U19 Women's T20 World Cup 2025: ਦੇਸ਼ ਦੀਆਂ ਧੀਆਂ ਨੇ ਪਾਈ ਧੱਕ, ਟੀਮ ਇੰਡੀਆ ਇਕ ਵਾਰ ਫਿਰ ਬਣੀ ਚੈਂਪੀਅਨ, T20 ਵਰਲਡ ਕੱਪ 2025 'ਤੇ ਕੀਤਾ ਕਬਜ਼ਾ
ਭਾਰਤ ਅਤੇ ਦੱਖਣੀ ਅਫਰੀਕਾ ਵਿਚਾਲੇ ਖੇਡੇ ਗਏ ਅੰਡਰ 19 ਟੀ-20 ਵਿਸ਼ਵ ਕੱਪ ਦੇ ਫਾਈਨਲ ਮੈਚ 'ਚ ਟੀਮ ਇੰਡੀਆ ਨੇ ਸ਼ਾਨਦਾਰ ਜਿੱਤ ਦਰਜ ਕੀਤੀ। ਇਸ ਮੈਚ 'ਚ ਭਾਰਤ ਨੇ ਦੱਖਣੀ ਅਫਰੀਕਾ ਨੂੰ 9 ਵਿਕਟਾਂ ਨਾਲ ਹਰਾਇਆ।
Team India Champion U19 W T20 World Cup 2025: ਭਾਰਤ ਦੀ ਅੰਡਰ 19 ਮਹਿਲਾ ਟੀਮ ਨੇ ਇਤਿਹਾਸ ਰਚ ਦਿੱਤਾ ਹੈ। ਟੀਮ ਇੰਡੀਆ ਅੰਡਰ 19 ਮਹਿਲਾ ਟੀ20 ਵਰਲਡ ਕੱਪ 2025 ਦਾ ਖਿਤਾਬ ਜਿੱਤ ਗਈ ਹੈ। ਉਸਨੇ ਫਾਈਨਲ ਵਿੱਚ ਦੱਖਣੀ ਅਫਰੀਕਾ ਨੂੰ 9 ਵਿਕਟਾਂ ਨਾਲ ਹਰਾਇਆ। ਖਾਸ ਗੱਲ ਇਹ ਹੈ ਕਿ ਭਾਰਤ ਨੇ ਟੂਰਨਾਮੈਂਟ ਵਿੱਚ ਖੇਡੇ ਸਾਰੇ ਮੈਚ ਜਿੱਤੇ। ਉਸਨੂੰ ਇੱਕ ਵੀ ਮੈਚ ਵਿੱਚ ਹਾਰ ਦਾ ਸਾਹਮਣਾ ਨਹੀਂ ਕਰਨਾ ਪਿਆ। ਟੀਮ ਇੰਡੀਆ ਲਈ ਜੀ ਤ੍ਰਿਸ਼ਾ ਨੇ ਟੂਰਨਾਮੈਂਟ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਉਹ ਸਭ ਤੋਂ ਵੱਧ ਰਨ ਬਣਾਉਣ ਦੇ ਮਾਮਲੇ ਵਿੱਚ ਟੌਪ 'ਤੇ ਰਹੀ।
ਹੋਰ ਪੜ੍ਹੋ : ਵਿਰਾਟ ਕੋਹਲੀ ਦੀ ਸੁਰੱਖਿਆ 'ਚ ਫਿਰ ਹੋਈ ਕੁਤਾਹੀ, ਮੈਦਾਨ 'ਤੇ ਮਿਲਣ ਦੇ ਲਈ ਇੱਕ ਸਾਥ ਪਹੁੰਚੇ ਤਿੰਨ ਫੈਨ
ਦੱਖਣੀ ਅਫਰੀਕਾ ਨੇ ਫਾਈਨਲ ਵਿੱਚ ਭਾਰਤ ਖਿਲਾਫ ਓਲ ਆਉਟ ਹੋਣ ਤੱਕ 82 ਰਨ ਬਣਾਏ। ਇਸ ਦੌਰਾਨ ਟੀਮ ਦੇ ਲਈ ਸਭ ਤੋਂ ਵੱਧ ਰਨ ਵੂਰਨਸਟ ਨੇ ਬਣਾਏ। ਉਨ੍ਹਾਂ ਨੇ 18 ਗੇਂਦਾਂ ਦਾ ਸਾਹਮਣਾ ਕਰਦਿਆਂ 23 ਰਨ ਜੋੜੇ। ਇਸ ਦੌਰਾਨ 3 ਚੌਕੇ ਲਗਾਏ। ਓਪਨਰ ਜੇਮਾ ਬੋਥਾ 16 ਰਨ ਬਣਾਕੇ ਆਊਟ ਹੋ ਗਈ। ਇਸ ਦੌਰਾਨ ਭਾਰਤ ਲਈ ਤ੍ਰਿਸ਼ਾ ਨੇ 3 ਵਿਕਟਾਂ ਲਈ। ਪਰੁਨਿਕਾ ਅਤੇ ਆਯੂਸ਼ੀ ਸ਼ੁਕਲਾ ਨੇ 2-2 ਵਿਕਟਾਂ ਲਈ। ਵੈਸ਼ਨਵੀ ਨੇ ਵੀ 2 ਵਿਕਟਾਂ ਲਈਆਂ।
ਬਹੁਤ ਹੀ ਆਸਾਨੀ ਦੇ ਨਾਲ ਲਕਸ਼ ਨੂੰ ਕੀਤਾ ਪੂਰਾ
ਦੱਖਣੀ ਅਫਰੀਕਾ ਦੁਆਰਾ ਦਿੱਤੇ ਗਏ ਟਾਰਗੇਟ ਦਾ ਪਿੱਛਾ ਕਰਨ ਉਤਰੀ ਭਾਰਤੀ ਟੀਮ ਨੇ 11.2 ਓਵਰਾਂ ਵਿੱਚ ਸਿਰਫ 1 ਵਿਕਟ ਗਵਾ ਕੇ ਲਕਸ਼ ਨੂੰ ਹਾਸਲ ਕਰ ਲਿਆ। ਟੀਮ ਇੰਡੀਆ ਲਈ ਜੀ ਕਮਲਿਨੀ ਅਤੇ ਜੀ ਤ੍ਰਿਸ਼ਾ ਓਪਨਿੰਗ ਕਰਨ ਆਈਆਂ। ਕਮਲਿਨੀ ਸਿਰਫ 8 ਰਨ ਬਣਾਕੇ ਆਊਟ ਹੋ ਗਈ। ਤ੍ਰਿਸ਼ਾ ਨੇ ਨਾਬਾਦ 44 ਰਨ ਬਣਾਏ। ਉਨ੍ਹਾਂ ਨੇ 33 ਗੇਂਦਾਂ ਦਾ ਸਾਹਮਣਾ ਕੀਤਾ ਅਤੇ 8 ਚੌਕੇ ਲਗਾਏ। ਸਨੀਕਾ ਚਾਲਕੇ ਨੇ ਨਾਬਾਦ 26 ਰਨ ਬਣਾਏ। ਉਨ੍ਹਾਂ ਨੇ 4 ਚੌਕੇ ਲਗਾਏ। ਇਸ ਤਰ੍ਹਾਂ ਭਾਰਤ ਨੇ ਫਾਈਨਲ ਵਿੱਚ 9 ਵਿਕਟਾਂ ਨਾਲ ਜਿੱਤ ਹਾਸਲ ਕੀਤੀ।
ਦੱਸਣਯੋਗ ਗੱਲ ਹੈ ਕਿ ਭਾਰਤ ਨੇ ਅੰਡਰ 19 ਮਹਿਲਾ ਟੀ20 ਵਰਲਡ ਕੱਪ 2025 ਦੇ ਆਪਣੇ ਪਹਿਲੇ ਮੈਚ ਵਿੱਚ ਵੈਸਟਇੰਡੀਜ਼ ਨੂੰ ਹਰਾਇਆ ਸੀ। ਇਸ ਤੋਂ ਬਾਅਦ ਮਲੇਸ਼ੀਆ, ਸ਼੍ਰੀਲੰਕਾ ਅਤੇ ਬੰਗਲਾਦੇਸ਼ ਖਿਲਾਫ ਜਿੱਤ ਹਾਸਲ ਕੀਤੀ। ਟੀਮ ਇੰਡੀਆ ਨੇ ਸਕਾਟਲੈਂਡ ਅਤੇ ਇੰਗਲੈਂਡ ਨੂੰ ਵੀ ਹਰਾਇਆ ਸੀ। ਹੁਣ ਫਾਈਨਲ ਵਿੱਚ ਦੱਖਣੀ ਅਫਰੀਕਾ ਨੂੰ 9 ਵਿਕਟਾਂ ਨਾਲ ਹਰਾਇਆ ਹੈ। ਦੇਸ਼ ਦੀਆਂ ਧੀਆਂ ਨੇ ਇੱਕ ਵਾਰ ਫਿਰ ਤੋਂ ਨਾਮ ਰੌਸ਼ਨ ਕੀਤਾ ਹੈ। ਸੋਸ਼ਲ ਮੀਡੀਆ ਉੱਤੇ ਇਸ ਜਿੱਤ ਲਈ ਵਧਾਈਆਂ ਮਿਲ ਰਹੀਆਂ ਹਨ।
ਟਾਪ ਹੈਡਲਾਈਨ
ਟ੍ਰੈਂਡਿੰਗ ਟੌਪਿਕ
