ਬਿਜਲੀ ਦਾ ਬਿੱਲ ਭਰਨ ਲਈ ਕਹਿਣਾ AAP ਨੇਤਾ ਨੂੰ ਪਿਆ ਭਾਰੀ, ਕਿਰਾਏਦਾਰ ਨੇ ਢਿੱਡ 'ਚ ਮਾਰਿਆ ਛੁਰਾ, ਹਸਪਤਾਲ 'ਚ ਜ਼ੇਰੇ ਇਲਾਜ
ਅੰਮ੍ਰਿਤਸਰ ਤੋਂ ਇੱਕ ਹੋਰ ਅਪਰਾਧਿਕ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ ਇੱਕ ਸ਼ਖਸ਼ ਵੱਲੋਂ AAP ਨੇਤਾ ਨੂੰ ਛੁਰਾ ਮਾਰ ਕੇ ਜ਼ਖਮੀ ਕਰ ਦਿੱਤਾ। ਮੌਕੇ ਵਾਰਦਾਤ ਤੋਂ ਆਰੋਪੀ ਫਰਾਰ ਹੋ ਗਿਆ। ਪੁਲਿਸ ਛਾਪੇਮਾਰੀ ਕਰਕੇ ਮੁਲਜ਼ਮ ਨੂੰ ਲੱਭ ਰਹੀ ਹੈ।
ਅੰਮ੍ਰਿਤਸਰ ਦੇ ਖੰਡਵਾਲਾ ਵਿਕਾਸ ਨਗਰ ਵਿੱਚ ਦੇਰ ਰਾਤ ਇੱਕ ਵਿਅਕਤੀ ਨੇ AAP ਨੇਤਾ ਨੂੰ ਛੁਰਾ ਮਾਰ ਕੇ ਜ਼ਖਮੀ ਕਰ ਦਿੱਤਾ। ਆਮ ਆਦਮੀ ਪਾਰਟੀ ਦੇ ਵਾਰਡ ਸਕੱਤਰ ਚਰਨਜੀਤ ਸਿੰਘ ਚੰਨੀ ਨੇ ਦੱਸਿਆ ਕਿ ਉਨ੍ਹਾਂ ਨੇ ਘੰਨੂਪੁਰ ਨਿਵਾਸੀ ਸੰਤੋਸ਼ ਕੁਮਾਰ ਨੂੰ ਕਿਰਾਏ 'ਤੇ ਦੂਕਾਨ ਦਿੱਤੀ ਸੀ। ਸਮੇਂ 'ਤੇ ਕਿਰਾਇਆ ਨਾ ਦੇਣ ਕਰਕੇ ਕੁਝ ਸਮਾਂ ਪਹਿਲਾਂ ਉਸ ਤੋਂ ਦੁਕਾਨ ਖਾਲੀ ਕਰਵਾ ਲਈ ਗਈ ਸੀ।
ਦੂਕਾਨ ਖਾਲੀ ਕਰਵਾਉਣ ਤੋਂ ਪਹਿਲਾਂ ਚੰਨੀ ਨੇ ਸੰਤੋਸ਼ ਦਾ ਪਿਛਲਾ ਸਾਰਾ ਕਿਰਾਇਆ ਮੁਆਫ ਕਰ ਦਿੱਤਾ ਸੀ ਅਤੇ ਸਿਰਫ਼ ਬਿਜਲੀ ਦਾ ਬਿੱਲ ਭਰਨ ਲਈ ਕਿਹਾ ਸੀ। ਸੰਤੋਸ਼ ਨੇ ਕੁਝ ਦਿਨਾਂ 'ਚ ਬਿੱਲ ਭਰਨ ਦਾ ਵਾਅਦਾ ਕੀਤਾ ਸੀ ਪਰ ਇੱਕ ਮਹੀਨੇ ਤੋਂ ਉਹ ਬਿੱਲ ਭਰਨ ਵਿੱਚ ਟਾਲਮਟੋਲ ਕਰ ਰਿਹਾ ਸੀ।
ਗੰਭੀਰ ਹਾਲਤ 'ਚ ਹਸਪਤਾਲ 'ਚ ਦਾਖਲ
ਸੋਮਵਾਰ ਰਾਤ ਕਰੀਬ ਸਵਾ ਦਸ ਵਜੇ ਸੰਤੋਸ਼ ਦੂਕਾਨ ਬੰਦ ਕਰ ਰਿਹਾ ਸੀ ਤਾਂ ਚਰਨਜੀਤ ਸਿੰਘ ਨੇ ਉਸ ਤੋਂ ਬਿਜਲੀ ਬਿੱਲ ਦੇਣ ਲਈ ਕਿਹਾ। ਇਸ 'ਤੇ ਸੰਤੋਸ਼ ਨੇ ਗੱਲਾਂ-ਗੱਲਾਂ ਵਿੱਚ ਗਾਲਾਂ ਕੱਢਣੀਆਂ ਅਤੇ ਹੱਥਾਪਾਈ ਕਰਨੀ ਸ਼ੁਰੂ ਕਰ ਦਿੱਤੀ। ਰੋਕਣ 'ਤੇ ਸੰਤੋਸ਼ ਕੁਮਾਰ ਨੇ ਛੁਰੇ ਨਾਲ ਉਸਦੇ ਢਿੱਡ 'ਚ ਦੋ ਵਾਰ ਵਾਰ ਕੀਤਾ, ਜਿਸ ਨਾਲ ਉਹ ਗੰਭੀਰ ਜ਼ਖਮੀ ਹੋ ਗਿਆ। ਲੋਕਾਂ ਨੂੰ ਇਕੱਠਾ ਹੁੰਦੇ ਵੇਖ ਕੇ ਸੰਤੋਸ਼ ਮੌਕੇ ਤੋਂ ਭੱਜ ਗਿਆ।
