ਸ਼ੇਅਰ ਬਾਜ਼ਾਰ ‘ਚ ਧੋਨੀ ਦਾ ਧਮਾਲ, ਮਾਲਮਾਲ ਹੋ ਰਹੇ CSK ਦੇ ਸ਼ੇਅਰ ਹੋਲਡਰਸ

Chennai Super Kings Share: ਮਹਿੰਦਰ ਸਿੰਘ ਧੋਨੀ ਦੀ ਕਪਤਾਨੀ ਹੇਠ ਚੇਨਈ ਸੁਪਰ ਕਿੰਗਜ਼ ਨੇ ਪੰਜਵੀਂ ਵਾਰ ਆਈਪੀਐਲ ਦਾ ਖ਼ਿਤਾਬ ਜਿੱਤਿਆ ਹੈ। ਸ਼ੇਅਰ ਬਾਜ਼ਾਰ 'ਚ CSK ਦੇ ਸ਼ੇਅਕ ਕਾਫੀ ਧਮਾਲ ਮਚਾ ਰਹੇ ਹਨ।

Chennai Super Kings Share

ਕੈਪਟਨ ਕੂਲ ਦੇ ਨਾਮ ਨਾਲ ਮਸ਼ਹੂਰ ਮਹਿੰਦਰ ਸਿੰਘ ਧੋਨੀ ਦੀ ਕਪਤਾਨੀ 'ਚ ਚੇਨਈ ਸੁਪਰ ਕਿੰਗਜ਼ ਨੇ ਇਕ ਹੋਰ ਆਈ.ਪੀ.ਐੱਲ. ਦੀ ਟਰਾਫੀ ਆਪਣੇ ਨਾਮ ਕਰ ਲਈ ਹੈ। ਚੇਨਈ ਸੁਪਰ ਕਿੰਗਜ਼ ਨੇ ਸੋਮਵਾਰ ਰਾਤ ਨੂੰ ਖੇਡੇ ਗਏ ਫਾਈਨਲ ਮੈਚ ਵਿੱਚ ਗੁਜਰਾਤ ਟਾਈਟਨਸ ਨੂੰ ਹਰਾ ਕੇ ਰਿਕਾਰਡ ਪੰਜਵੀਂ ਵਾਰ ਜਿੱਤ ਦਰਜ ਕੀਤੀ। ਧੋਨੀ ਦੀ ਟੀਮ ਦਾ ਸ਼ਾਨਦਾਰ ਪ੍ਰਦਰਸ਼ਨ ਸਿਰਫ ਆਈਪੀਐਲ ਤੱਕ ਸੀਮਤ ਨਹੀਂ ਹੈ, ਸਗੋਂ ਸਟਾਕ ਮਾਰਕੀਟ ਵਿੱਚ ਵੀ CSK ਦਾ ਸ਼ਾਨਦਾਰ ਪ੍ਰਦਰਸ਼ਨ ਹੈ।

ਬਿਜ਼ਨਸ ਟੂਡੇ ਦੀ ਇੱਕ ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਚੇਨਈ ਸੁਪਰ ਕਿੰਗਜ਼ ਦੇ ਸ਼ੇਅਰ ਅਨਲਿਸਟਿਡ ਮਾਰਕਿਟ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਹੇ ਹਨ। ਪਿਛਲੇ 5 ਸਾਲਾਂ ਵਿੱਚ ਅਨਲਿਸਟਿਡ ਮਾਰਕਿਟ ਵਿੱਚ CSK ਦੇ ਸ਼ੇਅਰ ਦੀ ਕੀਮਤ 15 ਗੁਣਾ ਵੱਧ ਹੋ ਗਈ ਹੈ।

ਅਨਲਿਸਟਿਡ ਮਾਰਕਿਟ ਉਹ ਮਾਰਕਿਟ ਹੈ ਜਿੱਥੇ IPO ਤੋਂ ਪਹਿਲਾਂ ਸ਼ੇਅਰ ਖਰੀਦੇ ਅਤੇ ਵੇਚੇ ਜਾਂਦੇ ਹਨ। ਰਿਪੋਰਟ ਦੇ ਅਨੁਸਾਰ, ਚੇਨਈ ਸੁਪਰਕਿੰਗਜ਼ ਦੇ ਪ੍ਰੀ-ਆਈਪੀਓ ਸ਼ੇਅਰ ਦੀ ਕੀਮਤ ਇਸ ਸਮੇਂ ਅਨਲਿਸਟਿਡ ਮਾਰਕਿਟ ਵਿੱਚ 160-165 ਰੁਪਏ ਚੱਲ ਰਹੀ ਹੈ।

