ਭਾਰਤੀ ਨਾਬਾਲਿਗਾਂ ਨਾਲ ਵਿਆਹ ਕਰ ਰਹੇ ਨੇ ਅਰਬ ਦੇ ਸ਼ੇਖ਼, ਅੱਠ ਕਾਬੂ

ਪੁਲਿਸ ਹੈਦਰਾਬਾਦ ਦੇ ਪੁਰਾਣੇ ਇਲਾਕੇ 'ਚ ਇਸ ਤਰ੍ਹਾਂ ਦੇ ਵੱਡੇ ਗਿਰੋਹ ਦਾ ਪਹਿਲਾਂ ਵੀ ਪਰਦਾਫ਼ਾਸ਼ ਕਰ ਚੁੱਕੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਗਿਰੋਹ ਦੇ ਏਜੰਟ ਗ਼ਰੀਬ ਪਰਿਵਾਰਾਂ ਨੂੰ ਪੈਸਿਆਂ ਦਾ ਲਾਲਚ ਦੇ ਕੇ ਉਨ੍ਹਾਂ ਦੀਆਂ ਨਾਬਾਲਿਗ ਲੜਕੀਆਂ ਨੂੰ ਜਾਲ 'ਚ ਫਸਾਉਂਦੇ ਹਨ। ਉਹ ਕਾਜੀ ਦੀ ਮਦਦ ਨਾਲ ਵਿਆਹ ਕਰਵਾ ਕੇ ਇਨ੍ਹਾਂ ਲੜਕੀਆਂ ਨੂੰ ਵਿਦੇਸ਼ੀਆਂ ਨੂੰ ਵੇਚਣ ਦਾ ਕੰਮ ਕਰਦੇ ਹਨ। ਵਿਆਹ ਸਮੇਂ ਲੜਕੀ ਤੋਂ ਤਲਾਕ ਦੇ ਕੋਰੇ ਦਸਤਾਵੇਜ਼ 'ਤੇ ਦਸਤਖਤ ਕਰਵਾ ਲਏ ਜਾਂਦੇ ਹਨ।

ਕਾਬੂ ਕੀਤੇ ਗਏ ਸ਼ੇਖ਼ਾਂ 'ਚ ਪੰਜ ਓਮਾਨ ਤੇ ਤਿੰਨ ਕਤਰ ਦੇ ਨਾਗਰਿਕ ਹਨ। ਇਸ ਗਿਰੋਹ ਦਾ ਜਾਲ ਹੈਦਰਾਬਾਦ ਤੋਂ ਲੈ ਕੇ ਓਮਾਨ ਤੇ ਹੋਰ ਦੇਸ਼ਾਂ ਤੱਕ ਫੈਲਿਆ ਹੈ। ਪੁਲਿਸ ਕਮਿਸ਼ਨਰ ਵੀ ਸੱਤਿਆਨਾਰਾਇਣ ਅਨੁਸਾਰ ਦੋ ਨਾਬਾਲਿਗ ਲੜਕੀਆਂ ਨੂੰ ਬਚਾਇਆ ਜਾ ਰਿਹਾ ਹੈ। ਸ਼ੁਰੂਆਤੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਇਨ੍ਹਾਂ ਲੋਕਾਂ ਨੇ ਵਿਆਹ ਕਰਵਾਉਣ ਦੇ ਬਹਾਨੇ 20 ਲੜਕੀਆਂ ਤੇ ਅੌਰਤਾਂ ਦੀ ਤਸਕਰੀ ਦੀ ਸਾਜ਼ਿਸ਼ ਰਚੀ ਸੀ।