![ABP Premium](https://cdn.abplive.com/imagebank/Premium-ad-Icon.png)
ਅਮਰੀਕਾ ਦੀ ਜੇਲ੍ਹ ’ਚ ਸਿੱਖ ਕੈਦੀ ਦੀ ਦਾੜ੍ਹੀ ਦੇ ਕੇਸ ਜਬਰੀ ਕਤਲ, ਸਿਵਲ ਰਾਈਟਸ ਡਿਵੀਜ਼ਨ ਕੋਲ ਪਹੁੰਚੀ ਸ਼ਿਕਾਇਤ
ਵਕੀਲਾਂ ਅਨੁਸਾਰ ਦਾੜ੍ਹੀ ਦੇ ਕੇਸ ਕਤਲ ਕੀਤੇ ਜਾਣ ਤੋਂ ਬਾਅਦ ਉਨ੍ਹਾਂ ਦੇ ਮੁਵੱਕਿਲ ਸੁਰਜੀਤ ਸਿੰਘ ਘੋਰ-ਨਿਰਾਸ਼ਾ (ਡੀਪ੍ਰੈਸ਼ਨ) ਦੇ ਸ਼ਿਕਾਰ ਹੋ ਗਏ ਹਨ ਤੇ ਆਪਣੇ-ਆਪ ਤੋਂ ਸ਼ਰਮਸਾਰ ਹੋਣ ਦੀ ਭਾਵਨਾ ਉਨ੍ਹਾਂ ਵਿੱਚ ਘਰ ਕਰ ਗਈ ਹੈ।
![ਅਮਰੀਕਾ ਦੀ ਜੇਲ੍ਹ ’ਚ ਸਿੱਖ ਕੈਦੀ ਦੀ ਦਾੜ੍ਹੀ ਦੇ ਕੇਸ ਜਬਰੀ ਕਤਲ, ਸਿਵਲ ਰਾਈਟਸ ਡਿਵੀਜ਼ਨ ਕੋਲ ਪਹੁੰਚੀ ਸ਼ਿਕਾਇਤ Sikh Man's Beard Forcibly Shaved in Arizona Prison; Complaint Lodged Against Officials in civil rights division ਅਮਰੀਕਾ ਦੀ ਜੇਲ੍ਹ ’ਚ ਸਿੱਖ ਕੈਦੀ ਦੀ ਦਾੜ੍ਹੀ ਦੇ ਕੇਸ ਜਬਰੀ ਕਤਲ, ਸਿਵਲ ਰਾਈਟਸ ਡਿਵੀਜ਼ਨ ਕੋਲ ਪਹੁੰਚੀ ਸ਼ਿਕਾਇਤ](https://feeds.abplive.com/onecms/images/uploaded-images/2021/05/27/367b240725abe6360d356009452fc3bf_original.jpg?impolicy=abp_cdn&imwidth=1200&height=675)
ਮਹਿਤਾਬ-ਉਦ-ਦੀਨ