ਚੇਨਈ ਸੁਪਰ ਕਿੰਗਜ਼ ਦੇ ਸ਼ੇਅਰਾਂ ਨੂੰ ਨਵੰਬਰ 2018 ਵਿੱਚ ਪੈਰੇਂਟ ਕੰਪਨੀ ਇੰਡੀਆ ਸੀਮੇਂਟ ਤੋਂ ਵੱਖ ਕਰ ਦਿੱਤਾ ਗਿਆ ਸੀ। ਫਿਰ ਇੰਡੀਆ ਸੀਮੇਂਟ ਦੇ ਸ਼ੇਅਰਧਾਰਕਾਂ ਨੂੰ ਹਰ ਸ਼ੇਅਰ ਦੇ ਬਦਲੇ ਵਿੱਚ CSK ਦਾ ਇੱਕ ਸ਼ੇਅਰ ਮਿਲਿਆ ਸੀ।

ਉਸ ਸਮੇਂ ਚੇਨਈ ਸੁਪਰਕਿੰਗਜ਼ ਦੇ ਇਕ ਸ਼ੇਅਰ ਦੀ ਕੀਮਤ 12 ਤੋਂ 15 ਰੁਪਏ ਸੀ, ਜੋ ਹੁਣ 160-165 ਰੁਪਏ ਹੋ ਗਈ ਹੈ। ਇਸ ਤਰ੍ਹਾਂ ਪੰਜ ਸਾਲਾਂ ਦੌਰਾਨ ਇਸ ਦੀ ਕੀਮਤ ਕਰੀਬ 15 ਗੁਣਾ ਵੱਧ ਗਈ ਹੈ।

ਇੰਡੀਆ ਸੀਮੇਂਟ ਨੇ ਸਾਲ 2008 ਵਿੱਚ ਚੇਨਈ ਸੁਪਰ ਕਿੰਗਜ਼ ਦੀ ਫਰੈਂਚਾਇਜ਼ੀ ਨੂੰ 371 ਕਰੋੜ ਰੁਪਏ ਵਿੱਚ ਖਰੀਦਿਆ ਸੀ। ਮਹਿੰਦਰ ਸਿੰਘ ਧੋਨੀ ਸ਼ੁਰੂ ਤੋਂ ਹੀ ਇਸ ਟੀਮ ਦੇ ਕਪਤਾਨ ਸਨ। ਇਸ ਨੂੰ IPL ਦੀ ਸਭ ਤੋਂ ਸਫਲ ਫਰੈਂਚਾਇਜ਼ੀ ਮੰਨਿਆ ਜਾਂਦਾ ਹੈ। ਇਹ ਟੀਮ ਹੁਣ ਤੱਕ 14 ਸੀਜ਼ਨ ਖੇਡ ਚੁੱਕੀ ਹੈ, 10 ਵਾਰ ਫਾਈਨਲ ਵਿੱਚ ਪਹੁੰਚੀ ਹੈ ਅਤੇ 5 ਵਾਰ ਜਿੱਤੀ ਹੈ।

ਚੇਨਈ ਸੁਪਰ ਕਿੰਗਜ਼ ਨੇ ਜਨਵਰੀ 2022 ਵਿੱਚ ਇੱਕ ਵਿਲੱਖਣ ਉਪਲਬਧੀ ਹਾਸਲ ਕੀਤੀ। ਬੀਸੀਸੀਆਈ ਦੁਆਰਾ ਨਵੀਂ ਆਈਪੀਐਲ ਫਰੈਂਚਾਈਜ਼ੀ ਦੀ ਵਿਕਰੀ ਨਾਲ, ਚੇਨਈ ਸੁਪਰ ਕਿੰਗਜ਼ ਦਾ ਮੁੱਲ ਵੀ ਵਧਿਆ ਅਤੇ ਇਹ ਭਾਰਤ ਦੀ ਪਹਿਲੀ ਯੂਨੀਕੋਰਨ ਸਪੋਰਟਸ ਏਟੀਟੀ ਬਣ ਗਈ।

ਅਨਲਿਸਟਿਡ ਮਾਰਕਿਟ ਦੇ ਮਾਹਰਾਂ ਦਾ ਕਹਿਣਾ ਹੈ ਕਿ ਚੇਨਈ ਸੁਪਰਕਿੰਗਜ਼ ਦੇ ਸ਼ੇਅਰਾਂ ਦੀ ਕੀਮਤ 50-60 ਫੀਸਦੀ ਤੱਕ ਵੱਧ ਸਕਦੀ ਹੈ। ਇਸ ਤਰ੍ਹਾਂ ਇਸ ਦੇ ਸ਼ੇਅਰਾਂ ਦੀ ਕੀਮਤ 240-250 ਰੁਪਏ ਦੇ ਦਾਇਰੇ 'ਚ ਪਹੁੰਚ ਸਕਦੀ ਹੈ, ਜਿਸ ਕਾਰਨ ਫਰੈਂਚਾਇਜ਼ੀ ਦਾ ਬਾਜ਼ਾਰ ਮੁੱਲ ਕਰੀਬ 7,500 ਕਰੋੜ ਰੁਪਏ ਹੋ ਸਕਦਾ ਹੈ।