ਲੁਧਿਆਣਾ 'ਚ ਗੈਸ ਲੀਕ ਨਾਲ ਲੱਗੀ ਅੱਗ; 3 ਬੱਚਿਆਂ ਸਮੇਤ 4 ਜ਼ਖਮੀ, ਇਲਾਕੇ 'ਚ ਮੱਚਿਆ ਹੜਕੰਪ
ਲੁਧਿਆਣਾ ਤੋਂ ਖੌਫਨਾਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਕਮਰੇ ਦੇ ਵਿੱਚ ਜ਼ੋਰਦਾਰ ਧਮਕਾ ਹੋਇਆ। ਇਹ ਧਮਕਾ ਗੈਸ ਸਿਲੰਡਰ ਦੇ ਫੱਟਣ ਕਰਕੇ ਹੋਇਆ। ਜਿਸ ਵਿੱਚ ਛੋਟੇ-ਛੋਟੇ ਬੱਚੇ ਅਤੇ ਇੱਕ ਨੌਜਵਾਨ ਬੁਰੀ ਤਰ੍ਹਾਂ ਝੁਲਸ ਗਿਆ।
Ludhiana Gas Leak: ਪੰਜਾਬ ਦੇ ਲੁਧਿਆਣਾ ਵਿੱਚ ਅੱਜ ਸਿਲੰਡਰ ਦੀ ਪਾਈਪ ਲੀਕ ਹੋਣ ਕਾਰਨ ਇੱਕ ਕਮਰੇ ਵਿੱਚ ਅੱਗ ਲੱਗ ਗਈ। ਅੱਗ ਵਿੱਚ 3 ਬੱਚਿਆਂ ਸਮੇਤ ਇੱਕ ਵਿਅਕਤੀ ਗੰਭੀਰ ਰੂਪ ਦੇ ਨਾਲ ਜਲ ਗਿਆ। ਕਮਰੇ ਵਿੱਚ ਚੀਕ ਚਿਹਾੜਾ ਪੈ ਗਿਆ, ਜਿਸ ਤੋਂ ਬਾਅਦ ਲੋਕ ਮੌਕੇ ਤੇ ਪਹੁੰਚੇ ਅਤੇ ਜ਼ਖਮੀ ਹੋਏ ਲੋਕਾਂ ਨੂੰ ਸਿਵਲ ਹਸਪਤਾਲ ਪਹੁੰਚਾਇਆ, ਜਿੱਥੇ ਉਨ੍ਹਾਂ ਦਾ ਇਲਾਜ ਕੀਤਾ ਜਾ ਰਿਹਾ ਹੈ।
ਜ਼ਖਮੀ ਬੱਚਿਆਂ ਦੀ ਮਾਂ ਗੁੱਡੀ ਨੇ ਦੱਸਿਆ ਕਿ ਉਹ ਨੀਚੀ ਮੰਗਲੀ ਦੀ ਰਹਿਣ ਵਾਲੀ ਹੈ। ਉਹ ਜਿੱਥੇ ਰਹਿੰਦੀ ਹੈ, ਉੱਥੇ ਵਿਕਾਸ ਨਾਮ ਦਾ ਨੌਜਵਾਨ ਵੀ ਰਹਿੰਦਾ ਹੈ। ਉਹ ਅੱਜ ਸਵੇਰੇ ਆਪਣੇ ਕਮਰੇ ਵਿੱਚ ਖਾਣਾ ਬਣਾ ਰਿਹਾ ਸੀ ਅਤੇ ਉਸਦੇ ਬੱਚੇ ਵੀ ਵਿਕਾਸ ਦੇ ਕਮਰੇ ਵਿੱਚ ਬੈਠੇ ਸਨ। ਜਦੋਂ ਵਿਕਾਸ ਨੇ ਕਮਰੇ ਵਿੱਚ ਗੈਸ-ਚੁੱਲ੍ਹਾ ਜਲਾਇਆ, ਤਾਂ ਅਚਾਨਕ ਪਾਈਪ ਤੋਂ ਅੱਗ ਭੜਕ ਗਈ ਤੇ ਸਿਲੰਡਰ ਫੱਟ ਗਿਆ।
ਕਮਰੇ 'ਚ ਪੈ ਗਿਆ ਚੀਕ-ਚਿਹਾੜਾ