ਚੰਡੀਗੜ੍ਹ: ਅਮਰੀਕੀ ਸੂਬੇ ਏਰੀਜ਼ੋਨਾ ਦੀ ਜੇਲ੍ਹ (Arizona Prison) ਵਿੱਚ ਇੱਕ ਸਿੱਖ ਕੈਦੀ ਸੁਰਜੀਤ ਸਿੰਘ ਦੀ ਦਾੜ੍ਹੀ ਦੇ ਕੇਸ ਜ਼ਬਰਦਸਤੀ ਕਤਲ (Sikh Prisoner Surjit Singh Beard shaved) ਕਰਨ ਦਾ ਮਾਮਲਾ ਹੁਣ ਭਖ ਗਿਆ ਹੈ। ਵਕੀਲਾਂ ਨੇ ਕੇਂਦਰ ਸਰਕਾਰ ਤੋਂ ਇਸ ਸੂਬੇ ਦੀਆਂ ਸਰਕਾਰੀ ਨੀਤੀਆਂ ਲਈ ਮਨੁੱਖੀ ਅਧਿਕਾਰਾਂ ਦੇ ਆਧਾਰ ਉੱਤੇ ਜਾਂਚ ਮੰਗੀ ਹੈ। ਸੁਰਜੀਤ ਸਿੰਘ ਹੁਰਾਂ ਨੇ ਪਹਿਲਾਂ ਜੇਲ੍ਹ ਅਧਿਕਾਰੀਆਂ ਨੂੰ ਬਾਕਾਇਦਾ ਇਹ ਸੂਚਿਤ ਕਰ ਦਿੱਤਾ ਸੀ ਕਿ ਉਹ ਸਿੱਖ ਧਰਮ ਨਾਲ ਸਬੰਧਤ ਹਨ ਤੇ ਉਹ ਆਪਣੇ ਦਾੜ੍ਹੀ ਦੇ ਤੇ ਸਿਰ ਕੇਸ ਕਦੇ ਵੀ ਕਟਵਾ ਨਹੀਂ ਸਕਦੇ।
ਇੱਕ ਕਮਰਸ਼ੀਅਲ ਟਰੱਕ ਡਰਾਇਵਰ ਸੁਰਜੀਤ ਸਿੰਘ ਦੇ ਵਕੀਲਾਂ ਨੇ ਦੋਸ਼ ਲਾਇਆ ਕਿ ਪਿਛਲੇ ਵਰ੍ਹੇ 25 ਅਗਸਤ, 2020 ਨੂੰ ਸੁਰਜੀਤ ਸਿੰਘ ਦੀ ਧਾਰਮਿਕ ਆਜ਼ਾਦੀ ਦੀ ਘੋਰ ਉਲੰਘਣਾ ਹੋਈ, ਜਦੋਂ ਜੇਲ੍ਹ ਅਧਿਕਾਰੀਆਂ ਨੇ ਸੁਰਜੀਤ ਸਿੰਘ ਦੀ ਦਾੜ੍ਹੀ ਦੇ ਕੇਸ ਜ਼ਬਰਦਸਤੀ ਕਤਲ ਕਰ ਦਿੱਤੇ। ‘ਇੰਡੀਆ ਵੈਸਟ’ ਵੱਲੋਂ ਪ੍ਰਕਾਸ਼ਿਤ ਜੈਕੁਇਸ ਬਿਲਫ਼ੌਡ ਦੀ ਰਿਪੋਰਟ ਅਨੁਸਾਰ ਹੁਣ ਬੀਤੀ 24 ਮਈ ਨੂੰ ਸੁਰਜੀਤ ਸਿੰਘ ਨੇ ਇਸ ਸਬੰਧੀ ਅਮਰੀਕਾ ਦੇ ਨਿਆਂ ਵਿਭਾਗ ਦੇ ਸਿਵਲ ਰਾਈਟਸ ਡਿਵੀਜ਼ਨ (Civil Rights Division) ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ।
ਵਕੀਲਾਂ ਅਨੁਸਾਰ ਦਾੜ੍ਹੀ ਦੇ ਕੇਸ ਕਤਲ ਕੀਤੇ ਜਾਣ ਤੋਂ ਬਾਅਦ ਉਨ੍ਹਾਂ ਦੇ ਮੁਵੱਕਿਲ ਸੁਰਜੀਤ ਸਿੰਘ ਘੋਰ-ਨਿਰਾਸ਼ਾ (ਡੀਪ੍ਰੈਸ਼ਨ) ਦੇ ਸ਼ਿਕਾਰ ਹੋ ਗਏ ਹਨ ਤੇ ਆਪਣੇ-ਆਪ ਤੋਂ ਸ਼ਰਮਸਾਰ ਹੋਣ ਦੀ ਭਾਵਨਾ ਉਨ੍ਹਾਂ ਵਿੱਚ ਘਰ ਕਰ ਗਈ ਹੈ। ਉਨ੍ਹਾਂ ਨੇ ਜੇਲ੍ਹ ਅਧਿਕਾਰੀਆਂ ਨੂੰ ਐਨ ਉਸੇ ਮੌਕੇ ਇਹ ਵੀ ਆਖਿਆ ਸੀ, ਮੇਰੇ ਕੇਸ ਕਤਲ ਨਾ ਕਰੋ, ਮੇਰਾ ਗਲ਼ਾ ਭਾਵੇਂ ਵੱਢ ਦੇਵੋ ਪਰ ਜੇਲ੍ਹ ਦੇ ਮੁਲਾਜ਼ਮਾਂ ਨੇ ਜ਼ਬਰਦਸਤੀ ਉਨ੍ਹਾਂ ਦੀ ਸ਼ੇਵ ਕਰ ਦਿੱਤੀ।
ਸੁਰਜੀਤ ਸਿੰਘ ਹੁਰਾਂ ਦਾ ਦੋਸ਼ ਹੈ ਕਿ ਪਿਛਲੇ ਸਾਲ 6 ਅਕਤੂਬਰ ਨੂੰ ਜਦੋਂ ਉਨ੍ਹਾਂ ਨੂੰ ਇੱਕ ਹੋਰ ਡਗਲਸ ਜੇਲ੍ਹ ਵਿੱਚ ਤਬਦੀਲ ਕੀਤਾ ਜਾ ਰਿਹਾ ਸੀ, ਤਦ ਵੀ ਜੇਲ੍ਹ ਅਧਿਕਾਰੀਆਂ ਨੇ ਉਨ੍ਹਾਂ ਦੀ ਸ਼ੇਵ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ ਪਰ ਤਦ ਉਨ੍ਹਾਂ ਦੀ ਦਾੜ੍ਹੀ ਸਿਰਫ਼ ਇੱਕ ਇੰਚ ਤੱਕ ਹੀ ਵਧ ਸਕੀ ਸੀ; ਇਸੇ ਲਈ ਜੇਲ੍ਹ ਦੀ ਨੀਤੀ ਮੁਤਾਬਕ ਉਨ੍ਹਾਂ ਨੂੰ ਇੰਨੀ ਕੁ ਦਾੜ੍ਹੀ ਰੱਖਣ ਦੀ ਇਜਾਜ਼ਤ ਦੇ ਦਿੱਤੀ ਗਈ।
ਸੁਰਜੀਤ ਸਿੰਘ ਨੂੰ ਅੰਗਰੇਜ਼ੀ ਭਾਸ਼ਾ ਘੱਟ ਆਉਂਦੀ ਹੈ। ਉਨ੍ਹਾਂ ਇਹ ਵੀ ਦੋਸ਼ ਲਾਇਆ ਕਿ ਉਨ੍ਹਾਂ ਨੇ ਜੇਲ੍ਹ ਅਧਿਕਾਰੀਆਂ ਤੋਂ ਪੰਜਾਬੀ ਦੁਭਾਸ਼ੀਏ ਦੀਆਂ ਸੇਵਾਵਾਂ ਦੀ ਮੰਗ ਕੀਤੀ ਸੀ ਪਰ ਉਨ੍ਹਾਂ ਨੇ ਮੁੱਢੋਂ ਇਨਕਾਰ ਕਰ ਦਿੱਤਾ। ਉੱਧਰ ਏਰੀਜ਼ੋਨਾ ਸੂਬੇ ਦੇ ਜੇਲ੍ਹ ਵਿਭਾਗ ਨੇ ਆਪਣੇ ਇੱਕ ਬਿਆਨ ’ਚ ਦਾਅਵਾ ਕੀਤਾ ਹੈ ਕਿ ਸੁਰਜੀਤ ਸਿੰਘ ਦਾ ਮਾਮਲਾ ਤਾਂ ਪਹਿਲਾਂ ਹੀ ਨਿੱਬੜ ਚੁੱਕਾ ਹੈ ਤੇ ਉਹ ਨਿਊ ਯਾਰਕ ਸਥਿਤ ‘ਸਿੱਖ ਕੁਲੀਸ਼ਨ’ ਨਾਂ ਦੀ ਜਥੇਬੰਦੀ ਤੋਂ ਮੁਆਫ਼ੀ ਵੀ ਮੰਗ ਚੁੱਕੇ ਹਨ। ਜੇਲ੍ਹ ਅਧਿਕਾਰੀਆਂ ਅਨੁਸਾਰ ਸੁਰਜੀਤ ਸਿੰਘ ਦੀ ਸ਼ੇਵ ਕਰਨ ਪਿੱਛੇ ਉਨ੍ਹਾਂ ਦੀ ਕੋਈ ਮਾੜੀ ਮਨਸ਼ਾ ਨਹੀਂ ਸੀ, ਇਹ ਸਿਰਫ਼ ਕੁਝ ਗ਼ਲਤਫ਼ਹਿਮੀ ਤੇ ਕੈਦੀ ਦੀ ਗੱਲ ਚੰਗੀ ਤਰ੍ਹਾਂ ਸਮਝ ਨਾ ਆਉਣ ਦਾ ਮਾਮਲਾ ਸੀ।
