ਭਾਰਤ ਨੇ ਤੋੜਿਆ ਆਸਟ੍ਰੇਲੀਆ ਦਾ ਹੰਕਾਰ, 339 ਰਨ ਚੇਜ਼ ਕਰਕੇ ਬਣਾਇਆ ਵਿਸ਼ਵ ਰਿਕਾਰਡ
ਭਾਰਤ ਨੇ ਆਸਟ੍ਰੇਲੀਆ ਨੂੰ 5 ਵਿਕਟਾਂ ਨਾਲ ਹਰਾਕੇ ਵਰਲਡ ਕੱਪ ਦੇ ਫਾਈਨਲ ‘ਚ ਜਗ੍ਹਾ ਬਣਾ ਲਈ ਹੈ।ਹੁਣ ਫਾਈਨਲ ‘ਚ 2 ਨਵੰਬਰ ਨੂੰ ਭਾਰਤੀ ਟੀਮ ਦਾ ਮੁਕਾਬਲਾ ਦੱਖਣੀ ਅਫ਼ਰੀਕਾ ਨਾਲ ਹੋਵੇਗਾ। ਇਹ ਮਹਿਲਾ ਵਰਲਡ ਕੱਪ ਦੇ ਇਤਿਹਾਸ ਦਾ ਸਭ ਤੋਂ ਵੱਡਾ ਰਨ ਚੇਜ਼
ਭਾਰਤ ਨੇ ਆਸਟ੍ਰੇਲੀਆ ਨੂੰ 5 ਵਿਕਟਾਂ ਨਾਲ ਹਰਾਕੇ ਵਰਲਡ ਕੱਪ ਦੇ ਫਾਈਨਲ ‘ਚ ਜਗ੍ਹਾ ਬਣਾ ਲਈ ਹੈ। ਹੁਣ ਫਾਈਨਲ ‘ਚ 2 ਨਵੰਬਰ ਨੂੰ ਭਾਰਤੀ ਟੀਮ ਦਾ ਮੁਕਾਬਲਾ ਦੱਖਣੀ ਅਫ਼ਰੀਕਾ ਨਾਲ ਹੋਵੇਗਾ। ਇਹ ਮਹਿਲਾ ਵਰਲਡ ਕੱਪ ਦੇ ਇਤਿਹਾਸ ਦਾ ਸਭ ਤੋਂ ਵੱਡਾ ਰਨ ਚੇਜ਼ ਹੈ। ਆਸਟ੍ਰੇਲੀਆ ਨੇ ਸੈਮੀਫਾਈਨਲ ਮੈਚ ‘ਚ ਪਹਿਲਾਂ ਖੇਡਦਿਆਂ 338 ਰਨਾਂ ਦਾ ਵਿਸ਼ਾਲ ਸਕੋਰ ਬਣਾਇਆ ਸੀ। ਜੇਮੀਮਾ ਰੋਡਰਿਗਜ਼ ਦੀ ਨਾਟਆਉਟ 127 ਰਨਾਂ ਦੀ ਪਾਰੀ ਅਤੇ ਹਰਮਨਪ੍ਰੀਤ ਕੌਰ ਦੇ 89 ਰਨਾਂ ਦੀ ਪਾਰੀ ਦੀ ਬਦੌਲਤ ਭਾਰਤੀ ਟੀਮ ਨੇ 9 ਗੇਂਦਾਂ ਬਾਕੀ ਰਹਿੰਦਿਆਂ ਹੀ ਟਾਰਗਟ ਹਾਸਲ ਕਰ ਲਿਆ।
