Ramsar Sites : ਦੇਸ਼ 'ਚ 10 ਨਵੀਆਂ ਰਾਮਸਰ ਸਾਈਟਸ ਨੂੰ ਲੈ ਕੇ ਪੀਐਮ ਮੋਦੀ ਨੇ ਦਿੱਤੀ ਵਧਾਈ, ਇਹ ਕਿਹਾ

ਕੇਂਦਰੀ ਵਾਤਾਵਰਣ ਮੰਤਰਾਲੇ ਨੇ ਕਿਹਾ ਸੀ ਕਿ ਭਾਰਤ ਅਤੇ ਚੀਨ ਕੋਲ ਹੁਣ ਅੰਤਰਰਾਸ਼ਟਰੀ ਮਹੱਤਤਾ ਵਾਲੇ ਸਭ ਤੋਂ ਵੱਧ ਵੈਟਲੈਂਡ ਹਨ, ਜਿਸ ਨਾਲ 10 ਹੋਰ ਭਾਰਤੀ ਸਾਈਟਾਂ ਰਾਮਸਰ ਸੂਚੀ ਵਿੱਚ ਸ਼ਾਮਲ ਹੋਣ ਨਾਲ ਉਨ੍ਹਾਂ ਦੀ ਕੁੱਲ ਗਿਣਤੀ 64 ਹੋ ਗਈ ਹੈ।

Ramsar sites in the country

Source : ANI

Wetlands In India: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਦੇਸ਼ ਵਿੱਚ 10 ਨਵੇਂ ਵੈਟਲੈਂਡਜ਼ ਨੂੰ ਰਾਮਸਰ ਸਾਈਟਾਂ ਵਜੋਂ ਨਾਮਜ਼ਦ ਕੀਤੇ ਜਾਣ ਲਈ ਵਧਾਈ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਹਰ ਵਾਤਾਵਰਣ ਪ੍ਰੇਮੀ ਨੂੰ ਖੁਸ਼ੀ ਹੋਵੇਗੀ ਕਿ ਭਾਰਤ ਵਿੱਚ 10 ਹੋਰ ਵੈਟਲੈਂਡ ਨੂੰ ਰਾਮਸਰ ਸਾਈਟਾਂ ਵਜੋਂ ਮਨੋਨੀਤ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਪਿਛਲੇ ਮਹੀਨੇ 5 ਸਾਈਟਾਂ ਨੂੰ ਇਹੋ ਮਾਨਤਾ ਮਿਲੀ ਸੀ, ਇਸ ਨਾਲ ਸਾਡੇ ਕੁਦਰਤੀ ਚੌਗਿਰਦੇ ਦੀ ਰੱਖਿਆ ਲਈ ਸਾਡੀ ਵਚਨਬੱਧਤਾ ਹੋਰ ਡੂੰਘੀ ਹੋਵੇਗੀ।

ਇਸ ਤੋਂ ਪਹਿਲਾਂ ਕੇਂਦਰੀ ਵਾਤਾਵਰਣ ਮੰਤਰਾਲੇ ਨੇ ਕਿਹਾ ਸੀ ਕਿ ਭਾਰਤ ਅਤੇ ਚੀਨ ਕੋਲ ਹੁਣ ਅੰਤਰਰਾਸ਼ਟਰੀ ਮਹੱਤਤਾ ਵਾਲੇ ਸਭ ਤੋਂ ਵੱਧ ਵੈਟਲੈਂਡ ਹਨ, ਜਿਸ ਨਾਲ 10 ਹੋਰ ਭਾਰਤੀ ਸਾਈਟਾਂ ਰਾਮਸਰ ਸੂਚੀ ਵਿੱਚ ਸ਼ਾਮਲ ਹੋਣ ਨਾਲ ਉਨ੍ਹਾਂ ਦੀ ਕੁੱਲ ਗਿਣਤੀ 64 ਹੋ ਗਈ ਹੈ। ਰਾਮਸਰ ਸੂਚੀ ਦਾ ਉਦੇਸ਼ ਵੈਟਲੈਂਡਜ਼ ਦੇ ਇੱਕ ਅੰਤਰਰਾਸ਼ਟਰੀ ਨੈਟਵਰਕ ਨੂੰ ਵਿਕਸਤ ਕਰਨਾ ਅਤੇ ਉਹਨਾਂ ਦੀ ਰੱਖਿਆ ਕਰਨਾ ਹੈ ਜੋ ਉਹਨਾਂ ਦੇ ਈਕੋਸਿਸਟਮ ਦੇ ਹਿੱਸਿਆਂ, ਪ੍ਰਕਿਰਿਆਵਾਂ ਅਤੇ ਲਾਭਾਂ ਦੀ ਸੰਭਾਲ ਦੁਆਰਾ ਗਲੋਬਲ ਜੈਵਿਕ ਵਿਭਿੰਨਤਾ ਅਤੇ ਮਨੁੱਖੀ ਜੀਵਨ ਦੀ ਸੁਰੱਖਿਆ ਲਈ ਮਹੱਤਵਪੂਰਨ ਹਨ।

