ਡਾਕਟਰੀ ਇਲਾਜ 'ਚ ਇਸਤੇਮਾਲ ਹੋਣ ਵਾਲਾ ਪਾਰਾ ਮਨੁੱਖ ਅਤੇ ਵਾਤਾਵਰਨ ਦੋਵਾਂ ਲਈ ਹੈ ਖਤਰਨਾਕ

ਪਾਰਾ ਥਰਮਾਮੀਟਰ ਅਤੇ ਬਲੱਡ ਪ੍ਰੈਸ਼ਰ ਮਾਪਣ ਵਾਲੇ ਉਪਕਰਣਾਂ ਵਿੱਚ ਪਾਇਆ ਜਾਂਦਾ ਹੈ। ਇਹ ਉਪਕਰਣ ਉਦੋਂ ਤੱਕ ਸੁਰੱਖਿਅਤ ਹਨ ਜਦੋਂ ਤੱਕ ਇਹ ਟੁੱਟ ਨਹੀਂ ਜਾਂਦੇ।

ਮੈਡੀਕਲ ਟੈਸਟਾਂ ਵਿੱਚ ਵਰਤਿਆ ਜਾਣ ਵਾਲਾ ਪਾਰਾ ਸਾਡੇ ਸਰੀਰ ਅਤੇ ਵਾਤਾਵਰਨ ਲਈ ਬਹੁਤ ਖਤਰਨਾਕ ਹੁੰਦਾ ਹੈ। ਇਸ ਦੇ ਲਈ ਇੱਕ ਵੱਡੀ ਪਹਿਲਕਦਮੀ ਕੀਤੀ ਗਈ ਹੈ ਜਿਸ ਵਿੱਚ 134 ਮਿਲੀਅਨ ਡਾਲਰ ਖਰਚ ਕੇ ਪਾਰਾ ਤੋਂ ਹੋਣ ਵਾਲੇ ਨੁਕਸਾਨ ਨੂੰ ਪੂਰੀ ਤਰ੍ਹਾਂ ਖਤਮ ਕਰਨ ਦੀ ਯੋਜਨਾ ਹੈ। 

ਅਲਬਾਨੀਆ, ਬੁਰਕੀਨਾ ਫਾਸੋ, ਭਾਰਤ, ਮੋਂਟੇਨੇਗਰੋ ਅਤੇ ਯੂਗਾਂਡਾ ਵਰਗੇ ਵੱਖ-ਵੱਖ ਦੇਸ਼ਾਂ ਨੇ ਮਿਲ ਕੇ ਸਿਹਤ ਸੇਵਾਵਾਂ ਵਿੱਚ ਵਰਤੇ ਜਾਣ ਵਾਲੇ ਪਾਰਾ ਦੇ ਪ੍ਰਦੂਸ਼ਣ ਨੂੰ ਰੋਕਣ ਲਈ ਪਹਿਲ ਕੀਤੀ ਹੈ। ਇਹ ਦੇਸ਼ ਮਿਲ ਕੇ ਯਕੀਨੀ ਬਣਾਉਣਗੇ ਕਿ ਹਸਪਤਾਲਾਂ ਅਤੇ ਦਵਾਈਆਂ ਵਿੱਚ ਪਾਰਾ ਦੀ ਘੱਟ ਤੋਂ ਘੱਟ ਵਰਤੋਂ ਹੋਵੇ। ਨਾਲ ਹੀ ਇਸ ਦੀ ਥਾਂ ਕੋਈ ਹੋਰ ਸੁਰੱਖਿਅਤ ਚੀਜ਼ ਵਰਤੀ ਜਾਵੇ।

ਪਾਰਾ ਇੱਕ ਕੁਦਰਤੀ ਤੱਤ ਹੈ ਜੋ ਧਰਤੀ ਵਿੱਚ ਚੱਟਾਨਾਂ ਅਤੇ ਕੋਲੇ ਦੇ ਭੰਡਾਰਾਂ ਵਿੱਚ ਪਾਇਆ ਜਾਂਦਾ ਹੈ। ਰਸਾਇਣ ਵਿਗਿਆਨ ਦੀ ਭਾਸ਼ਾ ਵਿੱਚ, ਇਸਨੂੰ 'Hg' ਵਜੋਂ ਦਰਸਾਇਆ ਗਿਆ ਹੈ ਅਤੇ ਇਸਦਾ ਪਰਮਾਣੂ ਸੰਖਿਆ 80 ਹੈ। ਇਹ ਪਾਰਾ ਮੁੱਖ ਤੌਰ 'ਤੇ ਤਿੰਨ ਕਿਸਮਾਂ ਦਾ ਹੁੰਦਾ ਹੈ: ਸਾਧਾਰਨ (ਧਾਤੂ) ਪਾਰਾ, ਅਕਾਰਬਨਿਕ ਪਾਰਾ ਮਿਸ਼ਰਣ (ਜਿਸ ਵਿੱਚ ਕਾਰਬਨ ਨਹੀਂ ਹੁੰਦਾ) ਅਤੇ ਮਿਥਾਈਲਮਰਕਰੀ ਅਤੇ ਹੋਰ ਕਾਰਬਨਿਕ ਮਿਸ਼ਰਣ (ਜਿਸ ਵਿੱਚ ਕਾਰਬਨ ਹੁੰਦਾ ਹੈ)।