Punjab News: ਲੁਧਿਆਣਾ 'ਚ ਸਟੇਟ GST ਦੀ ਰੇਡ: ਟੈਕਸ ਚੋਰੀ ਦੇ ਮਾਮਲੇ 'ਚ 2 ਵਪਾਰੀ ਕਾਬੂ, ਮੋਬਾਈਲ ਡੀਟੇਲ ਚੈੱਕ ਕਰ ਕੱਸਿਆ ਜਾਏਗਾ ਸ਼ਿਕੰਜਾ
ਪੰਜਾਬ ਦੇ ਲੁਧਿਆਣਾ ਵਿੱਚ ਬੀਤੀ ਰਾਤ ਸਟੇਟ GST ਵਿਭਾਗ ਦੀਆਂ ਟੀਮਾਂ ਨੇ ਸ਼ਹਿਰ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਛਾਪੇਮਾਰੀ ਕੀਤੀ। ਇਸ ਛਾਪੇਮਾਰੀ ਦੇ ਵਿੱਚ ਦੋ ਵਪਾਰੀਆਂ ਨੂੰ ਕਾਬੂ ਕੀਤਾ ਗਿਆ ਹੈ।
ਪੰਜਾਬ ਦੇ ਲੁਧਿਆਣਾ ਵਿੱਚ ਬੀਤੀ ਰਾਤ ਸਟੇਟ GST ਵਿਭਾਗ ਦੀਆਂ ਟੀਮਾਂ ਨੇ ਸ਼ਹਿਰ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਛਾਪੇਮਾਰੀ ਕੀਤੀ। GST ਅਧਿਕਾਰੀਆਂ ਨੇ ਪਹਿਲਾਂ ਭਾਮਿਆਂ ਰੋਡ 'ਤੇ ਛਾਪਾ ਮਾਰਿਆ ਅਤੇ ਫਿਰ ਸਿਵਲ ਲਾਈਨ ਇਲਾਕੇ ਵਿੱਚ ਰੇਡ ਕੀਤੀ। ਸੂਤਰਾਂ ਮੁਤਾਬਕ, ਇਸ ਰੇਡ ਦੌਰਾਨ ਦੋ ਵਪਾਰੀਆਂ ਨੂੰ ਕਾਬੂ ਕੀਤਾ ਗਿਆ ਹੈ।
ਦੇਰ ਰਾਤ ਅਧਿਕਾਰੀਆਂ ਨੇ ਦੋਵਾਂ ਵਪਾਰੀਆਂ ਦਾ ਸਿਵਲ ਹਸਪਤਾਲ 'ਚ ਮੈਡੀਕਲ ਕਰਵਾਇਆ। ਵਪਾਰੀਆਂ ਦੀ ਪਛਾਣ ਦੀਪਾਂਸ਼ੂ ਆਨੰਦ (ਨਿਵਾਸੀ ਭਾਮਿਆਂ ਐਂਕਲੇਵ) ਅਤੇ ਦੀਪਕ ਗੋਇਲ (ਨਿਵਾਸੀ ਸਿਵਲ ਲਾਈਨਜ਼) ਵਜੋਂ ਹੋਈ ਹੈ।
GST ਅਧਿਕਾਰੀਆਂ ਨੂੰ ਜਾਣਕਾਰੀ ਮਿਲੀ ਸੀ ਕਿ ਦੋਵੇਂ ਵਪਾਰੀ ਆਪਣੇ ਘਰ 'ਤੇ ਮੌਜੂਦ ਹਨ, ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਕਾਬੂ ਕਰ ਲਿਆ ਗਿਆ। ਇਹ ਮਾਮਲਾ ਟੈਕਸ ਚੋਰੀ ਨਾਲ ਜੁੜਿਆ ਹੋ ਸਕਦਾ ਹੈ, ਪਰ ਹੁਣ ਤੱਕ GST ਵਿਭਾਗ ਦੇ ਅਧਿਕਾਰੀ ਇਸ ਮਾਮਲੇ 'ਤੇ ਚੁੱਪ ਹਨ। ਅਧਿਕਾਰੀਆਂ ਵੱਲੋਂ ਕਈ ਦਸਤਾਵੇਜ਼ ਆਪਣੇ ਕਬਜ਼ੇ 'ਚ ਲਏ ਗਏ ਹਨ ਅਤੇ ਮੋਬਾਈਲ ਡੀਟੇਲ ਦੀ ਜਾਂਚ ਜਾਰੀ ਹੈ। ਉਮੀਦ ਹੈ ਕਿ ਇਸ ਮਾਮਲੇ 'ਚ ਜਲਦੀ ਹੀ ਖੁਲਾਸਾ ਕੀਤਾ ਜਾਵੇਗਾ।
ਤਿੰਨ ਦਿਨ ਪਹਿਲਾਂ 157 ਕਰੋੜ ਦੀ GST ਚੋਰੀ ਦਾ ਮਾਮਲਾ ਸਾਹਮਣੇ ਆਇਆ ਸੀ। ਪੰਜਾਬ ਸਰਕਾਰ ਦੇ ਵਿੱਤ ਵਿਭਾਗ ਨੇ 20 ਅਜਿਹੀਆਂ ਫਰਮਾਂ ਦਾ ਪਰਦਾਫਾਸ਼ ਕੀਤਾ ਜੋ ਚਾਲਾਕੀ ਨਾਲ GST ਚੋਰੀ ਕਰ ਰਹੀਆਂ ਸਨ। ਇਨ੍ਹਾਂ ਨੇ ਆਮ ਮਜ਼ਦੂਰਾਂ ਅਤੇ ਬੇਰੁਜ਼ਗਾਰਾਂ ਦੇ ਪੈਨ ਕਾਰਡ ਅਤੇ ਆਧਾਰ ਕਾਰਡ ਲੈ ਕੇ ਫਰਜੀ ਕੰਪਨੀਆਂ ਬਣਾਈਆਂ। ਇਸ ਤਰੀਕੇ ਨਾਲ ਕੁੱਲ 866 ਕਰੋੜ ਰੁਪਏ ਦੇ ਘੋਟਾਲੇ ਦਾ ਪਤਾ ਲੱਗਾ, ਜਿਸ ਵਿੱਚ ਸਿਰਫ਼ ਟੈਕਸੀ ਸੇਵਾਵਾਂ ਦੇ ਨਾਂ 'ਤੇ 157.22 ਕਰੋੜ ਦੀ GST ਚੋਰੀ ਕੀਤੀ ਗਈ। ਮੁੱਖ ਆਰੋਪੀ ਸਰਬਜੀਤ ਸਿੰਘ ਨੂੰ ਫੜਨ ਲਈ ਕਾਰਵਾਈ ਜਾਰੀ ਹੈ।
ਇਸ ਘੋਟਾਲੇ ਵਿੱਚ ਲੁਧਿਆਣਾ ਦੇ ਇੱਕ ਅਕਾਊਂਟੈਂਟ ਦੀ ਮੁੱਖ ਭੂਮਿਕਾ ਸਾਹਮਣੇ ਆਈ ਹੈ। ਉਸਨੇ 2023 ਵਿੱਚ ਇਹ ਫਰਜੀਵਾੜਾ ਸ਼ੁਰੂ ਕੀਤਾ ਸੀ ਅਤੇ ਹੁਣ ਤੱਕ 157.22 ਕਰੋੜ ਰੁਪਏ ਦਾ ਫਰਜੀ ਟੈਕਸ ਕਰੈਡਿਟ ਲੈ ਚੁੱਕਾ ਹੈ। ਟੈਕਸ ਵਿਭਾਗ ਮੁਤਾਬਕ, 2023-24 ਵਿੱਚ 249 ਕਰੋੜ ਦੇ ਫਰਜੀ ਲੈਣ-ਦੇਣ ਦਿਖਾ ਕੇ 45.12 ਕਰੋੜ ਰੁਪਏ ਦਾ ITC ਲਿਆ ਗਿਆ। 2024-25 ਵਿੱਚ 569.54 ਕਰੋੜ ਰੁਪਏ ਦਾ ਝੂਠਾ ਵਪਾਰ ਦਿਖਾ ਕੇ 104.08 ਕਰੋੜ ਰੁਪਏ ਦਾ ITC ਕਲੈਮ ਕੀਤਾ ਗਿਆ। ਸਿਰਫ਼ ਇਸ ਸਾਲ ਦੇ ਪਹਿਲੇ 2 ਮਹੀਨੇ ਵਿੱਚ ਹੀ 47.25 ਕਰੋੜ ਰੁਪਏ ਦਾ ਲੈਣ-ਦੇਣ ਦਿਖਾ ਕੇ 8.01 ਕਰੋੜ ਰੁਪਏ ਦਾ ਫਰਜੀ ਟੈਕਸ ਕਰੈਡਿਟ ਲਿਆ ਗਿਆ। ਹੁਣ ਜਾਂਚ ਏਜੰਸੀਆਂ ਹੋਰ ਲੋਕਾਂ ਦੀ ਵੀ ਛਾਣਬੀਣ ਕਰ ਰਹੀਆਂ ਹਨ।
ਇਸੇ ਤਰ੍ਹਾਂ, ਮਾਂ ਦੁਰਗਾ ਰੋਡ ਲਾਈਨਜ਼ ਨਾਂ ਦੀ ਟ੍ਰਾਂਸਪੋਰਟ ਕੰਪਨੀ ਵਿਰੁੱਧ ਵੀ ਕੇਸ ਦਰਜ ਕੀਤਾ ਗਿਆ ਹੈ। ਇਸ ਕੰਪਨੀ ਨੇ 168 ਕਰੋੜ ਰੁਪਏ ਦੇ ਜਾਲੀ ਈ-ਬਿਲ ਬਣਾ ਕੇ ਧੋਖਾਧੜੀ ਕੀਤੀ। ਇਹ ਈ-ਬਿਲ ਲੁਧਿਆਣਾ ਅਧਾਰਤ ਫਰਮਾਂ ਦੇ ਸਰਟੀਫਿਕੇਟਾਂ ਦੀ ਵਰਤੋਂ ਕਰਕੇ ਤਿਆਰ ਕੀਤੇ ਗਏ ਸਨ, ਜੋ ਲੁਧਿਆਣਾ ਤੋਂ ਦਿੱਲੀ ਤੱਕ ਸਮਾਨ ਦੀ ਆਵਾਜਾਈ ਨੂੰ ਦਿਖਾਉਂਦੇ ਸਨ। ਜਦਕਿ ਅਸਲ 'ਚ ਕੋਈ ਵੀ ਵਾਹਨ ਪੰਜਾਬ ਵਿੱਚ ਦਾਖਲ ਨਹੀਂ ਹੋਇਆ ਸੀ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
