ਸਿੱਧੂ ਤੇ ਮਜੀਠੀਆ ਦੇ ਨਾ ਹੱਥ ਮਿਲੇ, ਨਾ ਅੱਖ, ਦਿਲ ਤਾਂ ਦੂਰ ਦੀ ਗੱਲ!

ਜਲੰਧਰ: ਪੰਜਾਬ ਵਿਧਾਨ ਸਭਾ 'ਚ ਇੱਕ-ਦੂਜੇ ਨੂੰ ਟੁੱਟ ਕੇ ਪੈਣ ਵਾਲੇ ਨਵਜੋਤ ਸਿੱਧੂ ਤੇ ਬਿਕਰਮ ਮਜੀਠੀਆ ਜਲੰਧਰ 'ਚ ਰਾਮਨੌਮੀ ਦੇ ਸਮਾਗਮ 'ਚ ਇਕੱਠੇ ਬੈਠੇ ਦੇਖੇ ਗਏ। ਇੱਥੇ ਲੋਕਾਂ ਦੀ ਨਿਗ੍ਹਾ ਇਨ੍ਹਾਂ ਲੀਡਰਾਂ ਉੱਪਰ ਹੀ ਰਹੀ। ਪੰਜਾਬ ਦੀ ਸਿਆਸਤ ਦੇ ਸਭ ਤੋਂ ਵੱਡੇ ਵਿਰੋਧੀਆਂ ਦੇ ਕੰਨਾਂ ਨਾਲ ਕੰਨ ਵੱਜਦੇ ਰਹੇ ਤੇ ਨਜ਼ਾਰਾ ਬਾਕੀ ਲੀਡਰ ਲੈਂਦੇ ਰਹੇ। ਕੈਬਨਿਟ ਮੰਤਰੀ ਨਵਜੋਤ ਸਿੱਧੂ ਤੇ ਸਾਬਕਾ ਅਕਾਲੀ ਮੰਤਰੀ ਬਿਕਰਮ ਮਜੀਠੀਆ ਦੋਵੇਂ ਇੱਕ ਕਤਾਰ 'ਚ ਕਰੀਬ ਤਿੰਨ ਫੁੱਟ ਦੇ ਫਾਸਲੇ 'ਤੇ ਦੋ ਘੰਟੇ ਤੱਕ ਬੈਠੇ ਰਹੇ। ਇਸ ਦੇ ਬਾਵਜੂਦ ਦੋਵਾਂ ਵਿਚਾਲੇ ਨਾ ਕੋਈ ਗੱਲ ਹੋਈ ਤੇ ਨਾ ਦੋਹਾਂ ਨੇ ਇੱਕ-ਦੂਜੇ ਵੱਲ ਤੱਕਿਆ। ਦੋਵਾਂ ਵਿਚਾਲੇ ਬਲਦੇਵ ਰਾਜ ਚਾਵਲਾ ਬੈਠੇ ਸੀ ਨਹੀਂ ਤਾਂ ਗੋਡੇ ਨਾਲ ਗੋਡਾ ਭਿੜਦਾ। ਇੱਕੋ ਲਾਈਨ ਵਿੱਚ ਦੋਵੇਂ ਲੀਡਰ ਇੰਨੀ ਦੇਰ ਤੱਕ ਬੈਠੇ ਰਹੇ ਪਰ ਦੋਵਾਂ ਨੇ ਇੱਕ-ਦੂਜੇ ਨੂੰ ਬਲਾਉਣ ਦੀ ਕੋਸ਼ਿਸ਼ ਵੀ ਨਾ ਕੀਤੀ। ਪੰਡਾਲ 'ਚ ਆਏ ਬਾਕੀ ਲੀਡਰਾਂ ਨਾਲ ਸਿੱਧੂ ਨੇ ਵੀ ਗੱਲ ਕੀਤੀ ਤੇ ਮਜੀਠੀਆ ਨੇ ਵੀ, ਪਰ ਆਪਸ ਵਿੱਚ ਦੁਆ ਸਲਾਮ ਵੀ ਨਾ ਹੋਈ। ਇਸ ਦਾ ਇਸ਼ਾਰਾ ਸਾਫ ਹੈ ਕਿ ਡਰੱਗ ਦੇ ਮੁੱਦੇ 'ਤੇ ਇਨ੍ਹਾਂ ਦੋਵਾਂ ਲੀਡਰਾਂ ਦਾ ਝਗੜਾ ਹੁਣ ਕਾਫੀ ਅੱਗੇ ਵਧ ਗਿਆ ਹੈ। ਨਵਜੋਤ ਸਿਧੂ ਵੱਲੋਂ ਐਸਟੀਐਫ ਦੀ ਰਿਪੋਰਟ ਨੂੰ ਲੈ ਕੇ ਮਜੀਠੀਆ ਦੀ ਗ੍ਰਿਫ਼ਤਾਰੀ ਦੀ ਮੰਗ ਕਰਨ ਤੋਂ ਬਾਅਦ ਇਹ ਮੁੱਦਾ ਭਖ ਗਿਆ। ਰਾਮਨੌਮੀ ਦਾ ਕੀਰਤਨ ਮੁੱਕਦਿਆਂ ਹੀ ਸਿੱਧੂ ਨੇ ਪੰਡਾਲ 'ਚੋਂ ਨਿਕਲ ਕੇ ਮਜੀਠੀਆ 'ਤੇ ਫਿਰ ਭੜਾਸ ਕੱਢੀ। ਨਵਜੋਤ ਸਿੱਧੂ ਨੂੰ ਮਜੀਠੀਆ ਬਾਰੇ ਸਵਾਲ ਪੁੱਛਣ 'ਤੇ ਉਨ੍ਹਾਂ ਕਿਹਾ ਮਜੀਠੀਆ ਡਾਕੂ ਤੇ ਤਸਕਰ ਹੈ, ਜੋ ਆਪਣੇ ਘਰ 'ਚ ਤਸਕਰਾਂ ਨੂੰ ਰੱਖਦਾ ਸੀ। ਉਨ੍ਹਾਂ ਨੂੰ ਆਪਣੇ ਗਨਮੈਨ ਵੀ ਦਿੰਦਾ ਸੀ। ਕਸਰ ਮਜੀਠੀਆ ਨੇ ਵੀ ਨਾ ਛੱਡੀ ਪਰ ਸਿੱਧੂ ਦੀ ਬਜਾਏ ਮੁੱਦਾ ਜੀਐਸਟੀ ਦਾ ਫੜਿਆ ਤੇ ਔਖੇ ਭਾਰੇ ਕੈਪਟਨ ਸਰਕਾਰ 'ਤੇ ਹੋਏ।