ਏਰੀਜ਼ੋਨਾ ਦੇ ਜੇਲ੍ਹ ਵਿਭਾਗ (Arizona Department of Corrections) ਨੇ ਇਹ ਵੀ ਕਿਹਾ ਹੈ ਕਿ ਸੁਰਜੀਤ ਸਿੰਘ ਹੁਣ ਆਪਣੀ ਦਾੜ੍ਹੀ ਵੀ ਰੱਖ ਸਕਦੇ ਹਨ ਤੇ ਦਸਤਾਰ ਵੀ ਸਜਾ ਸਕਦੇ ਹਨ। ਉੱਧਰ ਅਮਰੀਕਾ ਦੇ ਕੇਂਦਰੀ ਨਿਆਂ ਵਿਭਾਗ ਨੇ ਸੁਰਜੀਤ ਸਿੰਘ ਦੀ ਸ਼ਿਕਾਇਤ ਬਾਰੇ ਤੁਰੰਤ ਕੋਈ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਇੱਥੇ ਇਹ ਵੀ ਦੱਸ ਦੇਈਏ ਕਿ ਦਸੰਬਰ 2017 ’ਚ ਯੂਨਾ ਕਾਊਂਟੀ ਵਿੱਚ ਸੁਰਜੀਤ ਸਿੰਘ ਦਾ ਟਰੱਕ ਹਾਦਸਾਗ੍ਰਸਤ ਹੋ ਗਿਆ ਸੀ, ਜਿਸ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਸੀ। ਉਸੇ ਮਾਮਲੇ ਵਿੱਚ ਉਨ੍ਹਾਂ ਨੂੰ ਅਦਾਲਤ ਨੇ ਪੰਜ ਸਾਲ ਕੈਦ ਦੀ ਸਜ਼ਾ ਸੁਣਾਈ ਹੈ।
ਇਹ ਵੀ ਪੜ੍ਹੋ: Kate Middleton ਅਤੇ Prince William ਨੇ ਸਿੱਖ ਚੈਰਿਟੀ ਨਾਲ ਮਿਲ ਕੇ ਪਕਾਇਆ ਲੰਗਰ
ਪੰਜਾਬੀ ‘ਚ ਤਾਜ਼ਾ ਖਬਰਾਂ ਪੜ੍ਹਨ ਲਈ ਕਰੋ ਐਪ ਡਾਊਨਲੋਡ:
https://play.google.com/store/apps/details?id=com.winit.starnews.hin
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
![ABP Premium](https://cdn.abplive.com/imagebank/metaverse-mid.png)