ਤੁਹਾਡੀ ਜਾਣਕਾਰੀ ਲਈ ਦੱਸ ਦਈਏ ਕਿ ਰਾਮਸਰ ਸਾਈਟਾਂ ਵੈਟਲੈਂਡ ਹੁੰਦੀਆਂ ਹਨ ਜਿਨ੍ਹਾਂ ਦਾ ਅੰਤਰਰਾਸ਼ਟਰੀ ਮਹੱਤਵ ਹੈ।

 

ਇਨ੍ਹਾਂ 10 ਨਾਵਾਂ ਨੂੰ ਸੂਚੀ 'ਚ ਜਗ੍ਹਾ ਮਿਲੀ ਹੈ

ਸੂਚੀ ਵਿੱਚ ਸ਼ਾਮਲ 10 ਨਵੀਆਂ ਸਾਈਟਾਂ ਵਿੱਚੋਂ ਛੇ ਤਾਮਿਲਨਾਡੂ ਅਤੇ ਗੋਆ, ਕਰਨਾਟਕ, ਮੱਧ ਪ੍ਰਦੇਸ਼ ਅਤੇ ਉੜੀਸਾ ਤੋਂ ਇੱਕ-ਇੱਕ ਸਾਈਟ ਹਨ। ਇਹ ਵੈਟਲੈਂਡ ਸਾਈਟਸ ਦੇਸ਼ ਵਿੱਚ 12,50,361 ਹੈਕਟੇਅਰ ਖੇਤਰ ਵਿੱਚ ਫੈਲੀਆਂ ਹੋਈਆਂ ਹਨ। ਮੰਤਰਾਲੇ ਨੇ ਇੱਕ ਬਿਆਨ ਵਿੱਚ ਕਿਹਾ, "ਸੂਚੀ (ਰਾਮਸਰ) ਵਿੱਚ ਇਹਨਾਂ ਸਾਈਟਾਂ ਨੂੰ ਸ਼ਾਮਲ ਕਰਨ ਨਾਲ ਵੈਟਲੈਂਡਜ਼ ਦੀ ਸੰਭਾਲ ਅਤੇ ਪ੍ਰਬੰਧਨ ਅਤੇ ਉਹਨਾਂ ਦੇ ਸਰੋਤਾਂ ਦੀ ਨਿਆਂਪੂਰਨ ਵਰਤੋਂ ਵਿੱਚ ਮਦਦ ਮਿਲੇਗੀ। ਹੁਣ ਭਾਰਤ ਚੀਨ ਦੇ ਨਾਲ ਸਾਂਝੇ ਤੌਰ 'ਤੇ ਪਹਿਲੇ ਸਥਾਨ 'ਤੇ ਹੈ।

ਆਜ਼ਾਦੀ ਦੇ 75 ਸਾਲਾਂ ਵਿੱਚ 75 ਸਾਈਟਾਂ ਦਾ ਟੀਚਾ

ਤਾਮਿਲਨਾਡੂ ਦਾ ਕੋਂਥਨਕੁਲਮ ਬਰਡ ਸੈਂਕਚੂਰੀ, ਗਲਫ ਆਫ ਮੰਨਾਰ ਮਰੀਨ ਬਾਇਓਸਫੀਅਰ ਰਿਜ਼ਰਵ, ਵੇਮਬਨੂਰ ਵੈਟਲੈਂਡ ਕੰਪਲੈਕਸ, ਵੇਲੋਡ ਬਰਡ ਸੈਂਚੁਰੀ, ਵੇਦਾਂਥੰਗਲ ਬਰਡ ਸੈਂਚੂਰੀ ਅਤੇ ਉਦਯਾਮਰਥਨਪੁਰਮ ਬਰਡ ਸੈਂਚੂਰੀ 10 ਨਵੇਂ ਭਾਰਤੀ ਵੈਟਲੈਂਡਸ ਵਿੱਚ ਸ਼ਾਮਲ ਹਨ। ਗੋਆ ਦੀ ਨੰਦਾ ਝੀਲ; ਕਰਨਾਟਕ ਵਿੱਚ ਰੰਗਨਾਥਿੱਟੂ ਬਰਡ ਸੈਂਚੁਰੀ ਅਤੇ ਮੱਧ ਪ੍ਰਦੇਸ਼ ਵਿੱਚ ਸਿਰਪੁਰ ਵੈਟਲੈਂਡ ਸਾਈਟ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਭਾਰਤ ਆਜ਼ਾਦੀ ਦੇ 75ਵੇਂ ਸਾਲ 'ਚ ਰਾਮਸਰ ਨੂੰ ਆਪਣੇ 75 ਵੈਟਲੈਂਡਜ਼ ਲਈ ਮਾਨਤਾ ਦਿਵਾਉਣ ਦਾ ਟੀਚਾ ਰੱਖਦਾ ਹੈ। ਰਾਮਸਰ ਈਰਾਨ ਦਾ ਉਹ ਸਥਾਨ ਹੈ ਜਿੱਥੇ 1971 ਵਿੱਚ ਅੰਤਰਰਾਸ਼ਟਰੀ ਵੈਟਲੈਂਡਸ ਸੰਧੀ 'ਤੇ ਹਸਤਾਖਰ ਕੀਤੇ ਗਏ ਸਨ।