ਅੱਗ ਭੜਕਣ ਕਾਰਨ ਧਮਾਕਾ ਵੀ ਹੋਇਆ। ਕਮਰੇ ਦੇ ਅੰਦਰ ਪੂਰਾ ਧੂੰਆਂ ਭਰ ਗਿਆ ਸੀ। ਬੱਚਿਆਂ ਦੀ ਰੋਣ ਦੀ ਆਵਾਜ਼ ਸੁਣ ਕੇ ਸਾਰੇ ਲੋਕ ਇਕੱਠੇ ਹੋਏ, ਜਿਨ੍ਹਾਂ ਨੇ ਜ਼ਖਮੀ ਹੋਏ ਲੋਕਾਂ ਨੂੰ ਕਮਰੇ ਤੋਂ ਬਾਹਰ ਕੱਢਿਆ ਅਤੇ ਹਸਪਤਾਲ ਭੇਜਿਆ। ਜ਼ਖਮੀ ਹੋਏ ਲੋਕਾਂ ਦੀ ਪਛਾਣ ਵਿਕਾਸ, ਅਰਜੁਨ, ਸੁਰਜੀਤ ਅਤੇ ਰਾਹੁਲ ਵਜੋਂ ਕੀਤੀ ਗਈ ਹੈ।
ਚੂਹੇ ਨੇ ਸਿਲੰਡਰ ਦੀ ਪਾਈਪ ਕੱਟੀ
ਹਸਪਤਾਲ ਵਿੱਚ ਜ਼ਖਮੀ ਵਿਕਾਸ ਨੇ ਦੱਸਿਆ ਕਿ ਉਹ ਅੱਜ ਸਵੇਰੇ ਕਮਰੇ ਵਿੱਚ ਖਾਣਾ ਬਣਾ ਰਿਹਾ ਸੀ। ਗੈਸ ਚਲਾਉਣ ਲਈ ਜਿਵੇਂ ਹੀ ਮਾਚਿਸ ਜਲਾਈ, ਤੁਰੰਤ ਚਾਰੋ ਪਾਸੇ ਅੱਗ ਫੈਲ ਗਈ। ਉਸਦੇ ਕੋਲ ਅਰਜੁਨ, ਸੁਰਜੀਤ ਅਤੇ ਰਾਹੁਲ ਬੈਠੇ ਸਨ, ਜਿਹਨਾਂ ਨੂੰ ਅੱਗ ਨੇ ਘੇਰ ਲਿਆ। ਵਿਕਾਸ ਮੁਤਾਬਕ ਉਸਦਾ ਚਿਹਰਾ ਬਹੁਤ ਬੁਰੇ ਢੰਗ ਨਾਲ ਜਲ ਗਿਆ ਹੈ। ਰਾਹੁਲ ਜੋ 4 ਸਾਲ ਦਾ ਹੈ, ਉਸਦੀ ਲੱਤਾਂ ਝੁਲਸ ਗਈਆਂ ਹਨ। ਵਿਕਾਸ ਨੇ ਦੱਸਿਆ ਕਿ ਉਹ ਪਲਾਸਟਿਕ ਦੀ ਫੈਕਟਰੀ ਵਿੱਚ ਕੰਮ ਕਰਦਾ ਹੈ ਅਤੇ ਪਿਛਲੇ 2 ਸਾਲ ਤੋਂ ਲੁਧਿਆਣਾ ਵਿੱਚ ਰਹਿ ਰਿਹਾ ਹੈ।
ਸਿਵਲ ਹਸਪਤਾਲ ਦੇ SMO ਅਖਿਲ ਸਰੀਨ ਨੇ ਦੱਸਿਆ ਕਿ ਚਾਰੋ ਜ਼ਖਮੀਆਂ ਦੀ ਹਾਲਤ ਵੇਖੀ ਹੈ। ਸਾਰਿਆਂ ਦਾ ਇਲਾਜ ਕੀਤਾ ਜਾ ਰਿਹਾ ਹੈ। ਵਿਕਾਸ ਦਾ ਚਿਹਰਾ ਜਲ ਗਿਆ ਹੈ। ਪਹਿਲਾਂ ਹਾਲਤ ਦੇਖ ਕੇ ਸੋਚਿਆ ਸੀ ਕਿ ਇਹਨਾਂ ਨੂੰ PGI ਜਾਂ ਪਟਿਆਲਾ ਭੇਜ ਦਿੱਤਾ ਜਾਵੇ, ਪਰ ਹੁਣ ਹਾਲਤ ਸਧਾਰਨ ਹੈ। ਇਸ ਲਈ ਇਹਨਾਂ ਜ਼ਖਮੀਆਂ ਦਾ ਇਲਾਜ ਇੱਥੇ ਹੀ ਕੀਤਾ ਜਾਵੇਗਾ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