ਥਾਣਾ ਇੰਚਾਰਜ ਵਿਨੋਦ ਸ਼ਰਮਾ ਨੇ ਦੱਸਿਆ ਕਿ ਮਾਮਲੇ ਦੀ ਸ਼ਿਕਾਇਤ ਮਿਲ ਚੁੱਕੀ ਹੈ। ਜਾਂਚ ਚੱਲ ਰਹੀ ਹੈ ਤੇ ਮੈਡੀਕਲ ਰਿਪੋਰਟ ਆਉਣ ਤੋਂ ਬਾਅਦ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
ਨਹੀਂ ਰੁਕ ਰਿਹਾ ਅਪਰਾਧਿਕ ਘਟਨਾਵਾਂ
ਅੰਮ੍ਰਿਤਸਰ ਜ਼ਿਲ੍ਹੇ ਦੇ ਥਾਣਾ ਮਜੀਠਾ ਦੇ ਹੇਠ ਆਉਂਦੇ ਫਤਿਹਗੜ੍ਹ ਚੂੜੀਆਂ ਰੋਡ 'ਤੇ ਸਥਿਤ ਬਾਜਵਾ ਹਸਪਤਾਲ ਦੇ ਨੇੜੇ ਮੰਗਲਵਾਰ (18 ਮਾਰਚ) ਦੀ ਰਾਤ 9 ਵਜੇ ਸ਼ਰਾਬ ਦੇ ਠੇਕੇ 'ਤੇ ਬਾਈਕ ਸਵਾਰ ਦੋ ਨੌਜਵਾਨਾਂ ਨੇ ਪੈਟਰੋਲ ਬੰਬ ਸੁੱਟਿਆ ਅਤੇ ਗੋਲੀਬਾਰੀ ਵੀ ਕੀਤੀ। ਘਟਨਾ ਦੌਰਾਨ ਹਮਲਾਵਰਾਂ ਦੀ ਪਿਸਤੌਲ ਦੀ ਮੈਗਜ਼ੀਨ ਵੀ ਡਿੱਗ ਗਈ।
ਜਿਵੇਂ ਹੀ ਜਾਣਕਾਰੀ ਮਿਲੀ ਤਾਂ ਡੀਐਸਪੀ ਜਸਪਾਲ ਸਿੰਘ ਢਿੱਲੋਂ ਪੁਲਿਸ ਟੀਮ ਸਮੇਤ ਮੌਕੇ 'ਤੇ ਪਹੁੰਚੇ ਅਤੇ ਜਾਂਚ ਸ਼ੁਰੂ ਕੀਤੀ। ਘਟਨਾ ਸਥਲ 'ਤੇ ਪੁਲਿਸ ਨੂੰ ਗੋਲੀ ਦਾ ਕੋਈ ਖੋਲ ਨਹੀਂ ਮਿਲਿਆ, ਪਰ ਪਿਸਤੌਲ ਦੀ ਮੈਗਜ਼ੀਨ ਕਬਜੇ 'ਚ ਲੈ ਲਿਆ।
ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾਂ 17 ਮਾਰਚ ਨੂੰ ਅੰਮ੍ਰਿਤਸਰ ਦੇ ਠਾਕੁਰਦਵਾਰਾ ਮੰਦਰ 'ਤੇ ਸ਼ੁੱਕਰਵਾਰ (14 ਮਾਰਚ) ਦੀ ਰਾਤ ਗ੍ਰੇਨੇਡ ਨਾਲ ਹਮਲਾ ਕਰਨ ਵਾਲੇ ਬਦਮਾਸ਼ਾਂ ਦਾ ਪੁਲਿਸ ਨਾਲ ਐਨਕਾਊਂਟਰ ਹੋਇਆ ਸੀ। ਪੁਲਿਸ ਨਾਲ ਮੁਠਭੇੜ ਦੌਰਾਨ ਇੱਕ ਬਦਮਾਸ਼ ਮਾਰਿਆ ਗਿਆ ਸੀ, ਜਿਸਦੀ ਪਛਾਣ ਗੁਰਸਿਦਕ ਵਜੋਂ ਹੋਈ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
