆ ਕਾਰਨਾਂ ਦਾ ਹਵਾਲਾ ਦਿੰਦੇ ਹੋਏ DeepSeek ਦੇ AI ਚੈਟਬੋਟ ਨੂੰ ਬਲਾਕ ਕਰ ਦਿੱਤਾ ਹੈ।
ਚੀਨੀ ਸਰਵਰ ਨੂੰ ਲੈਕੇ ਜਤਾਈ ਜਾ ਰਹੀ ਚਿੰਤਾ
NIS ਨੇ ਕਿਹਾ ਕਿ DeepSeek ਇਸ਼ਤਿਹਾਰ ਦੇਣ ਵਾਲਿਆਂ ਨੂੰ ਯੂਜ਼ਰਸ ਡੇਟਾ ਤੱਕ ਅਨਲਿਮਟਿਡ ਐਕਸੈਸ ਦਿੰਦਾ ਹੈ ਅਤੇ ਚੀਨੀ ਸਰਵਰਾਂ 'ਤੇ ਉਪਭੋਗਤਾ ਡੇਟਾ ਸਟੋਰ ਕਰਦਾ ਹੈ। ਚੀਨੀ ਕਾਨੂੰਨਾਂ ਅਨੁਸਾਰ ਲੋੜ ਪੈਣ 'ਤੇ ਚੀਨੀ ਸਰਕਾਰ ਇਸ ਡੇਟਾ ਤੱਕ ਪਹੁੰਚ ਕਰ ਸਕਦੀ ਹੈ। ਇਸ ਕਾਰਨ ਨਾ ਸਿਰਫ਼ ਉਪਭੋਗਤਾ ਦੀ ਪ੍ਰਾਈਵੇਸੀ ਖ਼ਤਰੇ ਵਿੱਚ ਰਹਿੰਦੀ ਹੈ, ਸਗੋਂ ਨਿਗਰਾਨੀ ਦਾ ਡਰ ਵੀ ਵੱਧ ਜਾਂਦਾ ਹੈ। NIS ਨੇ ਡੀਪਸੀਕ 'ਤੇ ਵੱਖ-ਵੱਖ ਭਾਸ਼ਾਵਾਂ ਵਿੱਚ ਸੰਵੇਦਨਸ਼ੀਲ ਸਵਾਲਾਂ ਦੇ ਵੱਖ-ਵੱਖ ਜਵਾਬ ਦੇਣ ਦਾ ਦੋਸ਼ ਵੀ ਲਗਾਇਆ ਹੈ। ਇਸ ਤੋਂ ਪਹਿਲਾਂ, ਚੀਨੀ ਕੰਪਨੀ ਵਿਰੁੱਧ ਚੀਨੀ ਸਰਕਾਰ ਦੀ ਆਲੋਚਨਾ ਕਰਨ ਵਾਲੇ ਜਵਾਬਾਂ ਨੂੰ ਸੈਂਸਰ ਕਰਨ ਦਾ ਮਾਮਲਾ ਵੀ ਸਾਹਮਣੇ ਆਇਆ ਹੈ। ਬਹੁਤ ਸਾਰੇ ਉਪਭੋਗਤਾਵਾਂ ਨੇ ਪਾਇਆ ਹੈ ਕਿ ਇਸ ਚੈਟਬੋਟ ਦੇ ਜਵਾਬ ਚੀਨੀ ਪ੍ਰੋਪੈਗੇਂਡਾ ਤੋਂ ਪ੍ਰਭਾਵਿਤ ਹਨ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