ਇਹ ਮਹਿਲਾ ਵਰਲਡ ਕੱਪ ਦੇ ਇਤਿਹਾਸ ‘ਚ ਦੂਜੀ ਵਾਰ ਹੈ ਜਦੋਂ ਭਾਰਤ ਨੇ ਸੈਮੀਫਾਈਨਲ ‘ਚ ਆਸਟ੍ਰੇਲੀਆ ਨੂੰ ਹਰਾਇਆ ਹੈ। ਇਸ ਤੋਂ ਪਹਿਲਾਂ 2017 ਵਰਲਡ ਕੱਪ ‘ਚ ਭਾਰਤੀ ਟੀਮ ਨੇ ਆਸਟ੍ਰੇਲੀਆ ਨੂੰ 36 ਰਨਾਂ ਨਾਲ ਹਰਾਇਆ ਸੀ। ਮੌਜੂਦਾ ਚੈਂਪੀਅਨ ਆਸਟ੍ਰੇਲੀਆ ਦਾ ਅੱਠਵੀਂ ਵਾਰ ਵਿਸ਼ਵ ਚੈਂਪੀਅਨ ਬਣਨ ਦਾ ਸੁਪਨਾ ਅਧੂਰਾ ਰਹਿ ਗਿਆ।
ਭਾਰਤ ਨੇ ਬਣਾਇਆ ਵਿਸ਼ਵ ਰਿਕਾਰਡ
ਇਹ ਮਹਿਲਾ ਵਰਲਡ ਕੱਪ ਦੇ ਇਤਿਹਾਸ ‘ਚ ਕਿਸੇ ਵੀ ਟੀਮ ਵੱਲੋਂ ਚੇਜ਼ ਕੀਤਾ ਗਿਆ ਸਭ ਤੋਂ ਵੱਡਾ ਸਕੋਰ ਹੈ। ਇਸ ਤੋਂ ਪਹਿਲਾਂ ਸਭ ਤੋਂ ਵੱਡੇ ਸਫਲ ਰਨ ਚੇਜ਼ ਦਾ ਰਿਕਾਰਡ ਆਸਟ੍ਰੇਲੀਆ ਦੇ ਨਾਮ ਸੀ, ਜਿਸ ਨੇ ਇਸੇ ਵਰਲਡ ਕੱਪ ‘ਚ ਭਾਰਤ ਖ਼ਿਲਾਫ਼ 331 ਰਨਾਂ ਦਾ ਟਾਰਗਟ ਚੇਜ਼ ਕੀਤਾ ਸੀ। ਨਾਲ ਹੀ ਇਹ ਵਰਲਡ ਕੱਪ ਦੇ ਇਤਿਹਾਸ ‘ਚ ਸਿਰਫ਼ ਦੂਜਾ ਮੌਕਾ ਹੈ ਜਦੋਂ ਕਿਸੇ ਟੀਮ ਨੇ 300 ਤੋਂ ਵੱਧ ਰਨਾਂ ਦਾ ਟਾਰਗਟ ਪੂਰਾ ਕੀਤਾ ਹੈ।
339 ਰਨ – ਭਾਰਤ (ਵਿਰੁੱਧ ਆਸਟ੍ਰੇਲੀਆ)
331 ਰਨ – ਆਸਟ੍ਰੇਲੀਆ (ਵਿਰੁੱਧ ਭਾਰਤ)
278 ਰਨ – ਆਸਟ੍ਰੇਲੀਆ (ਵਿਰੁੱਧ ਭਾਰਤ)
275 ਰਨ – ਦੱਖਣੀ ਅਫ਼ਰੀਕਾ (ਵਿਰੁੱਧ ਭਾਰਤ)
ਰੋਡਰਿਗਜ਼-ਹਰਮਨਪ੍ਰੀਤ ਦਾ ਕਮਾਲ
339 ਰਨਾਂ ਦੇ ਟਾਰਗਟ ਦਾ ਪਿੱਛਾ ਕਰਦਿਆਂ ਭਾਰਤ ਨੇ 59 ਰਨ ਦੇ ਸਕੋਰ ‘ਤੇ ਸਮ੍ਰਿਤੀ ਮੰਧਾਨਾ (24 ਰਨ) ਅਤੇ ਸ਼ੈਫ਼ਾਲੀ ਵਰਮਾ (10 ਰਨ) ਦੇ ਵਿਕਟ ਗਵਾ ਦਿੱਤੇ ਸਨ। ਇਸ ਤੋਂ ਬਾਅਦ ਜੇਮੀਮਾ ਰੋਡਰਿਗਜ਼ ਅਤੇ ਹਰਮਨਪ੍ਰੀਤ ਕੌਰ ਨੇ ਮਿਲ ਕੇ 167 ਰਨਾਂ ਦੀ ਇਤਿਹਾਸਕ ਸਾਂਝ ਪਾਈ ਅਤੇ ਭਾਰਤ ਨੂੰ ਜਿੱਤ ਦੇ ਨੇੜੇ ਪਹੁੰਚਾ ਦਿੱਤਾ। ਇਸ ਦੌਰਾਨ ਹਰਮਨਪ੍ਰੀਤ ਅਤੇ ਰੋਡਰਿਗਜ਼ ਨੂੰ ਕਈ ਵਾਰ ਜੀਵਨਦਾਨ ਵੀ ਮਿਲੇ।
ਹਰਮਨਪ੍ਰੀਤ 36ਵੇਂ ਓਵਰ ‘ਚ ਵੱਡਾ ਸ਼ਾਟ ਖੇਡਣ ਦੀ ਕੋਸ਼ਿਸ਼ ‘ਚ 89 ਰਨਾਂ ਦੇ ਸਕੋਰ ‘ਤੇ ਆਊਟ ਹੋ ਗਈ। ਇੱਥੋਂ ਬਾਅਦ ਸਾਰਾ ਜ਼ਿੰਮੇਵਾ ਰੋਡਰਿਗਜ਼ ਨੇ ਆਪਣੇ ਮੋਢਿਆਂ ‘ਤੇ ਲੈ ਲਿਆ। ਪਹਿਲਾਂ ਉਸ ਨੇ ਦੀਪਤੀ ਸ਼ਰਮਾ ਨਾਲ ਮਿਲ ਕੇ 38 ਰਨ ਜੋੜੇ, ਫਿਰ ਰਿਚਾ ਘੋਸ਼ ਨਾਲ 46 ਰਨਾਂ ਦੀ ਛੋਟੀ ਪਰ ਬਹੁਤ ਮਹੱਤਵਪੂਰਨ ਸਾਂਝ ਪਾਈ। ਖ਼ਾਸ ਕਰਕੇ ਰਿਚਾ ਘੋਸ਼ ਦੀ 162 ਦੇ ਸਟ੍ਰਾਈਕ ਰੇਟ ਨਾਲ ਖੇਡੀ ਗਈ 26 ਰਨਾਂ ਦੀ ਤੇਜ਼ ਪਾਰੀ ਨੇ ਭਾਰਤ ਨੂੰ ਜਿੱਤ ਦੇ ਨੇੜੇ ਲਿਆਉਣ ‘ਚ ਵੱਡਾ ਯੋਗਦਾਨ ਪਾਇਆ।
ਅਖੀਰਲੇ ਓਵਰਾਂ ‘ਚ ਆਸਟ੍ਰੇਲੀਆ ਦੀ ਤਜਰਬੇਕਾਰ ਗੇਂਦਬਾਜ਼ੀ ਦਬਾਅ ‘ਚ ਟੁੱਟ ਗਈ। ਇਸ ਦੌਰਾਨ ਫੀਲਡਰਾਂ ਵੱਲੋਂ ਕੈਚ ਵੀ ਛੁੱਟ ਗਏ। ਰੋਡਰਿਗਜ਼ 127 ਰਨ ਬਣਾ ਕੇ ਨਾਟਆਊਟ ਰਹੀ, ਜਦਕਿ ਜਿੱਤ ਦਾ ਸ਼ਾਟ ਅਮਨਜੋਤ ਕੌਰ ਨੇ ਲਗਾਇਆ, ਜੋ 8 ਗੇਂਦਾਂ ‘ਤੇ 15 ਰਨ ਬਣਾ ਕੇ ਨਾਟਆਊਟ ਰਹੀ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
